Markus 16
16
Yesu tuho: pole
(Mat. 28:1-10, Luk. 24:1-12, Yoh. 20:1-10)
1Tòna liung‑mo ti àlo kapillìheang, dea‑mo i pihengi àlo Sattu, Maria tu Magdala pang Maria inanna Yakobus, sola: Salome mambalaꞌ‑i se hingkùrang, na panghingkùràngiing se hatang puntinna Yesu. 2-4I miluhengi àlo parara mingku to, mingkakaꞌ‑i se mao i kaburuꞌ. Silàha:-làha:‑i se moa teꞌ, “Isaia‑moda ti ung mampalloliing‑ke se hatu deꞌ, nai babana kaburuꞌ?” Tòna dùkuꞌ‑mi se i kaburuꞌ, màli: sòhong ti kùlaꞌ. Hampoꞌ to na hele‑mi se, tiloli‑mo to hatu.
5Mintamanna‑mi se i laling kaburuꞌ to, mangita‑i se muane ung mangura mampake juba ung mabusa:, mesong mui konang. Tipadàlaꞌna‑mi se. 6Hampoꞌ tau to musua: moa teꞌ, “Hau mariaꞌ se! Ku ìsang moa teꞌ u mangokaꞌ se Yesu tu Nasareꞌ, to ung nipai oròngang. Tuho:‑moDa pole. Hari:‑Da hura: inne:. Hele‑ko se! I antee ti niloling‑I. 7Hampoꞌ nàmo: se! Patidolu‑ingko se mao i pasikolaNa, pang mao ho i Petrus, moa teꞌ, ‘Dolùnga‑Da one: i Galilea. I anto u itaa se, mène: ung ladu Na pusua: matung.’ ” 8Missòhongna‑mi se pang ràha malai nai kaburuꞌ, sàbaꞌ mimàha pang mariaꞌ‑i se. Ha musua:-sua:‑i se mao i isai-sai, sàbaꞌ lupu mariaꞌ.
Tampakàna Suraꞌ Markus ung nironno: lùlung, pìniꞌna mène: tee,
Yesu mampupiita kalaeNa mao i Maria tu Magdala
(Mat. 28:9-10, Yoh. 20:11-18)
[9Tòna tuho:‑mo pole ti Yesu, mingkakaꞌ i miluhengi àlo parara mingku to, mampupiita kalaeNa ung parrara mao i Maria tu Magdala, ung Na salokaꞌi‑mo nai pitu dihata bulituku. 10Lumanna‑mi ti bahine to, mao i tau ung lupu sipolai: Yesu, ung tarrang masussa pang kumàraka, pang mampaìsàngi moa teꞌ, 11“Tuho: pole ti Yesu pang ku siita‑moko.” Hampoꞌ to na sàding‑mi se, hang na patongang‑i se.
Yesu mampupiita kalaeNa mao i idua tau
(Luk. 24:13-35)
12Ladu nai anto, Yesu mampupiita kalaeNa i laling rupa ung laing mao i idua tau ung mangulaꞌ‑Mi, tòna tarrang i pammulaoangna‑i se nai lipu: Yerusalem. 13Sumulena‑mi se pang mampaìsàngi solana sintàna:, hampoꞌ ha na patongang‑i se ho.
Yesu mampupiita kalaeNa mao i pasikolaNa pang mampantuyu‑i se
(Mat. 28:16-20, Luk. 24:36-49, Yoh. 20:19-23, KUNP 1:6-8)
14Tampàkang, Na pupiita ho ti kalaeNa mao i sampulo: besa pasikolaNa, tòna tarrang‑i se manne:, pang Na ràho moa teꞌ, “U kapala batu se. Aka pu dang nu patongang‑ko se ti tau ung mangita‑Maꞌ tòna Ku tuho:‑mo pole?”
15Masai-sai nai anto, Na musua: moa teꞌ, “Nao: se i lìliꞌna lino! Pakareba‑ko se ti Kareba Belo: mao i nasang tulino! 16Isai ti ung mupatongang pang nidoiꞌ, nipasalamaꞌa. Hampoꞌ isai ti ung dang mupatongang, nihukùnga i lino i hunni. 17Miluhali butti, isai ti ung mupatongang, nihengi‑ing kuasa. Araa ung mampasahu dihata bulituku mampake konaKu, araa ung musua: i laling sua:-sua: ung màle mao i dei: se. 18I ari: na mantokaꞌ talubammaꞌ, dea‑raka mangenung rasung, hang mangkoraii: se masolang. Araa ung mantokaꞌ tau ung mipanaꞌ pang tau to mataletea.”
Yesu titengke: mao i suruga
(Luk. 24:50-53, KUNP 1:9-11)
19Tòna ladu‑mo musua: ti Puang Yesu mao i pasikolaNa, titengke:‑mo mao i suruga, pang mesong mui konangna Puang Matua. 20PasikolaNa lumao‑mo mampadeaꞌ Kareba Belo: pai lipu: iaka-aka, pang na terei Puang, ung manghengi‑ing kuasa mampukauꞌ kalle-kalleang mampupiita moa teꞌ tongang to ung na pakareba‑i se.]
Tampakàna Suraꞌ Markus ung nironno: lùlung, ara ho ung mène: tee,
[9Na padeaꞌ sahe: bahine to‑i se nasang ti pasakiꞌ to mao i Petrus pang sola:-solana.*#16:9 dea‑raka, Na pakapodiꞌ‑i se bahine to ti mampadeaꞌ nasang pasakiꞌ to mao i Petrus pang sola:-solana. 10Ladu nai anto, Yesu kalenanna ti ung massahuꞌ, mangola: pasikolaNa, kareba kasalamaꞌang ung nai Puang pang ung dang ara katampàkangna, mao i lìliꞌna lino.]
اکنون انتخاب شده:
Markus 16: skx
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
