Lawa a wúlu-bɔlen 1

Wúlu bɔ ǹ gɔn

Wúlu màn tiɛ̃

1Ǹ kɔn pinaa, Dɛnaa Lawa nə́ n toa kɔn yɛ ǹ kion kɛ nɛ, á lɛ dia Muizu la á pɛ nɛ: 2A pɛ Izirayeli minin lɛn manɛ: Bɛ̀ ǹ mɛn tá die Lawa gɔ ǹ màn koe Dɛnaa Lawa la, a doamaa nɛ a da ka tɔɔ gole hinlaa ka a boɛɛn nɛ, Lawa gɔ ǹ wɔ lɛa.

3Bɛ̀ tɔɔ gole ne, a n die biɛ *wúlu màn tiɛ̃ lɛa, a doamaa nɛ a da ka dii gɔ̀lɔ̀ nɛ, wɔ̀lɔ ná a ba a ganaa wa. A doamaa nɛ a da nɛ kɔn yɛ ka Lawa nɛ ǹ kion lɛ a kiɛnlɛ-a, Dɛnaa Lawa tɔn lɛ kɔ, bɛa dɛnaa golee a yɔrɔ-a. 4Dɛnaa Lawa bɛ́ re lɛ koe tɔɔ mɛn lɛ ganaa wúlu màn tiɛ̃ lɛa, ǹ dɛnaa die a n gɔn da bɛ lɛ mìi ni, a sii baraa sawaa ǹ wúlu màn lɛa. 5A die a bɛa tɔɔ lɛ dɛ kɔn yɛ ka Lawa nɛ ǹ kion lɛ yɔrɔ-a. Aarɔn a nɛgiĩn, Lawa a wúlu-bɔlen kɛn, bɛn min goon die a da ka tɔɔ lɛ mà nɛ, a bɛa mà lɛ pɛpɛsɛ̃ *wúlu bɔ ǹ bǎã kɛ wàãn ganaa, ǹ nə ǹ mɛn lɛ dɔ kɔn yɛ ǹ kion lɛ a kiɛnlɛ-a. 6Bɛa dɛnaa tɔɔ lɛ ki bɔ, a kukuru a gù lɛ yii li. 7Bɛ kio, Lawa a wúlu-bɔle Aarɔn a nɛgiĩn kɛn nə tɛ koa wúlu bɔ ǹ bǎã lɛ nɛ, ǹ gɔn kaa a nɛ. 8Ǹ gɔn mɛn kaa wúlu bɔ ǹ bǎã lɛ a tɛ lɛ nɛ, Lawa a wúlu-bɔlen kɛn nə tɔɔ lɛ a gùn kaa bɛ lalan, ka a mìi laanka a nyɔɔ nɛ. 9Ǹ na a nànan laanka a kèrèn pii, wúlu-bɔle lɛ goon tɔn na a tumaa tã wúlu bɔ ǹ bǎã lɛ lalan. A n wúlu màn tiɛ̃ lɛa, a tɛmaa gìĩ n kɔɔ̃n Dɛnaa Lawa ganaa.

10Bɛ̀ tɔɔ boɛɛn nɛ a n die biɛ wúlu màn tiɛ̃ lɛa, ta sère ne hinlaa bòe ne, a doamaa nɛ a da ka a gɔ̀lɔ̀ nɛ, wɔ̀lɔ̀ ná a ba a ganaa wa. 11A bɛ dɛ wúlu bɔ ǹ bǎã lɛ genli, a gɔsɛ a lɛ̀gɔn la. Bɛ kio, Aarɔn a nɛgiĩn Lawa a wúlu-bɔlen kɛn na a mà si ǹ pɛpɛsɛ̃ wúlu bɔ ǹ bǎã lɛ wàãn tumaa ganaa. 12Ǹ dɛnaa tɔɔ lɛ kukuru a gù lɛ yii li, a na a mìi laanka a nyɔɔ kaa kun ni. Ǹ gɔn mɛn kaa wúlu bɔ ǹ bǎã lɛ a tɛ lɛ nɛ, wúlu-bɔle lɛ nə ǹ kaa bɛ lalan. 13Ǹ na a nànan laanka a kèrèn pii, wúlu-bɔle lɛ goon tɔn nə ǹ nyaa Dɛnaa Lawa nɛ. Bɛ kio, a tɔn na a tumaa tã wúlu bɔ ǹ bǎã lɛ lalan. A n wúlu màn tiɛ̃ lɛa, a tɛmaa gìĩ n kɔɔ̃n Dɛnaa Lawa ganaa.

14Bɛ̀ min nə die bàan biɛ wúlu màn tiɛ̃ lɛa, n Dɛnaa Lawa gɔ nɛ, ǹ dɛnaa doamaa nɛ a da ka wuruun ni, hinlaa ka zɛrɛkantoan nɛ. 15Wúlu-bɔle lɛ da nɛ wúlu bɔ ǹ bǎã lɛ yɔrɔ-a, a na a mìi wɛ̃, a tã wúlu bɔ ǹ bǎã lɛ lalan. Bɛ kio, a na a mà kaa wúlu bɔ ǹ bǎã lɛ wàãn ganaa. 16Ǹ na a pànzɔɔ bɔ, ǹ bɛ zũ ton kaa ǹ bǎã kɛ nɛ, wúlu bɔ ǹ bǎã lɛ a lɛ̀giala gɔn la. 17Ǹ bàan lɛ yu kɔn paa, ǹ nə́ ǹ ba niɛ̃ ǹ bɔ kɔn wa. Bɛ kio, wúlu-bɔle lɛ da wúlu bɔ ǹ bǎã lɛ a tɛ gɔnɔn lɛn la a tã. A n wúlu màn tiɛ̃ lɛa, a tɛmaa gìĩ n kɔɔ̃n Dɛnaa Lawa ganaa.

اکنون انتخاب شده:

Lawa a wúlu-bɔlen 1: SCE2013

های‌لایت

کپی

مقایسه

به اشتراک گذاشتن