Psalmowo 65
65
Kafukafu kple akpedada
(David ƒe ha na hadzihakplɔla. Hadzidzi)
1Kafukafu ye dze na wò,
o Mawu, si le Zion,
eye wòe woaxe adzɔgbeɖefewo na,
2wò ame si sea gbedodoɖa!
Gbɔwòe ŋutilãwo katã aɖo tae
3le nuvɔ̃wo ta.
Ne míaƒe dzidadawo wu tsɔtsɔ na mí,
wòe tsɔa wo kena.
4Woyra ame si nètia,
eye nèhee vɛ
be wòanɔ wò xɔxɔnuwo!
Míaɖi ƒo kple nu nyui siwo le wò aƒeme,
wò gbedoxɔ kɔkɔe la me!
5Wòe ɖo to mí, wɔ nu dziŋɔwo, tsɔ ɖe míi,
o míaƒe xɔname ƒe Mawu;
wòe nye mɔkpɔkpɔ na anyigba ƒe seƒewo katã
kple atsiaƒu siwo le didiƒe ʋĩi la.
6Wòe ɖo towo gɔme anyi kple wò ŋusẽ,
eye nètsɔ ŋusẽ bla ali dzi;
7wòe na ƒu dzeagbowo zi ɖoɖoe,
ƒutsotsoewo ƒe hoowɔwɔ
kple dukɔwo ƒe ʋunyaʋunya nu tsi;
8ale be ame siwo le anyigba ƒe seƒe ke
vɔ̃na na wò dzesiwo;
wòe nana be agudzedze kple zãdodo
kpɔa dzidzɔ doa ɣli.
9Wòe va kpɔ anyigba ɖa,
eye nède tsii;
wòe na wode ami nyuie.
Mawu ƒe tɔsisi ɖɔ gbagba;
wòe nana be wokpɔa woƒe bli
elabe nenemae nèɖoe.
10Wòe dea tsi kpoawo dome nyuie,
eye kpoawo dzea anyi
agbafie naa anyigba bɔbɔna,
eye nèyraa nukuwo ƒe tsitsi.
11Ƒe la wua enu kple wò nuku gbogboawo;
wò tasiaɖamwo ƒe toƒewo tsyɔa lãwo ƒe ami.
12Lãnyiƒe siwo le gbedadaƒo hã de ami,
togbɛwo bla ali dzi kple aseyetsotso,
13alẽhawo nye tsyɔ lãnyiƒewo,
baliwo yɔ fũu kple bli ʋaʋãwo,
wo katã wole aseye tsom le ha dzim.
EƲEGBE BIBLIA © The Bible Society of Togo, 2014.