Johani 9
9
Yesu aa porithsa mukwerume oyu werekiwire o ku di kapuputwa
1Yesu o ku pita wa monine munu oyu wekarire o ku di kapuputwa ku tunda ku kwerekiwa kwenthzi. 2Erongwa yenthzi ya mwipurire ci: “Murongithsi, thsivi thsadye ethsi thsa retire ci oyu munu erekiwe o ku di kapuputwa? Thsivi thsenthzi nji thsashemienthzi?”
3Yesu wa i tawire ci: “Kadi cingwa mukaci ko thsivi thsenthzi nji thsashemienthzi, unone eyo shime ya dikarire ci ekwama ya Nyambi i monaharere pa penthzi. 4Twaa roera ku tenda ekwama yoyu naa ni tumu o uno mutenya, inene othsiku waa keya, apo honi kwithsa munu o ku twethsa ku kwama ekwama. 5Uno ni di muno mu kaye, yame no mwethzi o kaye.”
6Ou a manine ku amba kengeyo, Yesu wa thsiperire mate pashi no ku ruva marowa no mate enthzi. Wa rambire aya marowa pa meho oya kapuputwa 7no ku mu ambera ci: “O thze o ka cihupe muya mu kayoano ka Siloami” (Siloami po kuninga ci Okutumiwa). Oya munu ngou a thzire no ku ka cihupa, wa ka hukire o ku mona.
8Andambo nowa a mu monangire o ku romba a cipurire ci: “Oyu ne kadi yodiyo oya na ekaranga o ku romba nji?” 9Amweya ci: “Yodiyo,” awa ci: “Dyombo, kadi yodiyo, aa cipitura pohuma nenthzi!”
Unone aye thsinda wa kwatererire ku wa ambera ci: “Yame shemwa!”
10A mwipurire ci: “Ngepi a na thsikuka aa meho oe?”
11Wa wa tawire ci: “Oyu munu nethsiwa ci Yesu yo na ruvu marowa no ku a ni ramba pa meho, no ku ni ambera ci: ‘O thze ku kayoano ka Siloami o ka cihupe.’ Ngou ni na thzi no ku ka cihupa, karo amepo ni mona.”
12A mwipurire ci: “Kupi a di?”
Aye wa tawire ci: “Njone.”
Afarithsi aepaura oyo kapuputwa
13A twarire kwAfarithsi oya munu wekarire kapuputwa. 14Edyo diyuwa a ruvire marowa Yesu no ku thsikura meho oya munu po nedi dyo Savata. 15Mweyo, Afarithsi nawo epurire oya munu edi a twethsire ku mona. Aye wa wa amberire ci: “Kuma a na ni ramba marowa pa meho, ou ni na ka cihupa amepo ni mona.”
16Afarithsi amweya a ambire ci: “Oyu munu kadi cingwa kwa Nyambi a tunda, inene aa kwama dyo Savata.”
Unone amweya a ambire ci: “Munu o thsivi ne ngepi edi nga a kwama emonithso yo kenge?” Mweyo, kwekarire kucitepa mu kaciko.
17Afarithsi ngou epurire karo oya kapuputwa ci: “Waa anekera ine keyi yoyu munu na reta ci o mone?” Aye wa wa tawire ci: “Naa mona ci oyu munu po mukwakukethza.”
18Napo Majuda shime kanine. Ka tawire ci oyu munu shime ekarire o ku di kapuputwa shime apo mbeci a mone. Ngou ethsire ashemienthzi 19no ku na wepura ci: “Ene oyu ne mwanenu nji? Ene shime erekiwire shemwa o ku di kapuputwa? Ngepi honi a na twethsa ku mona pano?”
20Ashemienthzi a tawire ci: “Twaa dimuka ci oyu munu po mwanetu, karo twaa dimuka ci dya erekiwire o ku di kapuputwa. 21Uno honi ka tu dimuka edi ku na keya ci a mone honi, karo ka tu dimuka oyu na mu monithsa ci edye. Mu u cipwere, mukuru o munu oyu kenge a ciambera thsinda!” 22Ashemienthzi shime ambire kengeyo mukaci ko ku yapa Majuda, inene Majuda shime a ciyuvire ci yomuhe oyu wa ku amba ci Yesu yodiyo Mesiya kenge a ku cithziwa mu sinagoge. 23Eyo ngeyi a amberire ashemienthzi ci: “Mukuru o munu mu u cipwere.”
24Afarithsi ethsire ro muthsidi oya munu wekarire kapuputwa no ku na mu ambera ci: “O shangare Nyambi!#9.24 Diambo dyo ku amba ci: “O ambe oshemwa pa meho a Nyambi.” Atwe po tu na dimuka ci oyu munu po munu o thsivi.” 25Aye wa tawire ci: “Nji munu o thsivi nji kadi munu o thsivi, eyo ame ka ni i dimuka. Eyi ni na dimuka pohuma po ci shime naekara kapuputwa, pano honi naa mona.”
26A mwipurire ci: “Ine a na ku tende? Ngepi a na thsikura meho oe?” 27Wa tawire ci: “Ni na mi tongwera kare ka mu fotire ku i teerera. Ine karo eyi mu fotera ku i yuva? Ene namwe mwaa fota kwikara erongwa yenthzi nji?”
28A mu yukukerire no ku mu ambera ci: “Yowe o thsirongwa thsenthzi, atwe po twerongwa ya Mushe. 29Atwe tu na dimuka ci Nyambi shime a ambire kwa Mushe. Uno honi eciko oyu munu oyu po ka tu dimuka noku a tunda ci kupi!”
30Aye wa tawire ci: “Po i na komokithsera apo, ka mu dimuka noku a tunda, uno honi shaanga ikare kengeyo o na thsikura meho ange. 31Atwe po twaa dimuka ci Nyambi ka a teererangire anu wevi, unone wa ku teerera o ku mu rombera no ku kwama eshima yenthzi. 32Ku tunda ku matatekero o kaye twa diyerire tu yuvu munu oyu wa thsikura meho o munu oyu werekiwire o ku di kapuputwa. 33Nga ka naa tundu kwa Nyambi oyu munu, nga ka a twethsire ku kwama thsimweya.”
34Afarithsi a mu huthsire ci: “Owe po shime werekiwire o ku di munu o thsivi shemwa, waa anekera ci kenge nga o tu rongithsa owe nji?” Ngou a mu cithzerire pora.
Kwikara kapuputwa kweyi yo mupepo
35Yesu wa yuvire ci oya munu Majuda a na mu cithzi mu sinagoge. Yesu ou a mu wanine, wa mwipurire ci: “Ene waa tawa kwa Mwana Munu?”
36Aye wa tawire ci: “Ñathsire wange, ngo u ni tongwere ci edye ni tawe ku kwenthzi!”
37Yesu wa mu amberire ci: “O na mu mono, karo yodiyo oyu amba noe.”
38Oya munu ngou a ambire ci: “Fumu, naa tawa,” no ku tongama ku rombera.
39Yesu wa mu amberire ci: “Kuma na ni keya mu kaye ku reta raturo, ci tupuputwa tu mone, karo awa a mona a piruke tupuputwa.”
40Afarithsi amweya awa ekarire po pepi a mu yuvire o ku amba kengeyo, a mwipurire ci: “Ene natwe twa tupuputwa nji?” 41Yesu wa wa amberire ci: “Nga mwa tupuputwa nga ka mu di no murandu o thsivi. Uno honi pa ku amba ci mwaa mona, shimbi mwekarera anu o thsivi.”
اکنون انتخاب شده:
Johani 9: mho
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
©2023 The Seed Company
