San Marcos 14
14
U muk'yaj, u kimi y u ka' lik'i tu ka' kuxta
(14.1—16.20)
U katik u yoro' ti u chujko' a Jesús
(Mt. 26.1-5; Mt. 22.1-2; Jn. 11.45-53)
1Ka'p'e k'in ti u meta u k'ini a Pascua, bexi' aj pʌn a mʌnʌ' u ts'aki ti' u si't'i; y u t'ojio' a moko' ku meajo' yok'o u yatoch K'uj yete a ku kʌ'sa u t'ʌn K'uj a toj u ts'ibtamʌ a Moisés uchik tʌn u kʌxko' bik u chujko' a Jesús yete tus y ti' u kinsik. 2Mʌnʌ' ak chukik tuk'in tʌn u jʌno' ti muj lik'o ts'ikta a winiko'.
Jesús bʌka tia a ba' jabon a ki' u bok ix Betania
(Mt. 26.6-13; Jn. 12.1-8)
3Ti' yʌn Jesús ix u kʌjta Betania, ti' yʌn tu yatoch Simón a yʌnti' k'ak'i tu yok'o, tari ti' junturi' ch'upra, u tasmʌ perfume a bex a ne ko'o u bo'ri a u k'aba' alabastro, y tu bʌka yok'o u jo' a Jesús a kurukba yok'o pojche'. 4Yʌn jun yʌrʌ' a ti' yʌno', ka tu yao':
―¿Biken ta kʌx meta a lay a perfume? 5A je', ja' a kanik ka'chik ne ko'o u bo'ri trescientos y yete u bo'ri ka k'ʌnik ti'a wʌntik a mok mʌnʌ' u tak'in.
Ij chu'mpʌjo' u tsutsustiko' a ch'upra.
6Chen Jesús tu ya'a:
—Xure'x a kʌxmetke'x; ¿Biken ka kʌxmetik a je' ch'upra? Ti' ne tsoy ba' tu meta ten. 7Tu woro a mʌnʌ' u tak'in bi a wire'x tu woro k'in, y je'e a metke'x tsoy ba' ti lara u k'ini, chen a ten mʌnʌ' a woro iken ti'en. 8A je' tu meta a baij k'uchʌ' u muk' u metik, tuk'in ka tu bʌka a ba' jabon a ne ki' u bok a bex a ne ko'o u bo'ri yok'o ten, lʌji' tu toj meta tuku bin muken. 9Jach taj kin wei'k teche'x, tuku tsikbʌta' u jach tsoyi u t'ʌn K'uj ch'ik tu woro a lu'm, bexi' je'e u tsikbʌta baij tu meta a je' a ch'upra ti' u k'asa'.
Judas ku k'ubik Jesús
(Mt. 26.14-16; Mt. 23.3-6)
10Lʌiti' u apóstol a Jesús, a u k'aba' Judas Iscariote, bini yok'o u t'ojio' a moko' ku meajo' yok'o u yatoch K'uj ti' u k'ubik a Jesús. 11A tio' ka tu yuo' jach tsoyji u yoro', la'jen tu yao' je' u bo'ta' tu ku k'uba Jesús. Y tu jach ts'a u t'ʌn a Judas, u kʌxtik bik u ts'ek ti'o'.
U ts'ok u jʌnʌ a Jesús yete u kʌ'sa winik
(Mt. 26.17-29; Mt. 22.7-23; Jn. 13.21-30; Mt. 11.23-26)
12U yʌj chuni u k'ini kaj chu'mpʌ u jʌno' u yo'cho' a judíos a u k'ini a Pascua, a tuk'in ku kinsik aj choj me', taro' u kʌ'sa winik a Jesús u k'ato' ti' Jesús, tu yao':
—¿Tuba a k'at in metko' a o'chi ti a lʌji' u k'ini a Pascua?
13Jesús tu tuchi'ta kato' u kʌ'sa winik y tu ya'tio':
—Ka bij oke'x ix u kʌjta, je' a wike'x junturi' xi'ra, kuchmʌ u chuji u yo'ch ja' t'ure'x u pach. 14Y tu ku yoko a'e ti' u t'oji a nʌj: A wʌjkʌ'si tu ya'a: ¿Ix a watoch to bay ka bin a mʌjʌnte ti' ʌk jʌno' yete in kʌ'sa winiko' ti' u k'ini a Pascua? 15Y ku bin ye'sik teche'x junxot' u yatoch, toj ki utskintʌ'; tita ka metke'x tu woro ba'.
16Bino' u kʌ'sa winiko' Jesús, kaj tu yiro', a bex Jesús tu ya'tio', ka chu'mpʌ u metko' a o'chi ti' u k'ini a Pascua.
17Kaj ak'ʌ'chʌ tari Jesús yete a doce u apóstoles. 18Ka kurukbo' yok'o pojche' tʌn u jʌno' Jesús tu ya'tio': Jach taj kin wei'k teche'x, tiʌ junturi' yok'o teche'x bi u k'uben.
19Y nej tu tukrubʌjo', y chu'mpʌjo' jujuntu jujuntu u k'atko' ti' Jesús:
—¿Ts'uri yʌ ten? Y juntu ku k'atik:
—¿Ts'uri yʌ ten?
20Jesús tu nuka tio':
—Lʌji' a tiʌ yok'o a doce apóstoles, a mok ket tu but'a u k'ʌ' yok'o a lʌk tu ki jʌnʌ, lʌji' a lay a ku bin u k'uben. 21U t'ʌn a K'uj ku ki ei'k baij ku bin meta' ti'u Ti'a Xi'ra, chen ¡jach yaj ba' ku bin u yue a lay a xi'ra a ku bin u k'ube u Ti'a Xi'ra! Más tsoy ti' wo mo' naj sijik ka'chik.
22Tʌn u jʌno', Jesús tu chuka' jump'eri' pʌn y tu ya'a, baij tech K'uj, pachi tu p'uya tio' u kʌ'sa winik, y tu ya'a:
—Chuke'x y jʌnte'x, a je' lʌji' in bʌk'e.
23Pachi tu mʌcha jump'eri' luch yete u yʌki a menʌ' u ya'ri nukuch ts'us (uva) y tu ya'a: baij tech K'uj, pachi tu mʌsa ti u kʌ'sa winik y tu woro tu laj uk'o'.
24Y tu ya'a: A je' lʌji' in k'ik'e a ti' u ts'ek tumen u kataor, a je' a k'ik'e lʌji' ti u sa'sa' ne ya'p u si'pi a winik. 25Jach taj kin wei'k teche'x, mʌnʌ' a yʌn ka uk'ik u k'ʌ' u wich nukuch ts'us hasta u k'ini ki bin u wuk'e u tumen u ya'ri ts'us yok'o tu ku wesintik K'uj a tiʌ kʌ'.
Jesús ku yei'k ti a Pedro bik ku bin u ya'e mu' k'omʌ
(Mt. 26.30-35; Mt. 22.31-34; Jn. 13.36-38)
26Kaj ts'o'k u k'ʌyko' jump'eri' himno, jok'o ij bino' ix u witsi Olivos. 27Jesús tu ya'tio': Tu woro a teche'x bin a p'ʌtene'x a beje' ak'bi, bex ts'ibʌ' yok'o u t'ʌn K'uj ku yei'k: Bin in kinse a pastor, y uj me' bi u laj k'itubʌj. 28Chen ka lik'ken tin ka' kuxta, bi in ka much'e'x ix Galilea.
29Pedro tu ya'a:
―Tak tu woro ku laj p'ʌtikech, a ten mʌnʌ'.
30Jesús tu ya'ti' Pedro: —Jach toj tu jay kin wei'k tech, mo' toj k'ainʌ'k u ka wʌts' aj t'er beje' ak'bi, tech oxp'e wʌts' ka bin a wei'k ma' a k'ʌ'omen.
31Chen a Pedro tu p'isubʌj u yei'k: tak yʌnti' in kimi yete tech, mʌnʌ' in wei'k mi' in k'o'muech. Bexi' tu yao' tu woro a yʌno' u kʌ'sa winik.
Jesús ku t'ʌnik K'uj ix Getsemaní
(Mt. 26.36-46; Mt. 22.39-46)
32Pachi bini Jesús yete u kʌ'sa winiko' ix jump'e lu'm u k'aba' Getsemaní, ka tu ya'ti' u kʌ'sa winiko':
―Kurene'x wai, y ten binika' in t'ʌne K'uj.
33Tu pʌya tu pach a Pedro yete Jacobo yete Juan, y jach chu'mpʌ u ne tukrik u bʌj y yui'k u bʌj ne yaj u pixʌn. 34Kaj u ya'tio':
―Ne mo' tsoy in wor, ki wui'k in bʌj binikaj kimi, p'atene'x way y muk'te'x wene.
35Bini Jesús más tataj y tu xonkitubʌj hasta emi u chi' pʌm ix lu'm y tu t'ʌna K'uj, bex tu ya'a: In Tet, wa yʌn bik ma' cheik in mʌsik a je' a ba' a ki bin in mʌse.
36Jesús tʌn yei'k bex:
«In Tetech K'uj, tech k'ucha' a muk' a laj metik tu woro a ba', luk'se a je' in muk'yaj a ku bin tar ten, chen ma' metik a baiki in k'at a ten, lʌji' a metik a to'o a tech a k'at.»
37Pachi suti tuj p'atij a oxto' u kʌ'sa winik, y tu yira wenukao', tu ya'a ti a Pedro: ¿Tʌn a wene'x? ¿Mix taj naj muk'te'x a wene'x jump'e hora yete ten? 38Muk'te'x a wene'x y t'ʌnex K'uj, ti' u chixta a muk'e'x ti a muk'tik a baij ku tar ti' teche'x. A pixane'x u k'at, chen a bʌk'e mu chich u muk'.
39Jesús ka' bini u ka t'ʌne K'uj, tu ka a'a u lʌiti' a ba'. 40Kaj ka sut Jesús tuj p'atij a oxto' u kʌ'sa winik, tu ka' iraj wenukao', tu nej tak u weno' y mu' yeo' bik u nujko'. 41Pachi y yox wʌts' ka' sut tu tio' a u kʌ'sa winik y tu ya'a tio':
—¿Xuy a wene'x y a je'sik a bʌje'x? ¡Lik'ene'x! Beje' yaj k'uchi u k'ini a ku bin k'uba' u Ti'a Xi'ra ti a mok ne yʌn u k'ebo'. 42Lik'ene'x, ko'xe'x, tʌn u xok'o a mok ku bin u k'uben.
Kaj chuka' a Jesús
(Mt. 26.47-56; Lc. 22.47-53; Jn. 18.2-11)
43Tʌn u yʌj t'ʌn a Jesús, tari a Judas a lʌji' laj ket xaka a yʌn doce u apóstoles a Jesús u yet tar yete ne pim winik yete u maska' y che', tuchibi ti' u t'ojio' a moko' ku meajo' yok'o u yatoch K'uj y yete a mok jak'ʌ u kuch ti' u winik a judíos. 44A Judas a mok ku bin u k'ubik a Jesús, tu toj ki a'a tio' a winik bik ku bin u k'oo'tik mok ku bin chuko', tu ya'a tio': A mok a wirke'x in ts'uts'ik u p'uk', lʌji' kaj chujke'x. 45Judas xok'i ti Jesús y tu ya'ti':
—¡Wʌjkʌ'si, Wʌjkʌ'si!
Y tu ts'u'ts'a u p'uk'. 46Lʌji' ka tu pura u k'ʌo' u chuko' a Jesús.
47Chen junturi' a mok u yet mʌn a Jesús, tu jara u maska' y tu xat'a u xikin junturi' u k'ʌni' a u jach t'oji a mok ku meaj yok'o u yatoch K'uj. 48Jesús tu k'ata tio':
—¿Biken tare'x a chuken yete a maska' y yete a che' p'is bex a chujke'x a ku yakra ba'? 49Tu woro k'in ki kuta ti kʌ'sa ix u yaj yatoch K'uj y maj chukene'x, tu woro a je' ba' ku mʌn lʌji' ti' u metchʌ a bex ts'ibʌ' yok'o u t'ʌn K'uj.
50Tu woro u kʌ'sa winik a Jesús puts'o' y tu p'ʌto' a Jesús.
A chijʌntʌ aj puts'i
51Junturi' chijʌntʌ xi'ra tʌn u t'urik a Jesús jai' tap'ʌ' yete tep' y chuka. 52Chen a ti tu p'ʌta u tep', ij puts'i mix k'ʌs u nok'.
Jesús ix u jach ts'urio' u winiko' judío
(Mt. 26.57-68; Lc. 22.54-55,63-71; Jn. 18.12-14,19-24)
53A mok tu chuko' a Jesús, tu biso' a Jesús ix u yatoch u jach t'oji a mok ku meaj yok'o u yatoch K'uj tu laj much'a u bʌjo' u t'ojio' a moko' ku meajo' yok'o u yatoch K'uj, bexi' a mok ku kʌ'sa u t'ʌn K'uj a toj u ts'ibtamʌ a Moisés uchik y yete a jak'ʌ u kucho' ti' u winik a judíos. 54Chen Pedro tʌn t'urik u pach Jesús hasta kaj k'uchi yok'o u xur u palacio a u jach t'oji a mok ku meaj yok'o u yatoch K'uj. Tij kuraji tu k'ich tu t'ʌbʌ' a k'ak' yete a ba'kʌi a mok lʌji' kʌnʌntik u yaj yatoch K'uj.
55U t'ojio' a moko' ku meajo' yok'o u yatoch K'uj yete a nuxio' u winik a judíos y tu woro a mok u much'ik u bojo' yok'o a nʌj, tʌn kʌxko' bik u paytiko' a Jesús, ti li'sa' t'ʌn u kinsa' y mo' tu yiro' ba' ti u pʌk'ik u pach a Jesús. 56Tak ne pim tu pʌyo' u bojo' ti u tus ei'ko' ba' ti Jesús, chen toj mo' ket u yoro' a baij ku yei'ko'. 57Ya u ts'ok taro' xi'ra tiu yei'k ba' tiu pʌk'ik u pach a Jesús, ku yei'ko':
58―Teno' ti wu'a u yei'k a je' a xi'ra bex: Ten je'e in laj jubik a u yatoch K'uj, y oxp'e k'in kin ka laj metik y mo' winik tu meta.
59Chen mʌnʌ' u yiriko' bik u pʌk'ik u pach.
60Y lik'i ch'ikta a u jach t'oji a mok ku meaj yok'o u yatoch K'uj, y tu k'ata ti Jesús: ¿Biken mix ba' ka nukik? ¿Baiki a je' a ba' ku ya'ba tech?
61Chen a Jesús mu naj nuka, u jach t'oji a mok ku meaj yok'o u yatoch K'uj, tu k'ata ti' a Jesús: ¿Wa tech lʌji' a Cristo a u Ti'a K'uj a tu woro ku k'ujintiko'?
62Jesús tu nuka: Tenen, bi a wire'x u Ti'a Xi'ra kurukba yok'o u xax a K'uj a ne chich u muk' tʌn u tar yok'o u muyaj ix kʌ'.
63U jach t'oji a mok ku meaj yok'o u yatoch K'uj tu jʌta u nok' tiu ye'sik ne mo tsoy tu yua baij tu ya'a Jesús y tu ya'a: ¿Ba'wi kaj kʌxtik u jer mok ku yei'k baij mo' tsoy tu meta a je' xi'ra? 64Teche'x ta wue'x baiki mo' tsoy ba' tu ya'a ti K'uj. ¿Bik a wike'x teche'x?
Tu woro tu kato' u yoro' lʌji' yʌn u si'pi y yʌnti' u kimi.
65Y tax jujuntu chu'mpʌjo' u tup'ik u wich a Jesús, u jʌts'ik y tax jujuntu tu tap'a u wich a Jesús, y tu yao' ti':
—A'e mok tu jʌts'ech.
Y a ba'kʌi a ku kʌnʌntik u ya yatoch K'uj tu jʌts'o' ich u wich.
Pedro ku yei'k mu' k'omʌ moki Jesús
(Mt. 26.69-75; Lc. 22.55-62; Jn. 18.15-18,25-27)
66Kurukba Pedro tu xur a palacio, xok'i ti' junturi' ch'upra a ku k'ʌnik u jach t'oji a mok ku meaj yok'o u yatoch K'uj. 67Ka tu yira a Pedro tʌn u k'ich, a lay a ch'upra tu ya'a ti a Pedro: Tech bexi' a wet mʌn a Jesús a lʌji' u winki Nazaret.
68Chen a Pedro tu ya'a:
—Mi' in k'o'mo' a Jesús y mix in we baij ka wei'k tech.
Pachi bini yok'o u jor u nʌji, y lʌji' kaj k'ainʌ aj t'er. 69Tuba a ch'upra tu ka iraj y tu ya'a ti a mok nikʌ' tita:
A je' a xi'ra bexi' u yet mʌn a Jesús.
70Chen a Pedro tu ka a'a mo jach to jai' y jer mo' sʌmʌk a mok tio' tita tu ka' ao' ti a Pedro: A tech jach lʌjiech a mok u yet mʌn a Jesús y tu bexi' tech lʌjiech u winki Galilea y a tech bexi' ka a t'ʌn bex ku t'ʌno' tio'.
71Pedro chu'mpʌ u más chich ei'k:
—¡Ten mi' k'o'mʌ a je' a xi'ra a mok ka wei'k ten!.
72Aj t'er k'ainʌ ka wʌts', chen a Pedro lʌji' kaj k'aj ti' u t'ʌn a Jesús a ba' tu ya'a ti: «Mo' te' k'ainʌ'k u ka' wʌts' aj t'er, tech ka bin a wae ma' k'o'muen oxp'e wʌts'.» Y lʌji' kaj u tukrubʌj yok'o a je' ij chu'mpʌ u yok'o.
اکنون انتخاب شده:
San Marcos 14: PLacNaha
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Sociedad Biblica de México AC
