1 തിമത്തോസ് 4
4
ണേരല്ലാത്താദ്ണ പഡ്സ്റ ബാത്ത്യല
1ഇനി ബര കാലാത്തിലി പഗ്ദി ആള്ഗ അവാര്ക്ക് ഏസോഡെ ഇര്ക്ക ണമ്പിക്കേന തള്ള്യെക്കി പൊയ്യി സൊല്ലി സദിക്ക ണിഗാല്ഗാദ് സൊല്ലുണാമ്, സെയിത്ത്യാ് പഡ്സ്റ കാര്യഗണാമ് ണമ്പുവാര് എന്ത് സാമിണിഗാല് സൊക്കാന സൊല്ലുദ്. 2ബക്ദിക്കാറാരായി ണഡിക്ക ആള്ഗാത്തെ ഇച്ച്ള കാര്യഗ പജാത്ത്റാദ്. ഗൊഡുപ്പ്ണ കാസി ഉരുവുക്ക് ബെത്ത് പൊള്ളിസിനാല്മ് ഒന്റുമ് തെര്യാത്ത പാസെ അവാര് മനേസ്സ്മ് ണേര് ഏദ് എന്തൊ, പൊയ്യി ഏദ് എന്തൊ എന്ത് തെര്യാത്ത അളാവുക്ക് കല്ല് കെ്ട്ടി എക്കിറ്റ്. 3അവാര് ആള്ഗ പെ്ണ്ണ് എ്ഡ്ക്കാദ് ആഗ എന്ത്മ്, തിങ്ക ജാദിഗളിലി ലേസ ജാദിഗണ തിങ്കാക്കില്ലെ എന്ത്മ് പഡ്സ്റാര്. ആന സത്ത്യണ തെരിന്തിര്ക്ക ഏസുക്കാറാര്ക്ക് ണണ്ണി സൊല്ലി തിന്ന്യ സാമി തിങ്ക ജാദിഗണ ദ്ട്ടിസി ബെത്തിര്ക്കാ്. 4സാമി ദ്ട്ടിസിനാദ് എല്ലാമെ ണല്ലാദ്ത്തെ. ആന ണമ്മ സാമിക്ക് ണണ്ണി സൊല്ലി ഏറ്റ്കൊണ്ട ഒന്റുണാമ് എക്ക്യ തേവില്ലെ. 5എന്ത്ക്കെന്റ സാമി സൊല്ലുസുലാക്കാത്തിലി സൊല്ലിര്ക്കാദ്ണാലേമ്, ണമ്മ പരേസ്റാദ്ണാലേമ് ഇദെല്ല സാമിക്ക് മെച്ച്പ്ഡിക്കാദായി തീര്ദ്.
ക്റ്സ്ത്ത് ഏസുദ് ണല്ല ബേലെക്കാറാ്
6ഈ കാര്യഗണെല്ല ഏസുക്കാറാര്ക്ക് ണീ പഡിസി കൊഡുത്ത ണീ ക്റ്സ്ത്ത് ഏസുക്ക് ണല്ല ബേലെക്കാറാ് ആവെ. ഇച്ചെ സെയ്ദ ണീ കെ്ട്ട്പട്ട് ണഡാക്ക സാമി സൊല്ലുസുലാക്കാത്തിലിമ്, ണമ്പിക്കേന പറ്റി സൊല്ലുറ ണേര്മാന ണായഗാത്തിലിമ് ണീ ഗട്ടിക്കാറാനാവെ. 7സാമ്യോഡെ ഉറാവു ബെത്ത് ണഡാക്ക്യ ഉവഗാരപഡാത്ത ണേരല്ലാത്ത കദെഗ ഒന്റുണാമ് ണീ കാദ്ക്ക് ഇക്കാദെ. അദ്ക്ക് ബഡ്ഡി സാമി ആസെപഡി പെ്ളേക്ക്യ ഉവഗാരപഡ്റ കാര്യഗണ ണീ സെയ്ദ് പളാഗികൊണ്ടെ ഇര്ക്കുഡൊ. 8സരിഗലാക്ക് മുജുവു കെ്ഡേക്ക എന്തൊറ്റൊന്റ് സെയ്ദ സരിഗലാക്ക് ഒരു ലേസ ഉവഗാരപഡു. ആന സാമി ആസെപഡി പെ്ളേക്ക്യ ഉവഗാരപഡ്റ കാര്യഗ ണീ സെയ്ദ് പളാഗികൊണ്ടെ ഇര്ക്കാദ് എല്ല ദിന്സിലിമ് ഉവഗാരപഡു. അദ് ഇപ്പേത്ത പെ്ളേപ്പ്ക്ക്മ് ഇനി ബര്യ പോര പെ്ളേപ്പ്ക്ക്മ് ഉവഗാരപഡു.
9ണാന് സൊന്ന ഈ സൊല്ലു ണേര്മ് ണമ്പ്യാമ് മുഡിര ഒരു സൊല്ലുത്തെ. 10ഇദ്ക്ക് ബേ്ണ്ടിത്തെ എമ്മ ഉജുറുള്ള സാമ്യോഡെ ണെഞ്ചഡെ ബെത്ത് ബുദ്ദിമുട്ടി ബേലെ സെയ്രാദ്. അയ്യി സാമി എല്ല ആള്ഗണ ദെങ്ക്സ്റവാന്മ് മുക്ക്യമായി തനാണ ണമ്പ്റവാര്ണ ദെങ്ക്സ്റവാന്മ്ത്തെ.
11ഈ കാര്യഗണെല്ല ണീ അവാര്ക്ക് പഡിസി കൊഡുത്ത് അദ്ണ അദേപാസെ സെയ്യ അവാര്ക്ക് കല്പനേമ് കൊഡുക്കുഡൊ. 12ണീ ബീ്ണാ് ആയിര്ക്കാദ്ണാലെ ണീ പഡ്സ്റ കാര്യഗണ ണെനേത്ത് ആര്മ് ണിനാണ മദ്സാദെ ഇര്ക്ക്യ പാങ്കില്ലെ. എച്ചെ ആള്ഗോഡെ ണായ പേസുഡൊ, എച്ചെ ആള്ഗോഡെ പ്ളാങ്കുഡൊ, എച്ചെ സീവാ് ബ്ട്ട് ണഡാക്കുഡൊ, എച്ചെ ക്റ്സ്ത്ത്ണ ണമ്പുഡൊ, എച്ചെ പാവ സെയ്യാദെ പെ്ളേക്കുഡൊ, എങ്കാദെല്ല ണീയെ ഏസുക്കാറാര്ക്ക് കാട്ടി കൊഡുക്കുഡൊ. 13പിന്നെ ണാന് ബരമാട്ട്മ് സാമി സൊല്ലുസുലാക്കണ ആള്ഗാക്ക് സൊല്ലിമ് കൊഡുക്കുഡൊ, അവാര് മുന്തുക്ക് പഡിത്ത്മ് കേ്ള്സുഡൊ, പഡിസിമ് കൊഡുക്കുഡൊ. അച്ചെ ണിന്ന് ണേരണ മുച്ചുഡ ഇദ്ക്ക് ബേ്ണ്ടി സിലാവളിക്കുഡൊ. 14ഏസുക്കാറാര് കൂട്ടാദ് മൂപ്പല ണിന്ന് തലേക്ക് കയ്യി ബെക്കാട്ടി സാമി അവാര് മേലെ ണിന്നോഡെ പേസാമ് സെയ്ദാ് ഒരു ബര തരാമ് സെയ്ദാ്. അയ്യി ബര സിന്നാദെന്ത് ണീ ണെനേക്കാദെ.
15ഈ കാര്യഗണെല്ല മ്ഗ്ന്ത കാര്യത്തോഡേമ് മനേസ്സാറാമ് സെയ്ഡൊ. അച്ചെ ഈ കാര്യാത്തിലി ണീ എത്തറാക്ക് ഉജാന്ത് കൊണ്ടിര്ക്കെ എന്ത് ആള്ഗാക്ക് തെര്യു. 16ണിന്ന് പെ്ളേപ്പിലിമ്, ണീ പഡ്സ്റ കാര്യഗളിലിമ്, ണീ കാര്യക്കാറാനായിര്ക്കുഡൊ. ണാന് ണിനാക്ക് സൊന്ന കാര്യഗണെല്ല ണീ സെയ്ദ് കൊണ്ടെ ഇര്ക്കുഡൊ. അച്ചെ സെയ്ദാക്കി ണിനാണാമ് ണീ പഡ്സ്റാദ്ണ കേ്ക്കവാര്ണാമ് സാമി ദെങ്ക്സുവാ്.
اکنون انتخاب شده:
1 തിമത്തോസ് 4: സാമിദ് സേദി
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
New Life Literature