Ap'u 32
32
A Sikup idedrn an a Isau istudau
1Laha, a Sikup isapa navanelan dav'a ti enselan a Mlin Eia avrama asnn. 2Naran a Sikup ilar ivr ti a, “Hir avv'i m'rnuran Atua.” Laha, itu naha nut lera iv'i Mahanaim.
3Sarei, a Sikup itap'er m'ertu avv'i v'nenan apavtauamu ani kavrav'a asn a Isau, iv'i tv'aln, arna nut a Seir, arna v'anu lil a Itum. 4Itu v'nen anr kavr ti a, “Pavv'ana ipanap'i lera asn a mlinak, Isau, kavvr ti a, ‘Dui na m'akarienam, a Sikup ivr ti a, “Ntlak sarei m'ei a Lapan kalak atlera ier hilaha. 5Kana plukak iak, m'er tuki, m'er sivsiv m'er nani, dui na m'akarienak m'er vitar na m'akarienak. Hilaha ntep'a v'nenak asnm kv'i a mlinak, a ti p'epasla vtmien arna nahm.” ’ ”
6Sarei, ardu na v'nenan a Sikup avm'alet ml asnn kavvr ti a, “Ntvrav'a sarei asn a titiamu nam, iv'i a Isau. Hin ipama ml m'er ardu avnelnal iv'av'a (400) avsapei.” 7Laha, a Sikup idedrn ani istudau, nln ims istudau. Laha, itupr m'ertu avsapei, m'a sivsiv, nani, pluk, kam'el, kani avp'lt a nut iru. 8Kavr ti a, “Ipavr ti a Isau ipama asn pnen karpr, pnen apavruh.”
9Sarei, a Sikup ivr ti a, “U Atuan a pupuak, iv'i a Epraham, Atuan a tetiak, iv'i Aisak, a Mlin Eia, la kvr a kana ha, kavr ti a, ‘Pam'alet ml asn v'anuam m'a nl nam'elam laha p'emhmah anh.’ 10Kana naviviln a si udlani kmhmah a kana aranan, m'a v'nen dau udlani ktv'iv'en sarei a kana, nv'i dui na m'akarienam. Sena ti nua napilakt uaki kaluvn a nauei laha, iv'i a Surtan ra, hilaha arm'ertuak avp'lt a nut iru. 11Ntu tamat a ti palev'la kana al lm'an a titiamu nak. Palev'la kana arna nut huan a Isau, sena ti ndedrn ani. Imahei ti ipama karp kana, karp a natk m'er a uniar. 12#Ap'u 22:17.Sena ti nakm kvr ti a, ‘Nvrdaui, Kana p'en si p'as anh, kani ti a natm apavnelnal kavnep'a nun iter a p'ak nata, la inelnal istudau ha, akaspandri.’ ”
13Laha, ilak atlera arna lihat lera, kalev' sei ipaslei, a ti ipav'i sei ipatau an a titiamu nan, iv'i a Isau. 14Ilev' prapar na nani inelnal iv'aru (200), pua na nani inelru (20), prapar na sivsiv inelnal iv'aru (200), pua na sivsiv inelru (20), 15kam'el ineltl (30) m'er a natr la avnunu uam ha, prapar na pluk inelv'a (40) m'er pua nen inal, prapar na tuki inelru (20), m'er a natr inal.
16Sarei, itu si udlani lera al lm'ar arm'ertu na m'akarienan, katupr si slm udlani lera kani avp'lt a nut ilm', kavlak au a hir, kavr a dui na m'akarienan kavr ti a, “Kam'i pavtauamu a kana, kavani ti nut vn ipaiak a p't nut nar nani udlani, sivsiv udlani, kam'el udlani, pluk udlani m'er tuki udlani.” 17Katu v'nen a dui itauamu kavr ti a, “Naran a Isau, iv'i tv'alk, ipama asnm kamiman anh kavr ti a, ‘?Kv'i m'ertuan ak? ?Pav'a ip'i? ?Si slm kv'av'ar avv'i nkan ak?’ 18Laha, pavr ti a, ‘Avv'i nkan a Sikup, iv'i dui na m'akarienam. Avv'i sei ipatuvn an a mlinak, iv'i a Isau. Parn, hin itauatah a kam'em'.’ ” 19Itu v'nen inap'i lera a tv'el dui iv'ev'a si slm, m'a nitlen, m'er nelnal la avv'ev'a si slm ha, kavr ti a, “Naran pavpaslei a Isau, pavv'ana m'ei ipanap'i lera. 20Kavvri ml kavvr ti a, ‘Parn, dui na m'akarienam, a Sikup, itauatah a kam'em'.’ ” Iani inap'i lera sena ti ivr ti a, “P'ani ti nln ipap'as sena sei p'etau ani ipatauamu, sarei ti p'ela nahn. Nsarei iparn ipap'as a ti ipala nahk.” 21Laha, si slm irn ti ipatau ani avtauamu asnn, v'eti hin idlak uam arna nut lera ier m'etav'aran.
A Sikup iuadei Atua arna nut a Peniel
22Laha, hin ithal arna lihat lera kalev' tav'etan arru m'er vitar na m'akarienan arru, m'er a natn arnal lman iamk kaluvn a naui pa, nahan iv'i Sapuk. 23Kalav'r kav'av'ar avluvn a nauei m'a sian udlani. 24#Usia 12:3,4.V'eti a Sikup ilak mamk uaki arna tv'eliel. Laha, dui iamk ima kauadei, laha aruadeda hir ier nut iren. 25Laha, naran ila ti iahua kasiv'i, ier su pnakn. Sarei, su pnakn a Sikup iln m'lnen, naran aruadeda hir.
26Laha, ivr ti a, “Puln kana sena ti itv'i ti nut iparen.” V'eti ivr ti a, “Nkaulnh ipaier naran ti pamhmah a kana.”
27Laha, ivr ani, kavr ti a, “?Naham iv'i ak?” Ivr ti a, “A Sikup.”
28 #
Ap'u 35:10. Laha, ivr ti a, “Hilaha naham ikav'i a Sikup ml, v'eti ipav'i a Isrel. Sena ti kv'i mlin iamk, nut huam iak m'ei Atua m'er arm'ertu kahua kasiv'r.”
29 #
MAH 13:17,18. Sarei, a Sikup imimani, kavr ti a, “Nmiman anh, pavr naham.” V'eti ivr ti a, “?Inap'i hin kmiman nahak?” Laha, imhmah ani atlera.
30Laha, a Sikup itu naha nut nen lera iv'i Peniel, sena ti ivr ti a, “Ntla sera nahn Atua v'eti nsilv' uam.” 31Naran isiv' nut a Peniel neiel itvai aranan, laha iv'el kavalasih sena su pnakn. 32Sena si lera arm'ertu a Isrel ahavhan nih pnak si slm ier dika sena pnakn a Sikup, sena ti ier nih pnakn a Sikup.
اکنون انتخاب شده:
Ap'u 32: nmb
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023 Presbyterian Reformed Church of Australia