ITA̍YI̍TƆ̄ƆSI 2
2
Ɔpɔ̄pū yī lɛlā ongōngū yī Ɔwɔ nīi lɛ chra̍da̍da̍ ma̍
1Ngū āchɛ lɛlā nīi ku la ɔpɔ̄pū yī lɛlā yī Ɔwɔ nīi lɛ chra̍da̍da̍ ma̍. 2Ka de anyāku̍ angrɔ̄ɔ hīka e̍ ge̍ e̍e de ya̍ bāa āchɛ nīi ē wīyɔ̄jā ma̍ ni̍. E̍ ge̍ lɛ tri̍di̍di̍; e̍ ge̍ ku̍ ūkpɔ̄tū bī; ɔtū ode chōche yī wā, ba̍la ɔhɔtū ba̍la ɔtū ɔmɔ̄mla yī wā ge̍ lɛ chra̍da̍da̍ hwɔhi hwɔhi. 3Anyāku̍ anyā titi ge̍ yɛ̍ɛ̄lā lɔkɔ nīi anyā ɛnɛ̄ɛhɛhi ē ya̍ ma̍. E̍ ge̍ e̍e wɛ āchɛ ɔbīya riyī yī āchɛ ni̍. E̍ ge̍ e̍e de riyī wā pīya afiyɛ yī ɔjā ɔgwɔ̍ɔ̄gwa̍ ni̍. E̍ ge̍ ngū āchɛ lɛlā ɔnɛ̄ɛhɛhi ɔnɛ̄ɛhɛhi, 4hɛ̄ɛbɛ nīi e̍ ge̍ ngū anyā ɔblɛ̍ba̍ nīi - aɛ̍pɛ̄ we̍ ma̍ lɛlā. E̍ ge̍ ya̍ i̍ngɔ̍ɔ hɛ̄ɛbɛ nīi anyā ɔblɛ̍ba̍ ge̍ ywɔ̍ɔnyɛ yī lɛba̍ yī wā ba̍la ayi̍ yī wā; 5hɛ̄ɛbɛ nīi e̍ ge̍ ku̍ ūkpɔ̄tū bī; hɛ̄ɛbɛ nīi e̍ ge̍ lɛ cha̍ri̍cha̍ri̍ hwɔhi hwɔhi; hɛ̄ɛbɛ nīi e̍ ge̍ re̍ka anyā ɔblɛ̍ba̍ ɛnɛ̄ɛhɛhi nīi ē pɔ̍ɔkɔ yī lɛba̍ ma̍; hɛ̄ɛbɛ nīi ɔ̄chɔ̄chɛ ge̍ e̍e ka ɔdwɔ̄bi̍ yī ɛrɔ̄ yī Ɔwɔ ni̍.
6Ka de aye̍kre̍biya i̍ngi̍ngɔ̍ɔ hīka e̍ ge̍ ku̍ ūkpɔ̄tū bī. 7Awɔ ɔlɔjā titi chɛ̄rī nīi a ā chabɔ̄ yī lɛlā ɔnɛ̄ɛhɛhi la ɔjāha̍ ɔjāha̍ wa̍a̍ nīi a ge̍ē ya̍ ma̍. Ngū āchɛ lɛlā la olēchi̍ lēchi̍ grigrigri. 8Lɛlā nīi a ge̍ē ka ma̍ ge̍ lɛ chra̍da̍da̍, hɛ̄ɛbɛ nīi ɔ̄chɔ̄chɛ ge̍ e̍e ma̍ lɛlɛ̄lā bī ya̍ wɔ la oko̍o mɛ ni̍. Ya̍ i̍ngɔ̍ɔ hɛ̄ɛbɛ nīi aluji yī wɔ i̍ ge̍ ma̍ lɛlā abi̍ ɔha̍lɔha̍ ka ku̍ alɔ gɛ ni̍ ma̍ nīi e̍ ge̍ de ya̍ liwēyī iwēyī.
9Afiyɛ titi ge̍ de otūlichō de abā yī wā. E̍ ge̍ yɛ̍ɛ̄lāha̍ ɛlāha̍ nīi ge̍ē lɛ abā yī wā wɔnyɛ ma̍. E̍ ge̍ e̍e hīya abā yī wā ɔkɔ yī lɛlā nyɛ̍nyɛ̍ ni̍. 10E̍ ge̍ e̍e wī abā yī wā uwī ni̍. Ɔkɔkɔ ɔla̍ā, e̍ ge̍ yɛ̍ɛ̄lā chabɔ̄ hīka aɛ̍lɛ - āchɛ ɛnɛ̄ɛhɛhi nīi ɔ̄chɛ ɔ̍lɔ ē de ɔtū che ɔ̍lɔ nɛ. E̍ ge̍ ya̍ i̍ngɔ̍ɔ hɛ̄ɛbɛ nīi āchɛ ge̍ ka ɔnɛ̄ɛhɛhi yī lɛlā yī Ɔwɔ Ɔhɔ̍ɔnyɛta̍ yī alɔ nīi alɔ ngū āchɛ ma̍ bū la lɛlā nīi e̍ yɛ ē ya̍ ma̍.
11Wu̍chē oji̍ nɛ, Ɔwɔ de uhwa ɔnɛ̄ɛhɛhi yī nū chabɔ̄ wu̍chē yī ɔhɛ̍ta̍ yī āchɛ̄ɛchɛ wa̍a̍ mɛ̍. 12Uhwa ɔnɛ̄ɛhɛhi yī Ɔwɔ ɔla̍ā yɛ ē ngū alɔ lɛlā a̍nɛ. Aɛ̍lɛ ge̍ tu̍labɔ̄ hī ɔhɔ̄leyī nīi ɔ̍lɔ i̍ ɔpɔ̄pū yī Ɔwɔ ni̍ ma̍; aɛ̍lɛ ge̍ tu̍labɔ̄ hī a̍hla̍ yī lɛlā yī yɛchɛ nūma̍; aɛ̍lɛ ge̍ hɔ̄ la ɔhɔ̄leyī oku̍ ūkpɔ̄tū bī mɛ ba̍la ɔhɔ̄leyī ɔlɛkpakpa ba̍la ɔhɔ̄leyī la ɔpɔ̄pū nīi - ɔ̍lɔ iyī Ɔwɔ ma̍ amu la yɛchɛ nūma̍. 13Hɛ̄ɛbɛ nīi aɛ̍lɛ ge̍ gbēyī yī Ɔ̄chī A̍hōhi nīi aɛ̍lɛ deyīche ogbē yī ɔ̍lɔ ma̍. Yɛ̄grāa ɔla̍ā nīi rīgā yī Ɔwɔ Ɔnɔ̄kɔ̄kū yī alɔ ba̍la iyī Ɔhɔ̍ɔnyɛta̍ yī alɔ Iji̍sɔ̄ɔsi Ikra̍yisi ge̍ē hi̍yɛchɛ a̍nɛ. 14Iji̍sɔ̄ɔsi de iyī nū nāa de wu̍chē yī alɔ wa̍a̍. O̍ wu̍ alɔ ngmɛ̍ɛchɛ hī ɔdwɔ̄bi̍ ɔha̍lɔha̍ wa̍a̍, de alɔ pīya āchɛ ɔlɛcha̍ri̍cha̍ri̍ hwɔhi hwɔhi de iyī anu̍ ɔlɔjā ke̍e̍ mɛ̍. O̍ ya̍ nīi lɛlā ɔnɛ̄ɛhɛhi ē hla̍ alɔ la ɔyɔ̍ɔ̄ya̍ bɛ̍ɛ̄nɛ̄.
15Lɛlā nīi a ge̍ē ngū āchɛ ma̍ hɔ̄ aa̍ a̍nɛ. A lwɔhu̍ la ɔgɔ̄grāa ge̍ē mla āchɛ ɔtū kɛ̄ɛ ē ka alābi̍ tāa āchɛ. Ɔ̄chɔ̄chɛ ge̍ e̍e nāa awɔ tɛ̍bɛ̍lɛ̍ ji ni̍.
© 2020 Bible Society of Nigeria (second edition)