Isaya 2
2
Mtbale Betaq Ani Knuwan
(Mik 4:1-3)
1Nii we qnita Isaya laqi Amos quri Yehudah ma Yerusalem.
2Ali bobo na hiti, mpskere mheyu ka dgiyaq sapah thmkuwan Utux Tmninun,
hmrinas ddgiyaq, mpgkala kana ddgiyaq.
Meeyah quri dgiyaq nii ka kana qqlhangan.
3Mpquri hiya ka hbaro seediq ma, mprengo:
“Aguh! Suupu ta mosa dgiyaq Utux Tmninun,
osa ta sapah thmkuwan Utux Baro meeniq Yakobu.
Mptgesa elu na ita ka heya,
kiya we mooda ta elu na ka ita uri.
Ado mpeeyah Sion ka tnugesa,
mpeeyah Yerusalem ka kari Utux Tmninun.
4Mpsgao ckceka qqlhangan ka heya,
mpsgao malu ma naqah klegan seediq.
Slmeun daha parih ka hlmadac,
snmalu daha kawir ka smbrangan.
Uxe mdoi hlmadac mccebu qlhangan kiya ka qlhangan nii,
kiya we uxe moda smluhe mccebu ka dheya.
5Sapah Yakobu!
Aguh! Kkesa ta ledax Utux Tmninun.
Uxe Baka ka Psparu
6Wada su malix seediq su sapah Yakobu,
Ado stngayan gaya pneeyah nklaan hido ka dheya,
mntena so dseediq Peliset mqita pngerah,
msuupu seediq icil tmapaq baga.
7Stngayan king ma ging ka qnlhangan daha, msngari riyung ka dnoi daha.
Egu ba ka dapa dmay ka dxeral daha,
rulu mpcceebu we ini qlengi smepu.
8Stngayan tikung ka dxeral daha.
Thmuku snmalu daha nanak ka dheya,
kiya ka snmalu tluling baga daha.
9Duma na we tmbqelic papak,
duma na we tmbqelic thmuku,
So kiya de, iya bale srwai ka dheya.
10Osa mremux ckceka tasil, tgleing cngcenga dxeral,
osa mtgleing seang Utux Tmninun ma, knpruwan knledax na.
11Dehuk ali kiya de, mpgseesu ka psparu,
mptmbqelic ka seediq prana na.
Wano ba Utux Tmninun ka spruun.
12Ado ali Utux Tmninun Mdoi Kana Supi we meeyah kana psparu,
meeyah kana gaga psparu,
ptlbeun na ka dheya.
13Meeyah qulic bale ka Lebanon,
meeyah qhuni raus Basan.
14Meeyah kana dgiyaq paru,
kana ddgiyaq biciq.
15Meeyah kana paga bbaro,
kana mgdehu pnharac qnalang alang.
16Meeyah kana asu Tarsis,
kana asu malu qtaan.
17Mptmbqelic papak ka seediq ttndahu,
mpgseesu ka seediq psparu.
Meniq ali ciida, wano ba Utux Tmninun ka spruun.
18Llixun kana ka tikung.
19Meeyah lmgelu dxeral ka Utux Tmninun ciida,
maha mremux lhengo ma beling dxeral ka seediq,
maha tgleing seang Utux Tmninun ma, knpruwan knledax na.
20Dehuk ali kiya, maangal tikung tnhmkuwan daha snmalu king ma ging ka seediq,
sqada daha qolic qtehur ngungu ma plaale karic.
21Meeyah lmgelu dxeral ka Utux Tmninun ciida,
maha mremux cngcenga lhengo ma cenga tasil ka seediq,
maha tgleing seang Utux Tmninun ma, knpruwan knledax na.
22Iya stama seediq bobo dxeral ka yamu,
wano ba niqan hengak muhing na,
rrihan manu ka kiya ho?”
The Bible Society in Taiwan, 2020
© 台灣聖經公會版權所有，2020