EKLESIASTIKO 3
3
Dɔdeasiwo na dzilawo
1Viwo, miɖo to nye, mia tɔ́;
miwɔ nu ɖe eteƒe pɛpɛpɛ bene woate ŋu ana mianɔ dedie.
2Elabe Aƒetɔ la dea bubu vi tɔ́ ŋu wu viawo,
eye wòda asi ɖe vi nɔ ƒe ŋusẽ ɖe viawo dzi la dzi.
3Ame siwo dea bubu wo tɔ́ ŋu la, xe fe ɖe nuvɔ̃ ta,
4eye ame siwo tsɔa bubu na wo nɔ la, wole abe ame siwo dzra kesinɔnu ɖo la ene.
5Ame siwo dea bubu wo tɔ́ ŋu la, woakpɔ dzidzɔ ɖe woawo ŋutɔ viwo hã ŋu,
eye ne wodo gbe ɖa la, woasee.
6Ame siwo bua wo tɔ́ la, woanɔ agbe didi,
eye ame siwo dea bubu fa akɔ na wo nɔ ŋu la, ɖo to Aƒetɔ la;
7Ame siwo vɔ̃a Aƒetɔ la la dea bubu wo tɔ́ ŋu
woasubɔ wo dzilawo abe woƒe aƒetɔwo ene.
8Bu tɔ́wò le nuƒoƒo kple nuwɔna me,
be eƒe yayra nava dziwò.
9Elabe tɔ́ ƒe yayra naa ŋusẽ viwo ƒe aƒewo,
ke vi nɔ ƒe fiƒode hoa woƒe gɔmeɖoɖowo ɖa.
10Mègado ɖokuiwò ɖe dzi to tɔ́wò mabumabu me o,
elabe tɔ́wò ƒe gbɔɖiɖi menye bubu aɖeke na wò o.
11Ame tɔ́ ƒe bubu nye ame ŋutɔ ƒe bubu,
eye enye ŋukpe na viwo ne wometsɔ bubu na wo nɔ o.
12Vinye, kpe ɖe tɔ́wò ŋu le eƒe tsitsime,
eye mègana wòase veve zi ale si wòle agbe o.
13Ne eƒe susu megale te o hã la, gbɔ dzi ɖi nɛ;
ne wò ya wò susu te ŋu le dɔ wɔm pɛpɛpɛ hã la, mègagbee o.
14Elabe womaŋlɔ dɔmenyowɔwɔ na ame tɔ́ be o,
eye woatsɔ wò nuvɔ̃ ake wò ɖe enu.
15Le wò xaxagbe la, woaɖo ŋku edzi ave nuwò;
abe ale si ahu kana ne xexeme kɔ ene la, nenemaa wò nuvɔ̃wo akakae.
16Ame si gble tɔ́a ɖi la le abe busunyagblɔla ene,
eye ame si do dziku na nɔa la, Aƒetɔ la ƒo fi dee.
Ɖokuibɔbɔ
17Vinye, wɔ wò dɔwo kple ɖokuibɔbɔ;
ekema ame siwo ƒe nu dze Mawu ŋu la alɔ̃ wò.
18 #
Fil 2.3. Ale si wò gãnyenye le dzi yim la, nenemae wòle be nàbɔbɔ ɖokuiwò ɖe anyi wui;
ale àkpɔ ŋudzedze le Aƒetɔ la gbɔ.
19Ame geɖewo de dzi eye woxɔ ŋkɔ,
gake ɖokuibɔbɔlawoe eyama ɖea eƒe nya ɣaɣla fiana.
20Elabe Aƒetɔ la ƒe gãnyenye tri akɔ;
ke wodea bubu eyama ŋu to ɖokuibɔbɔlawo dzi.
21Mègadi nu si sesẽ wu wò la wɔwɔ loo,
alo aku nu si gɔmesese mele wò ŋusẽ me la me o.
22 #
Mos V, 29.29. Bu nu si woɖe gbe na wò be nàwɔ la ŋu,
elabe nu si le ɣaɣla la ƒe nya meka wò o.
23Mègade nu nya si kɔ wu wò la me o,
elabe woɖe nu geɖe fia wò wu esiwo gɔme nàte ŋu ase.
24Elabe ame geɖewo ƒe ɖokuiŋudzedze kplɔ wo trae,
eye woƒe susu manyomanyo gblẽ woƒe nyametsotso me.
25Ŋku manɔ anyi la, kekeli aɖeke meli o;
sidzedze manɔ anyi la, nunya aɖeke meli o.
26Susu dzeaglã mawue nu nyuie o,
eye ame si ke lɔ̃ afɔku la atsrɔ̃ ɖe eme.
27Susu dzeaglã la, fukpekpewoe nye agba wòtsɔna,
eye nuvɔ̃wɔla kpea nuvɔ̃ ɖe nuvɔ̃wo ŋu.
28Ne dzɔgbevɔ̃e dzɔ ɖe dàdala dzi la, gbedada menɔa anyi o,
elabe ati vɔ̃ ƒo kè ɖe to ɖe eyama me.
29Tagbɔkɔkɔetɔ ƒe susu kpɔa dzidzɔ le lododowo ŋu,
eye nunyala ƒe didie nye to si le ŋudzɔ na nyasese.
Nunana ame dahewo
30Ale si tsi tsia dzo wɔadã la,
nenemae nunana ame dahewo xea fe ɖe nuvɔ̃ tae.
31Ame siwo ɖoa dɔmenyo teƒe la, bua etsɔ me ŋu;
ne wodze anyi la, woakpɔ nu aziɔ ɖe eŋu.
EƲEGBE BIBLIA © The Bible Society of Togo, 2014.