Suu 25
25
1Salomɔn a suusu kɔsɔn nə́ ke.
Zudaan kii Ezekiasi a sumu
sɛ́wɔ-kiɛ̃lin man nə ǹ kiɛ̃.
Suusu totoron
2Dɛnaa Lawa a sii zɛnaa ka durii-n na a tɔ guguru koe.
Sii duriin doɛ̃ n tɔ koe kiin la.
3Lon a sɔsɔɔbaa ba n doɛ̃ wa,
tán a zuzulubaa dɔ ba n doɛ̃ wa,
a din yii goon ne,
kiin dɔn foo ba n doɛ̃ wa.
4 *Gɔ̀ bɔ n bɔ wɔrɔ ganaa,
á re gɔn màn sonbore biɛ.
5Min baraa loo n bɔ kii a sumu,
a kiibaa lɛ gòã á re we tán
ka peperebaa nɛ.
6 #
Luk 14.8-10
N nyan nə n din kalaa
kii yɔrɔ-a wa.
N nyan giã min
dadaran bǎã-n wa.
7Bɛ̀ ǹ nə́ pɛ n nɛ mà n nə n zɔ̃
n da nyɛɛnɛ,
bɛ á soɛ
n yii puusə kɔ nɛ kii yɔrɔ-a.
8N sii mɛn yɛ, n nyan saa lɛlɛ
n bɛ pɛ fufuu kiri wɔ ǹ bǎã-n wa.
Bɛ̀ n zɔ́ɔ nyaa mà
sonbore ba n lon wa,
ma nə n biɛ lɔn bɛ kio?
9Bɛ n zia da ka n miãkɛn nɛ,
ka a yɔrɔ bɔ ka dinin bii-n ni.
Min kɔsɔ boo mɛn da n nɛ,
n nyan bɛ kalaa wa.
10Bɛ bie wa,
min mɛn bɛ́ n too koe n lon,
bɛ á re sɔ koe n ganaa.
N saa lɛlɛ ń boo baraa mɛn da,
n ba bɛ lui doɛ̃ n kũ wa.
11Boo mɛn nə n da á kɔnpɛ
a biikoo ne,
a n ka sana màn bɛ́ lɔn
ǹ nə́ wɔrɔ kaa la nyaǹ lɛa.
12Min mɛn bɛ́ n too koe doɛ̃,
sii-dɔ̃li a doroo ǹ boon
ka sana zan bɛ́ lɔn a yii li,
hinlaa ka bɔlɔ-a gii bɛ́ lɔn
sana yoreen lɛa.
13La bɛ́ wɔlɔ nyɛɛ lɔn
tɛ̀fuu waáraa,
dia dí-a wole bɔlɔgoondɛnaa n
pàã koe a mìilandɛnaa la miɛ̃.
14Labara hinlaa piɛ̃ mɛn bɛ́ a na
a die ka la mu goon din ni wa,
min mɛn bɛ́ n lɛ koe ka bǐɛ̃ nɛ
a na a ba koe a bɔlɔ lɛ wa,
bɛa dɛnaa n miɛ̃.
15Bɛ̀ n nə foo kũ n bele bɔ nɛ,
ń tá kiri-wɔle yiri wɛɛ.
Boo kɔɔ̃n tá boe la
a min kakaarɛ basã.
16Bɛ̀ n zoo nyɔɔ yɛ,
n bii a kɔnpɛ n nɛ,
bɛ biɛ wa, n tá re pisii ni.
17N nyan wo n giaára li
paapaa wa.
Bɛ bie wa, bɛ̀ á nɔmaa,
n tìĩ á re boe ne.
18Min mɛn bɛ́ soɛ woon diɛ
n miã la,
a n goon ka bàlà gole ne,
gɔya sa hinlaa kiɛ pɛpɛnɛ nɛ.
19Koe gɔ́ɔ̃ nɛ,
bɛ̀ n nə n foo doa soɛ-bɔli ganaa,
a n goon ka sɔ busulə á ke màn soɛ̃
ka a sɔ busulə n lɔn,
hinlaa ka min mɛn bɛ́ tɔ we
a gòã yiɛ la lɔn.
20Foo-busii gole bɛ́
min mɛn ganaa,
bɛ̀ n foo kɔɔ̃nbaa ǹ loe lɔ nɛ,
a n goon ka ma nə n dɔnkɛ sɔlɔ
ń bɔ a ganaa nyan pinaa,
a n goon ka ma nə n mu piã,
kaa bayɛrɛ ganaa.
21 #
Rɔm 12.20
Bɛ̀ bòo tá n zɔ́ɔ ganaa,
màn-bii kɔ la a bii.
Bɛ̀ mu boro tá a ganaa,
n mu kɔ la a mi.
22Bɛ̀ n zɛnaa miɛ̃,
a re boe giã la wa
ka maǹ nə tɛ nàn kaa a mìi ni.
Dɛnaa Lawa á re n sarɛɛ.
23Piɛ̃ mɛn bɛ́ woe lɛ̀giala-n,
bɛ n die ka là nɛ.
Soɛ n die ka n miãn foo yoo ne.
24Bɛ̀ n giã kanaa gɔrɔ,
á soɛ n giã kion goon ne
kun ka lɔ mɛn bɛ́
zia n kɔɔ̃n a ganaa.
25Boo tii kɔɔ̃n mɛn bɔ
wɔlɔ sɔsɔɔ nɛ á daa,
a n ka mu nyantoto bɛ́ lɔn
mu boro dɛnaa gɔn.
26Min mɛn bɛ́ pepere,
sɛnɛ a gɔ̀nɔn nə́ bìn diɛ
min baraa nyɛɛnɛ,
a n goon ka mu yala hinlaa
tù mu ni, ǹ na a mu zaãbaa.
27Zoo nyɔɔ bii a la yii-n ba
siĩn wa.
Ga gugurubaa li a la yii-n
dɔ a siĩn wa.
28Min mɛn bɛ́ a boe
a din foo la wa,
bɛ na á kɔnbɔ
ka kiwi mɛn bɛ́ panparaanɛ
kungɔn ná a ba a ganaa wa.
اکنون انتخاب شده:
Suu 25: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.