1 കൊരിന്തിയിര് 13
13
ശ്‌നേകം
1നാന് മന്ശൻമാരയോ തൂതൻമാരയോ പാശയില് പേശിയാലും എക്ക് ശ്‌നേകമില്ലങ്കി നാന് ശെന്നയൊള്ള മത്താളമം കിലങ്ങന്റ കിങ്ങ്ണിയും മാട്ട്ക്കും ആണും. 2എക്ക് വ്‌ലാത്തിമാര വരം കിട്ടിയാലും മറഞ്ഞിരക്കന്റ ഒക്ക എക്ക് തിക്കൊണ്ടങ്ങിലും എക്ക് ഒക്ക പുത്തിയും ഒണ്ടാഞ്ഞാലും മലയിന നീക്ക്‌വാനിക്കൊള്ള നമ്പ് ഒണ്ടങ്ങിലും ശ്‌നേകമില്ലാണ്ടിയിരന്നെ നാന് ഒന്റുമില്ല. 3എക്കൊള്ളതൊക്ക താനതറമ്മം കൊടത്താലും എന്റ തേകം തിയ്യീല് ചുട്ട്കെരിച്ചാലും ശ്‌നേകമില്ലങ്കി നാന് ഒന്റുമില്ല. 4ശ്‌നേകം കെട്ടശീരിക്കി പെര്മാറ്‌ല, എക്ക്തിന്ന ഒക്ക കിട്ടണം ഇന്റ് പേശ്‌ല, മൂച്ച് വെര്ത്ത്‌ല, വയ്‌രാക്കിയമില്ല. 5ശ്‌നേകം ശോക്ക്തിയില്ലാത്ത ശീരിക്കി നടക്ക്‌ല, അവനത്തിന്ന വിട്ടനാക്കി പേശ്‌ല, മൂച്ച് എട്ക്ക്‌ല, തെറ്റ്കുറ്റത്ത്ന മനശിലെട്ത്ത് കെട്ടിവെക്ക്‌ല, 6ശ്‌നേകം നീതിയില്ലാത്തതീല് കൂയെട്ക്ക്‌ല ശത്തിയത്തീല് കൂയ് എട്ക്ക്ന്റ്. 7ശ്‌നേകം ഒക്ക ഏക്കത്തം, ഒക്ക നമ്പത്തം, ഒക്ക കാത്തിരക്കത്തം, ഒക്ക പൊറ്ക്കത്തം ചെയ്യ്ന്റ്. ശ്‌നേകം ഒരകാലത്തം തോറ്റ്പോന്റ്‌ല. 8ഉത്തറവ് പേശത്ത് ഇല്ലാണ്ടി ആകും; പാശാവരം നെന്റ് പോകും; പുത്തി നീങ്ങിപ്പോകും; ഇന്റെ ശ്‌നേകമോ എപ്പനെപ്പനം നെലനെക്കും. 9നമ്മ്ക്ക് ഇത്ത്റി ഇത്ത്റി മാട്ട്ക്കും തിക്കൊണ്ട്; ഇത്ത്റി മാട്ട്ക്കും ഉത്ത്റ്‌വ് പേശത്തം ചെയ്യന്റം. 10ഇന്റെ മൊത്തത്തിലൊള്ളത് വെര്വ്നിക്കി നെകക്കാത്തത് മാറിപ്പോകും. 11നാന് കുഞ്ചിക്കുഞ്ചിയില് കുഞ്ചിക്കുഞ്ചീനപ്പേല പേശ്പയമ ഇട്ടൻ, കുഞ്ചിക്കുഞ്ചീനപ്പേല നെനച്ചൻ, കുഞ്ചിക്കുഞ്ചീനപ്പേല ഓരോ കാരിയമം തിക്കൊണ്ടാഞ്ഞ്ത്; വെലീയാളാഞ്ഞപ്പൻ കുഞ്ചിക്കുഞ്ചിയില് ചെയ്ഞ്ഞ കാരിയത്ത്ന നാന് വിട്ട്കളഞ്ഞൻ. 12ഇപ്പൻ നമ്മ കണ്ണാടിയില് കാണന്റത് പേല മറവോടയാണും കാണന്റത്; അപ്പിനിക്കി നമ്മ മൊകത്തോടമൊകം കണ്ടം; ഇപ്പൻ എക്ക് ഇത്ത്റി ഇത്ത്റി തിക്കൊണ്ട്; ഇപ്പൻ എന്ന തെയ്‌വത്ത്ക്ക് തിക്കൊള്ളത്പേല അന്റ് എക്ക് തെയ്‌വത്ത്ന മൊത്തമാഞ്ഞും തിക്കൊണ്ടാകും. 13ആണ നമ്പ്, കാത്തിര്പ്പ്, ശ്‌നേകം ഇത് മൂന്റും നെലനെക്ക്ന്റ് ഇതീല് ഏറ്റമം വെലീത് ശ്‌നേകം തിന്ന.
اکنون انتخاب شده:
1 കൊരിന്തിയിര് 13: മുതുവാൻ
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© New Life Literature