Samuel I 3
3
Aƒetɔ ɖe eɖokui fia Samuel
1Azɔ Samuel ɖevi la nɔ Eli te nɔ Aƒetɔ subɔm. Le ɣe ma ɣi me la, Aƒetɔ meƒoa nu na ame edziedzi o. Ŋutegakpɔkpɔ hã mebɔ o. 2Azɔ Eli tsi, eƒe ŋkuwo nɔ tsitsim eye meganɔ nu kpɔm o. Gbe ɖeka zã la, eva eme be Eli mlɔ emlɔƒe. 3Samuel ya mlɔ Aƒetɔ ƒe gbedoxɔ me, afi si Mawu ƒe nubablaɖaka la le. Womekpɔ tsi akaɖiawo haɖe o. 4Aƒetɔ yɔe be: “Samuel! Samuel!” Etɔ be: “Nyee nye esi!” 5eye wòƒu du yi Eli gbɔ hegblɔ nɛ be: “Nyee nye esi, elabe èyɔm.”
Ke Eli ɖo eŋu be: “Nyemeyɔ wò o; yi ɖamlɔ anyi.” Ale Samuel yi ɖamlɔ anyi.
6Ke Aƒetɔ gayɔ Samuel ake. Efɔ gayi Eli gbɔ gblɔ be: “Nyee nye esi, elabe èyɔm.” Eli gblɔ be: “Vinye, nyemeyɔ wò o; gbugbɔ ɖamlɔ anyi.” 7Azɔ la, Samuel menya Aƒetɔ haɖe o, eye Aƒetɔ meɖe eƒe nya fiae haɖe o.
8Aƒetɔ gayɔ Samuel zi etɔ̃lia. Efɔ yi Eli gbɔ ɖagblɔ nɛ be: “Nyee nye esi, elabe èyɔm.”
Tete Eli dze sii azɔ be Aƒetɔ ye le ɖevia yɔm, 9ale wògblɔ na Samuel be: “Yi ɖamlɔ anyi. Ne egayɔ wò la, gblɔ nɛ: ‘Aƒetɔ, ƒo nu, elabe wò dɔla le to ɖom.’ ” Ale Samuel yi ɖamlɔ emlɔƒe.
10Aƒetɔ gava eye wòle tsitre yɔe abe tsã ene be: “Samuel! Samuel!” Samuel ɖo eŋu be: “Ƒo nu, elabe wò dɔla le to ɖom.” 11Aƒetɔ gblɔ nɛ be: “Kpɔ ɖa, mele nane wɔ ge le Israel-dukɔa me. Ame sia ame si asee la ƒe to eveawo me aɖi yeŋ. 12Gbe ma gbe la mana nya siwo katã megblɔ ɖe Eli ƒe aƒe la ŋu la nava eme tso gɔmedzeƒe va se ɖe nuwuƒe. 13Megblɔ nɛ va yi be nyemadzudzɔ tohehe na eƒe aƒe akpɔ o. Elabe enya nu tso viawo ƒe vodada kple busunya siwo wogblɔna ɖe Mawu ŋu la ŋu, gake wòzi kpi megbena na wo o. 14Eya ta meka atam be Eli ƒe aƒe la matsɔ vɔsa alo nunana aɖeke alé avu eƒe vodada la akpɔ o.”
15Samuel gamlɔ anyi va se ɖe esime ŋu ke. Efɔ eye wòʋu gbedoxɔa ƒe ʋɔwo. Ke evɔ̃ ŋutega si wòkpɔ la gbɔgblɔ na Eli. 16Gake Eli yɔe be: “Vinye Samuel!” Samuel ɖo eŋu be: “Nyee nye esi!”
17Eli biae be: “Nya ka Mawu gblɔ na wò? Gblɔ wo katã nam; mègaɣla ɖeke ɖem o. Ne mègblɔ wo katã nam o la, Mawu ahe to na wò agahee na wò ake.” 18Ale Samuel gblɔ nya la katã nɛ; ɖeke mesusɔ o. Eli gblɔ be: “Eyae nye Aƒetɔ. Newɔ nu si dze eŋu la faa.”
19Samuel va tsi. Aƒetɔ nɔ kplii eye wòna nya sia nya si Samuel gblɔ la va eme. 20Israel-dukɔ blibo la, tso Dan va se ɖe Beer-Seba, va nya be woɖo Samuel abe eƒe gbeƒãɖela ene. 21Aƒetɔ gaɖe eɖokui fia le Silo. Aƒetɔ ɖe eɖokui fia Samuel le afi sia to nya si wògblɔ nɛ la me.
EƲEGBE BIBLIA © The Bible Society of Togo, 2014.