S. Juan 21
21
A Jesús ku ye'sik u bʌj ti' siete u kʌ'sa winik
1Pachi, Jesús tu ka' e'sa u bʌj ti' u kʌ'sa winik, tu xur a petai a Tiberias. Y bex mʌni: 2Laj ket tio' a Simón Pedro, Tomás a to'o ku ya'ba ti' Gemelo, a Natanael a to'o ti' u tar ix Caná ti' u lu'mi Galilea, bexi' tio' u ti'o' a Zebedeo y u jer kato' u kʌ'sa winik a Jesús. 3Pedro tu ya'tio':
—Binika' tin luts kʌy.
Y tio' tu nuko':
—Bexi' to' kin bino' yete tech.
Lʌji' kaj bino' ij nʌ'ko' yok'o chem; chen a lay a ak'ʌ' mix tu naj lutso'. 4Tuk'in tʌn u chu'mpʌ u sasta, a Jesús tu ye'sa u bʌj tu xur a peta', chen u kʌ'sa winiko' mu' yeo' wo lʌji'. 5A Jesús tu k'ata tio':
—Boje'x, ¿yʌn ta lutse'x kay?
Tio' tu nuko':
—Mʌnʌ'.
6Jesús tu ya'a:
—Pure'x a ba'y a tuku chuka kʌy tʌjʌn ti' a chem, y je' a lutske'x.
Bex tu meto', y pachi moj k'uchu u muk'o u jarko' a bay tu ne jach k'ux ne ya'p a kʌy. 7A u kʌ'sa winik a Jesús a to'o jach k'ux otsi u yik, tu ya'ti' a Pedro:
—¡Lʌji' ak Ts'uri!
Ka tu yua a Simón Pedro, lʌji' ak ts'uri, tu tʌka u nok' (a to'o tu jita ti' u luts kʌy), y tu pura u bʌj yok'o ja'. 8A yʌno' u kʌ'sa winiko' k'ucho' to' u xur a peta' yete a chem y tʌn u jitko' a bay jach ne ya'p kʌy yʌnti', u nʌchi ti' u k'ucho' tu xur yʌn ti' cien metros. 9Kaj emo' yok'o u xur a peta', tu yiro' t'ʌbʌ' u chuki k'ak' y ti' t'ʌrʌ' jump'e kʌy y jump'e pʌn. 10Jesús tu ya'tio':
—Tase mo' ne ya'p a kʌy a tʌntʌ a lutse'x.
11A Simón Pedro nʌ'ki yok'o chem y tu jara tu xur a peta' a bay y yʌn ciento cincuenta y tres kʌy y woro ne nuk; y tak ne ya'p, a bay moj jati. 12Jesús tu ya'tio':
—Ko'tene'x ta jʌne'x.
Mix junturi' u kʌ'sa winik tu tunta u k'atik ti' a Jesús moki, tu toj u yeo' lʌji' u Ts'uri. 13Pachi a Jesús xok'i tio', tu mʌcha aj pʌn y tu ts'atio' y bexi' yete a kʌy. 14Lʌji' u yox wʌts' a Jesús u ye'sik u bʌj ti u kʌ'sa winiko' tuk'in kaj ka' lik'i tu kuxta.
U t'ʌn a Jesús ti' a Simón Pedro
15Kaj ts'ok u jʌno', Jesús tu k'ata ti' a Simón Pedro:
—Simón, u ti'a Juan, ¿más ne otsi a wiriken ten?
A Pedro tu nuka:
—Bex ts'uri, tech a we ne otsi wirkech.
Jesús tu ya'a:
—Kʌnʌnte in wʌrʌk' meo'.
16Tu ka' k'ata ti':
—Simón, u tia' Juan, ¿otsi a wiken?
—Bex Ts'uri, tech a we ne otsi wirkech.
Jesús tu ya'a:
—Kʌnʌnte in wʌrʌk' meo'.
17Tu ka' k'ata ti' u yox wʌts':
—Simón, u ti'a Juan, ¿otsi a wiken?
A Pedro tu ne tukrubʌj tuj k'ata ti' ox wʌts' wa otsi u yik a Jesús, chen ti' tu nuka:
—Ts'uri, tech a we tu woro ba': Tech a we jach otsi in wirkech.
Jesús tu ya'ti':
—Kʌnʌnte in wʌrʌk' meo'. 18Jach taj kin wei'k tech, a tuk'in chijʌntech, ka ki' tokik a nok' a bʌji' y ka bin tuba k'at, chen tuk'in ka bij ch'ijʌnchʌ, ka bin a tich'e a k'ʌ' y u jer ku bin u tʌke a nok', y ku bin u bisech tuba ma' k'at a bin.
19Ka tu ya'a Jesús bex, tʌn u yei'k bij ku bij kimi Pedro y tuku bij kimi ku bin u ye'se jach ne tsoy K'uj. Pachi tu ya'a:
—¡T'u'ren!
U kʌ'sa winik a Jesús a to'o ne jach otsi u yik
20Ka tu suta u wich a Pedro, tu yira tʌn u tar tu pach u kʌ'sa winik a Jesús a to'o a Jesús ne otsi u yik, a u bʌji' aj chari tu xax a Jesús tuk'in kaj jʌno' tu woro', a mok bexi' tu k'ata ti a Jesús: «Ts'uri, ¿mok ku bin u k'ubech?» 21Tuk'in a Pedro tu yira tu k'ata ti' a Jesús:
—Ts'uri, y a lay ¿Baiki ku bij metchʌ ti'?
22A Jesús tu nuka ti':
—Wo in k'at u p'ata way tura in ka sut, ¿ba'wi tech? Toj ja'ri' tech t'u'ren.
23La'jen u kʌ'sa winik a Jesús t'ʌn u jumintiko', a lay u kʌ'sa winik a Jesús a to'o ne jach otsi u yik mʌnʌ' u kimi. Chen a Jesús muj ya'a mʌnʌ' u kimi. A ti' tu ya'a: «Wo in k'at u p'ata way tura in ka sut, ¿ba'wi tech, tech?»
24A je' lʌji' u bʌji' u kʌ'sa winik a Jesús a ku tsikbʌtik a je' a ba' y bexi' lʌji' tu ts'ibta. Y ak ej jach tu jay ku yei'k.
25A Jesús tu meta u jer ne ya'p ba'; y jach k'ux ya'p, wo ku ts'ibta jujump'e jujump'e a ba' tu meta, kin tukrik mʌnʌ' u laj oko yok'o tu woro a lu'm tu woro a ju'un wo ku ts'ibta'. Amén
اکنون انتخاب شده:
S. Juan 21: PLacNaha
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Sociedad Biblica de México AC
