ወንጌል ዘማቴዎስ 2
2
ምዕራፍ 2
በእንተ ምጽአተ ሰብአ ሰገል
1ወተወሊዶ እግዚእ ኢየሱስ በቤተ ልሔም ዘይሁዳ በመዋዕለ ሄሮድስ ንጉሥ ናሁ መጽኡ መሰግላን እምብሔረ ጽባሕ ወበጽሑ ውስተ ኢየሩሳሌም። 2#ዘኍ. 24፥17። እንዘ ይብሉ አይቴ ሀሎ ዘተወልደ ንጉሠ አይሁድ እስመ ርኢነ ኮከበ ዚኣሁ በምሥራቅ ወመጻእነ ከመ ንስግድ ሎቱ። 3ወሰሚዖ ሄሮድስ ንጉሥ ደንገፀ ወተሀውከ ወኵላ ኢየሩሳሌም ምስሌሁ። 4ወአስተጋብኦሙ ሄሮድስ ለኵሎሙ ሊቃነ ካህናት ወጸሐፍተ ሕዝብ ወተስእሎሙ ወይቤሎሙ በአይቴ ይትወለድ ክርስቶስ። 5#ዮሐ. 7፥42። ወይቤልዎ በቤተ ልሔም ዘይሁዳ እስመ ከማሁ ጽሑፍ በነቢይ። 6#ሚክ. 5፥2፤ 2ሳሙ. 5፥2። «ወአንቲኒ ቤተ ልሔም ምድረ ኤፍራታ#ቦ ዘይቤ «ምድረ ይሁዳ» ኢትቴሐቲ እምነገሥተ ይሁዳ እስመ እምኔኪ ይወፅእ ንጉሥ ዘይርዕዮሙ ለሕዝብየ እስራኤል።» 7ወእምዝ ጸውዖሙ ሄሮድስ ለሰብአ ሰገል ጽሚተ ወተጠየቀ እምኀቤሆሙ መዋዕሊሁ በዘአስተርአዮሙ ኮከብ። 8ወፈነዎሙ ኀበ ቤተ ልሔም ወይቤሎሙ ሐዊረክሙ ተሰአሉ ጥዩቀ በእንተ ውእቱ ሕፃን ወእምከመ ረከብክምዎ ግብኡ ኀቤየ ወዜንዉኒ ከመ እምጻእ አነሂ ወእስግድ ሎቱ። 9ወሰሚዖሙ እምኀበ ንጉሥ ሖሩ ወናሁ ኮከብ ዘርእዩ እምሥራቅ ይመርሖሙ እስከ ሶበ አብጽሖሙ ቤተ ልሔም ወቆመ መልዕልተ በኣት ኀበ ሀሎ ሕፃን። 10ወርእዮሙ ኮከበ ተፈሥሑ ዐቢየ ፍሥሓ። 11#መዝ. 71፥6-15፤ ኢሳ. 8፥4። ወበዊኦሙ ውስተ ቤት ረከብዎ ለሕፃን ምስለ ማርያም እሙ ወወድቁ ወሰገዱ ሎቱ ወአርኀዉ መዛግብቲሆሙ ወአብኡ ሎቱ አምኃ ወርቀ ከርቤ ወስኂነ። 12ወነገሮሙ በሕልም ከመ ኢይግብኡ ኀበ ሄሮድስ ወእንተ ካልእት ፍኖት ገብኡ ወአተዉ ብሔሮሙ።
በእንተ በአተ ሕፃን ወእሙ ውስተ ምድረ ግብፅ
13ወእምድኅረ ኀለፉ እሉ ናሁ መልአከ እግዚአብሔር አስተርአዮ በሕልም ለዮሴፍ እንዘ ይብል ተንሥእ ወንሣእ ሕፃነ ወእሞ ወጕየይ ውስተ ብሔረ ግብፅ ወሀሉ ህየ እስከ አመ እነግረከ። 14እስመ ሀለዎ ለሄሮድስ ይኅሥሦ ለሕፃን ከመ ይቅትሎ ወተንሢኦ ነሥአ ሕፃነ ወእሞ በሌሊት ወሖረ ብሔረ ግብፅ። 15#ሆሴ. 11፥1። ወነበረ ህየ እስከ አመ ሞቱ ለሄሮድስ ከመ ይትፈጸም ዘተብህለ እምኀበ እግዚአብሔር በነቢይ እንዘ ይብል «እምግብፅ ጸዋዕክዎ ለወልድየ።»
በእንተ እለ ተቀትሉ ሕፃናት
16ወሶበ ርእየ ሄሮድስ ከመ ተሣለቁ ላዕሌሁ ሰብአ ሰገል ተምዕዐ ጥቀ ወፈነወ ሐራሁ#ቦ ዘኢይጽሕፍ «ሐራሁ» ወአዘዘ ይቅትሉ ኵሎ ሕፃናተ ዘቤተ ልሔም ወዘውስተ ኵሉ አድያሚሃ ዘክልኤ ዓመት ወዘይንእስሂ እምኔሁ በሐሳበ መዋዕል ዘተጠየቀ እምኀበ ሰብአ ሰገል። 17አሜሃ ተፈጸመ ዘተብህለ በኤርምያስ ነቢይ እንዘ ይብል። 18#ኤር. 31፥15። «ቃል በራማ ተሰምዐ ብካይ ወገዐር ወሰቆቃው#ቦ ዘይዌስክ «ወሕማም ብዙኅ» ራሄል እንዘ ትበኪ በእንተ ውሉዳ ወአበየት ተናዝዞ ወነጊፈ ላህ እስመ ኢኮንዋ ውሉዳ ውሉደ ወኢሀለዉ።» 19#መሳ. 13፥5። ወመዊቶ ሄሮድስ ናሁ መልአከ እግዚአብሔር አስተርአዮ በሕልም ለዮሴፍ በብሔረ ግብፅ። 20እንዘ ይብል ተንሥእ ወንሣእ ሕፃነ ወእሞ ወሑር ውስተ ምድረ እስራኤል እስመ ሞቱ እለ የኀሥሥዋ ለነፍሰ ዝ ሕፃን። 21ወተንሢኦ ነሥአ ሕፃነ ወእሞ ወቦአ ውስተ ምድረ እስራኤል። 22ወሰሚዖ ከመ አርኬላኦስ ነግሠ ለይሁዳ ህየንተ አቡሁ ሄሮድስ ፈርሀ ሐዊረ ህየ ወአስተርአዮ በሕልም ወተግኅሠ ውስተ ደወለ ገሊላ። 23ወበጺሖ ኀደረ ውስተ ብሔር እንተ ስማ ናዝሬት ከመ ይብጻሕ ወይትፈጸም ዘተብህለ እምኀበ እግዚአብሔር በነቢይ «ከመ ናዝራዊ ይሰመይ ወልድየ።»#ቦ ዘኢይጽሕፍ «ወልድየ»
اکنون انتخاب شده:
ወንጌል ዘማቴዎስ 2: ሐኪግ
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید