S. Juan 8
8
1Y a Jesús bini ix u wits'i Olivos 2Y kaj sasi a Jesús ka' suti ix u yatoch K'uj, y tu woro u winki u kʌjta laj tari tu tiʌ, y ti' kurukba, chu'mpʌ u kʌ'sa.
3Y a ku kʌ'sko' u t'ʌn K'uj a toj u ts'ibtamʌ a Moisés uchik yete u winiko' a judíos a ku ya'batio' fariseos, tu taso' tu chumuki junturi' ch'upra a to'o i'ri tʌn u tusik u lak' yete u jer xi'ra. 4Y tu ya'tio' wʌjkʌ'si:
—A je' a ch'upra i'ri tʌn u tusik u lak' yete u jer xi'ra. 5Yok'o u t'ʌn K'uj a u ts'ibtamʌ a Moisés uchik, tu tuchi'ta u ch'ine tunich ti' a bex a layo' a ch'upra. Tech ¿Bik ka wei'k? 6A layo' ku k'ato' ti, tu u kʌxtik bik u paytiko'. Chen Jesús tu p'uxubʌ, y chu'mpʌ u ts'ib yok'o lu'm yete u tuch'u'. 7Y tu muj ts'oko u k'ata ti' a Jesús, lik'i y tu ya'a tio':
—A mok mʌnʌ' u k'ebʌn yoko teche'x, lʌji' u yʌ ch'ine tunich ti a ch'upra.
8Y tu ka' p'uxubʌ y ka' ts'ibnʌ yok'o a lu'm. 9Ka tu yuo' a Jesús, tu woro laj chu'mpʌ u bino', lʌji' yʌ bino' a más t'ojo' y jari a Jesús p'ati yete a ch'upra. 10Y Jesús tu ka tajkitubʌj, y mix mok tu yira, toj ja'ri' a ch'upra, y tu ya'ti':
—Ch'upra, ¿tu laj bino' a ku pʌk'ik a pach? ¿Mix mok tu ch'ina tunich tech?
11A ch'upra tu nuka:
—Mix mok Ts'uri.
Jesús tu ya'a:
—Mix ten ki ts'ek a bo'tik a si'pi, jay xen, y ya ma' kʌxtik a k'ebʌn.
Jesús lʌji' u kip'i a lu'm
12Ka' t'ʌnʌ Jesús, tu ya'a:
—Ten Lʌjien u sasi a lu'm, a mok ku t'urken, binukaj ts'abati' u sasi a ku ts'ek u kuxta y mʌnʌ' u yʌ mʌn yok'o ak'ʌ'. 13U winiko' a judíos a ku ya'batio' fariseos tu ya'a ti':
—Tech ka wei'k tsoy ba' ti a bʌj, a tsoy ba' ka wei'k ti a bʌj mu jach to jʌy.
14Jesús tu nuka y tu ya'a:
—Tak ti' ten ki wei'k tsoy ba' ti' in bʌj, a ten ba' ki wei'k jach taj, a ten y we tuba in tar y tu ki bin, a tech ma' we tuba in tar y ma' we tuba ki bin. 15A teche'x ka wei'k wo taj o mo' taj ku metik a boje'x bex u tuku a winik, chen ten mo' taren tin in wei'k wo taj o mo' taj ku metik a winik. 16Wa ki wei'k ba' to' u taji, jach taj ki bin in wae, mo' ti juna kin wei'k, yete in Tet kin wei'k a mok lʌji' tu tuchi'ten. 17Y yok'o u t'ʌn K'uj a u ts'ibtamʌ a Moisés uchik ti' teche'x ku yei'k, wa ka'to' lʌiti' ku yei'k ba' ti u bojo', a lay jach to jʌy u t'ʌno'. 18A ten in bʌje kin tsikbʌtik in bʌj, y in Tet a mok lʌji' tu tuchi'ten lʌji' ku tsikbʌtiken.
19A layo' tu k'ato' ti Jesús:
—¿To' tu tiʌ a Tet?
Jesús tu nuka tio':
—A teche'x ma' k'o'mene'x, mix in Tet, wa k'o'mene'x bexi' in Tet ja' k'o'otke'x.
20Jesús tu tsikbʌta a je' a ba' yok'o u yatoch K'uj tuba tiʌ u kuchi tuku li'siko' u tak'in K'uj, che mix mok tu chuka tu mo' k'uchuk u k'ini ti'.
A tu ki bin ten a teche'x mo' bik a tare'x
21Jesús tu ka' a'a tio':
—Ten kin bin y binaka' a kʌxtene'x, chen binakaj kime'x ix k'ebʌne'x, a tu kin bin ten teche'x mo' bik a tare'x.
22Y a judíos tu yao':
—¿Yʌn wa tʌn u tukrik u kinsik u bʌj, ben ku yei'k mo' bik ak bin tuku bin?
23Jesús tu ya'tio':
—A teche'x way yʌne'x kaba chen ten ti' in tar ix kʌ', a teche'x lʌjie'x u winki way yok'o a lu'm y ten mo' u winiken way a lu'm. 24Bein ti wa'te'x binakaj kime'x ix a k'ebʌne'x, wa maj ch'eike'x in t'ʌn tu ki wei'k a Ten Lʌjien.
25Kaj k'ata ti:
—¿Mokech a tech?
Jesús tu nuka:
—¿Biken yʌnti' u nukikte'x? 26Ne ya'p ba' yʌn wei'k yok'o te'x yok'o tu woro a mo tsoy ba' ka metik, chen a mok tu tuchi'ten taj ba' ku yei'k, y ten, a ba' kin wei'k yok'o lu'm, lʌji' ki wei'k bexi' a bex ti wu yei'k.
27Chen a winiko' mo' tu ki' uo' bay ku yei'k a Jesús, lʌji' u Tet tʌn u yei'k. 28Bein Jesús tu ya'tio':
—Tuk'in ka' li'se'x u Ti'a Xi'ra, bin a jach iren Tenen y mix ba' ki metik in bʌji' a baij in k'at a ten, toj ja'ri' a ba' tu kʌ'sen in Tet bexi' kin wei'k te'x. 29A mok tu tuchi'ten tiʌ tin wiknʌ, muj p'ʌtiken ti juni' in Tet, a tu kin woro metik a ba', woro tsoy u yirik.
30Y tʌn u yei'k a je' a ba', ne pim tu ch'a u t'ʌn.
U taji a ba' lʌji' ku siptike'x
31Tu ya'a Jesús ti' a judíos a tu ch'a u t'ʌn:
—Wa teche'x ka jach metke'x in t'ʌn, ka jach bin a meta bʌje'x in jach kʌ'sa winiko'. 32Bi a k'o'ote'x u taji a ba' y u taji a ba' ku bin u siptike'x.
33Tu nuko' ti a Jesús:
—A teno' lʌji' u chuni a Abraham, mix k'ʌs chukakeno' a teno', ¿Bik taba a ka wei'k tech bin u sipto'?
34Jesús tu nuka:
—Jach tu jay ki wei'k teche'x, a mok ku kʌxtik u k'ebʌn lʌji' chukʌ' ti' u k'ebʌn. 35A chukʌ' ti' u k'ʌna' muj p'ata yok'o nʌj tu woro k'in, chen a to'o lʌji' u ti'a je'e u p'ata tu woro k'in. 36Bein wa u Ti'a K'uj ku siptike'x, a teche'x jach tu jay sipte'x. 37In we a te'x lʌjie'x u chunire'x a Abraham; chen poch a kinsikene'x, tu ma' k'at a ch'eike'x in t'ʌn. 38Ten kin wei'k a ba' ku ye'sik in Tet, bexi' teche'x ka metke'x a ba' ku ye'sik a tet.
Teche'x lʌji' a tete'x a kisin
39A tio' tu nuko' y tu yao':
—A ten in teto' lʌji' a Abraham
A Jesús tu nuka:
—Wo u jach ti'are'x a Abraham, ja' a metke'x a ba' tu meta a Abraham. 40Chen tak ti wa'a te'x lʌji' K'uj tu ye'sa ten a ba' ki wei'k te'x, a teche'x poch a kinsikene'x. ¡A Abraham mo' tu meta bex! 41A teche'x ka metik a bex ku metik a tet.
Tio' tu yao':
—A to'o mo' u jer ak tet, toj jari junturi' in teto' y lʌji' K'uj.
42Jesús tu nuka:
—Wa K'uj jach a lʌji' tet, ja' jach yakuntiken; a ten ti in tar yok'o K'uj y way yʌnen. Mo' ti juni' taren, K'uj tu tuchi'ten. 43¿Biken maj ki uik' in tʌn baij ki wei'k? Tu toj ma' k'at a wui'k in t'ʌn. 44A teche'x lʌji' a tete'x a kisin, ka metke'x a bay kin u k'at. A kisin toj lik' lʌji' u chuni ku kinsik mok, tu woro a ba' ku metik mo' taj. Tuk'in ku tus toj lik' bex a ti' woro tus yʌnti', toj lʌji' u winki a tus. 45Chen a ten ki wei'k u taji a ba', a teche'x maj ch'eike'x in t'ʌn. 46¿Moki yok'o teche'x je'e u ye'sik wa yʌn in k'ebʌn? Wa jach taj kin wei'k ¿Biken maj ch'eike'x in t'ʌn? 47A lʌji' yʌni ti' K'uj, ku yui'k u t'ʌn K'uj, chen a teche'x mo' lʌji' yʌnie'x ti K'uj bein mo' poch a wui'ke'x.
Toj lik' u chuni ti'ʌn a Cristo
48Tu nuko' a judíos, tu yao':
—¿Mo' taj kin wei'ko' a tech lʌjiech u winki Samaria y yʌn tech kisin?
49Tu nuka Jesús:
—Ten mʌnʌ' ten kisin, a baij ki metik to jay ti in yakuntik in Tet, y ku ka sut a teche'x mix otsi a wikene'x. 50A ten mij kʌxtik ti' u tsoy ta u yiken a winik, yʌn mok ku kʌxtik y lʌji' ku yei'k o taj. 51Jach to jai', jach to jai' kin wei'k, a mok ku ki uik' in t'ʌn, mʌnʌ' u kimi.
52A judíos tu yao':
—A beje' ya tin wiro' jach yʌn kisin tech, a Abraham kimi y bexi' a profetas, y tech ka wei'k: “A mok ku jach uik' in t'ʌn mix ku bij kimi”. 53¿Yʌn wa tech jach más sukunbiech ti' in tet a Abraham a kimen? ¡A profetas laj kimo' ¿Mokech a tech a wui'k a bʌj?
54Jesús tu nuka:
—Wa in bʌji' ten kin wei'k tsoy ba' ti' in bʌj, a lay toj mix ba', a mok ku yei'k tsoy ba' ti' ten, lʌji' in Tet, a to'o lʌji' ka wei'ke'x lʌji' a K'uje'x. 55A teche'x ma' k'o'moe'x, a ten in k'o'mʌ, wa ki wei'k mi' k'o'mʌ kin waya bex a winik a ne ku tus bex a teche'x. Chen a ten jach in k'o'mʌ y ki jach uik' u t'ʌn 56A Abraham jach u yʌj chuni a tete'x nej tsoy u yor tuk'in u yue ku bin u yire u k'ini u tar, y tu yira y nej tsoyji u yor. 57Ka tu yao' a judíos:
—A tech mʌnʌ' cincuenta yaxk'in ¿y ka wei'k ta wira a Abraham?
58Jesús tu nuka:
—Jach tu jai' ki wei'k teche'x tuk'in tiʌ Abraham toj lik' ti'en Ten.
59Tu ch'ao' tunich ti' u ch'iniko' ti' a Jesús, chen Jesús tu takubʌj y jok'i yok'o u nʌji K'uj, tij mʌni tu chumuki tu ne pim yʌn a winiko', ij bini
اکنون انتخاب شده:
S. Juan 8: PLacNaha
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Sociedad Biblica de México AC
