Isaya 3
3
Mrrudu ka Yerusalem
1Qtai! Bukung, Utux Tmninun Bukung Mdoi Kana Supi we, mpeeyah Yerusalem ma Yehudah,
mpkuuka ka sntmaan seediq ma, skdakar seediq,
kiya ka uqun sntmaan daha ma, qsiya skdakar seediq.
2Qada na ka seediq mnpahung ma supi,
mpsgao ma mpgeela kari,
mpsbunul ma rdrudan.
3Qada na ka qbsuran msn50 qpuruh supi ma, qbsuran mdudul seediq,
qbsuran prngagan ma mhhuni.
4Ngalun mu mpdudul dheya ka lqlaqi,
mpqlahang dheya ka lqlaqi.
5Mpptraqil ka dseediq,
txtaxa daha we mptraqil ssiyo,
smbiciq ba mita rdrudan ka driso,
qmnaqah seediq spruun ka seediq uka ba ngayan.
6Mqerac mtswai na meniq sapah tama na ka seediq ma mprengo:
“Niqan su lukus mgbaro, Aguh ma pqbsuran mdudul yami ka isu,
psai baga su hiya ka oda qnnaqah nii!”
7Ciida, mpdiras mlawa ka heya:
“Uxe ku mpkmalu sunan ka yaku.
Uka uqun ka sapah mu ma, uka lukus mu uri,
iya ku hiya ngali qbsuran mdudul seediq.”
8Mpkrudu ka Yerusalem,
mpthurah ka Yehudah.
Ado mtbrinah Utux Tmninun ka hema daha,
ini qita knledax na ka doriq daha.
9Klaun qmita uxe msderux peeyah dqeras daha,
ini bale leing rmengo qnquwan noda mntena Sedom ka dheya.
So smtali ka dheya! Maangal cniyuk ndaan daha qnnaqah.
10Mprengo namu seediq msderux, mbleyaq ka heya,
ado meekan nanak malu qneepah na.
11So smtali ka seediq naqah! Maangal pnqraqil ka heya!
Ado maangal cniyuk qnpahan baga daha nanak.
12Quri so seediq mu,
hmilic ooda yamu ka mpqlahang,
pqcuqi pkere mangal mnrana ka mpqlahang yamu.
Laqi mu! Dmnudul yamu ka pqnuuqu pkkesa yamu,
kiya de smeeliq elu noda namu uri.
Psgao Seediq na ka Utux Tmninun
13Pstutui prngagun pnsgao ka Utux Tmninun,
mheyu psgao kana seediq.
14Mpsgao rdrudan ma dmpdudul qnlhangan na ka Utux Tmninun:
“Yamu, yamu ka wada smeeliq qnpahan lipas,
gmeeluk seediq mqraqil ma, sgutu namu sapah namu.
15Ma namu meruc seediq mu,
rnteruc dqeras seediq mqrinuc.”
Rnengo Utux Tmninun Bukung Mdoi Kana Supi ka nii.
Pqlahang Rmengo Yerusalem
16Rmengo ka Utux Tmninun:
Ado pnsparu na ka Sion,
qmita baro mkkesa ma, mrmari doriq,
mege qilu tmsiiyax mkkesa ma, phrenang hmuril psduduy papak mkkesa.
17Mpluqah tunux Sion ka Bukung,
mpraguh qyqeya na ka Utux Tmninun.
18Betaq ali ciida, pkngalun na kana pusu dnoi mqedil pdpingun papak, tunux, nduyung ma, 19pdpingan birac, hiqur, bubung dqeras, 20galiq tunux, ppdeping papak, snuyuk hwinuk, kulu skenux, lnabu skuni, 21pqecul tluding ma ngadux muhing, 22mkere brigan lukus smseman, lukus mgbaro, bubung mgbaro, psaan pila. 23Gagi baga, lukus rila tninun ware, bubung tunux ma qqeerung dqeras.
24Pryuxun msburo ka malu sknexan,
pryuxun snuyuk ka habik qraqil,
byuhun ka malu snuunux kndekul,
prihun pncapang ka lukus liqa,
mpqrangas ka knsdhriqan heyi.
25Mpspaux pnshlmadac ka rseno namu,
Mphuqil mccebu ka dmbbeyax rseno.
26Mplingis, mprengac ka rhengun alang Sion.
Laxun ka heya ma, mptleung dxeral.
The Bible Society in Taiwan, 2020
© 台灣聖經公會版權所有，2020