ITA̍YI̍TƆ̄ƆSI 3
3
Abɔ̄lɛ̄lā ɔyɔ̍ɔ̄ya̍ yī Āchɛ yī Ikra̍yisi
1Bla āchɛ yī wɔ wa̍a̍ hɛ̄ɛbɛ nīi e̍ ge̍ de lɛhu̍ ga ajɛ de alɛhu̍ ba̍la āchɛ nīi lɛ ajɛ ma̍, de otūlichō de wa̍. E̍ ge̍ tībi̍īyē yī lɛlā ɔnɛ̄ɛhɛhi ɔyɔ̍ɔ̄ya̍ myɛ̄grāa-myɛ̄grāa. 2E̍ ge̍ e̍e ka ɔdwɔ̄bi̍ yī āchɛ kɛ̄ɛ gbapɔ̄ tāa āchɛ bɛ̍bɛ̍ ni̍. E̍ ge̍ hɔ̄ la ogbodɔ̍dɔ̍, lɛ yaya ba̍la āchɛ wa̍a̍. E̍ ge̍ de ɔlɛmlɛ̍ɛ̍ yī wā chabɔ̄ i̍ngɔ̍ɔ myɛ̄grāa-myɛ̄grāa. 3Yɛ̄grāa ɔha̍ hɔ̄ abɔ̍ɔ nīi alɔ ɛlɛjā hi̍īchī; alɔ i̍ ē pɔ̍ɔkɔ yī ɔ̄chɛ ni̍; alɔ bi̍yēyī; alɔ de iyī alɔ pīya afiyɛ yī e̍hla̍mi ba̍la ɔwɔ̄wīyā ita yī ɔha̍lɔha̍ wa̍a̍. Yɛ̄grāa ɔla̍ā, alɔ de ɔhɔ̄leyī yī alɔ wa̍a̍ lā de u̍hu̍ ɔyɔ̍ɔ̄ya̍ ba̍la uji otū ɔ̄chɛ otōtū; alɔ de ta̍ āchɛ anyī; āchɛ titi de ta̍ alɔ anyī. 4Bɛ̍ɛ̄nɛ̄ ma̍, Ɔwɔ nīi - Ɔhɔ̍ɔnyɛta̍ yī alɔ ma̍ wā ge̍ de lɛha̍ ɔmɔ̍ɔ̄ma̍ yī nū ba̍la ɔhɔtū yī nū hi̍yɛchɛ de alɔ. 5O̍ de alɔ hɛ̍ta̍ ke̍e̍ bɛ̍ɛ̄nɛ̄. I̍ owu̍chē yī lɛlā ɔnɛ̄ɛhɛhi ɔha̍ nīi alɔ ya̍ ma̍ - ohu̍ nīi o̍ ya̍ i̍ngɔ̍ɔ a̍ni̍; wu̍chē yī lɛha̍ nīi o̍ ma̍ de alɔ ma̍ nɛ. O̍ hɛ̍ alɔ ta̍ bū la yenyi ohōhu nīi Uhu Ɔnɛ̄ɛhɛhi yī nū gbla̍a alɔ ē ma la ɔhɔ̄leyī onīpīpɛ̄ ma̍. 6Ɔwɔ kɔ̄ Uhu Ɔnɛ̄ɛhɛhi yī nū ɔla̍ā mwɛbɛ mwɛbɛ de alɔ gala abɔ̄ yī Iji̍sɔ̄ɔsi nīi - Ɔhɔ̍ɔnyɛta̍ yī alɔ ma̍. 7Bū la uhwa ɔnɛ̄ɛhɛhi yī nū ɔla̍ā, alɔ ge̍ē de lɛ kpakpa ba̍la Ɔwɔ. Bū la ɛbɛ ɔla̍ā, o̍ ya̍ nīi alɔ ge̍ē lɛ ɔhɔ̄leyī i̍mɔ̄mɛni̍ nīi alɔ yɛ ē deyīche ma̍. 8Lɛlā nūma̍ - lɛlā olēchi̍ lēchi̍ nɛ.
N chikpo̍ nīi a ge̍ē de oko̍o ba̍ lɛlā nūma̍ brii la ɔkɔ̄ka; hɛ̄ɛbɛ nīi āchɛ nīi de ɔtū che Ɔwɔ ma̍ ge̍ jɔ̍ɔkɔ de yɛ̄grāa yī wā wa̍a̍ lā de lɛlā ɔnɛ̄ɛhɛhi ɔyɔ̍ɔ̄ya̍. Lɛlā nīi hwɔhi hwɔhi gba̍a tū ɛpiyabuna de āchɛ yɛ̄mɛ̄mɛ̄ ma̍ hɔ̄ aa̍ a̍nɛ. 9Gwō gbo̍o̍ hī ahu̍lɛ̄lā i̍bobo, ba̍la lɛlā ɔgu yī riyī yī ɔ̍kɔ̄kū ɔgbɔɔgba la okōku, ba̍la apɔ̄ ogbōgbo, ba̍la lɛlā ogbōgbo wu̍chē lɛlā yī Lihɔ yī Imo̍sīisi. Ɛjā ɛla̍ā wa̍a̍ - a̍kpla yī lɛlā nɛ. 10Ɔ̄chɛ ɔta̍tu̍tu̍ yī lɛlā ogbōgbo, a ā ta̍ ɔ̄ ɔna gla igbɛpa ta̍ ni̍. O̍ i̍ ge̍ po̍ gɛ ni̍, a ā gba̍a ya̍ lɛlɛ̄lā ba̍la anu̍ gɛ ni̍. 11Jo̍ōkū ji bɛ̍ɛ̄nɛ̄ hīka ɔ̄chɛ oli̍ngɔ̍ɔ bīya gba̍a̍ mɛ̍. Lɛlā abi̍ yī nū ya̍ ochi̍chi̍ yī nū ka ɔ̍lɔ - ɔ̄chɛ ɔdwɔ̄bi̍ nɛ.
Ɔchlɛhu̍ yī lɛlā ba̍la ɔma̍kpɔɔ
12N ge̍ de A̍tɛ̄masi kɛ̄ɛ Iti̍kīkusi tɛ̄rɔ̄ hu wɔ ɔpɔ̄ɔpɛ̄ ma̍, chɛ̄rī nīi a ā pīya ngla̍ wā dikpo̍ba̍ u abɔ̍ɔ la Iniko̍pɔ̄lisi. Wu̍chē oji̍ nɛ, n de miya mɛ̍ hīka n ge̍ē gāa ge̍ē hɔ̄ abɔ̍ɔ la yɛ̄grāa yī owu. 13Chɛ̄rī hɛ̄ɛbɛ nīi a tū Ijɛ̍nāasi nīi - ilo̍ya ma̍ wɔbɔ̄, anu̍ ba̍la Apo̍lōosi, hɛ̄ɛbɛ nīi e̍ ge̍ gba̍a nyɔ̄ la ɛyɛ yī wā ga iyɔ̄bū. Deyīrɛ nīi a ā ma̍ hīka ɔjāha̍ ɔjāha̍ nīi ku̍ wā ɔkɔ ma̍, e̍ lɛ bī abɔ̍ɔ. 14Ka de āchɛ yī alɔ hɛ̄ɛbɛ nīi e̍ ge̍ de yɛ̄grāa gba̍a̍ lā de lɛhi ɔyɔ̍ɔ̄ya̍. E̍ ge̍ ya̍ u̍ku̍rɔ̍ hɛ̄ɛbɛ nīi e̍ ge̍ lɛ ɛjā wa̍a̍ nīi ku̍ wā ɔkɔ ma̍. E̍ ge̍ e̍e de gbi̍ya̍chi ni̍.
15Āchɛ wa̍a̍ nīi gblāa amu ba̍la ami ma̍ tɛ̄rɔ̄ yī ɔma̍kpɔɔ hu wɔ. De aɛ̍ɛya alɔ wa̍a̍ nīi de ɔtū che Ɔwɔ bāa alɔ ma̍ o̍be de alɔ.
Ɔpiyɛ nīi Ɔwɔ ē de ma̍ ge̍ hɔ̄ ba̍la ala̍ wa̍a̍.
© 2020 Bible Society of Nigeria (second edition)