Suu 22
22
1Tɔ kɔɔ̃n tá soɛ naforo gole ne.
N sii a kɔɔ̃n kɔ n miãn ganaa
tá soɛ sana laanka wɔrɔ nɛ.
2Sii goon nə pàãma
laanka doobaa biɛ goon:
Dɛnaa Lawa na á ǹ dinin
paãnan zɛnaa.
3Bɛ̀ koe á die,
yiridɛnaa nə n mìi duri.
Yiriwɛɛnaa sɛ na a zii tɔ we
yǎa sii yii.
4Min mɛn bɛ́ n din boɛɛn koe,
a n Dɛnaa Lawa guguru koe,
á re naforo yii, a tɔ bɔ,
a nyin sasa yɛ.
5Nyan laanka kanan man
min kɔkɔrɔ a zii sii ǹ nə n kɔ lɛ.
Min mɛn bɛ́ zoɛ̃ nyin sasa li,
a nə n wɔlɔ lui a ganaa.
6Sɔ̀n sonbore wɔ nɛnyaan nɛ
a yoo tán waáraa.
Ta á zizi kɔ,
a ba n niɛ̃ a ganaa wa.
7Pàãma pàã la doobaa wɔ nɛ.
Giɔ̀mɔdɛnaa n giɔ̀mɔ-dali lɛ a kòso nɛ lɛa.
8Min mɛn bɛ́ mɛnɛɛ minin la,
koe á re yii.
A kakaarɛbaa á re nyɛɛ.
9Min mɛnɛn bɛ́ bǐɛ̃ biɛ,
barka nə ǹ ganaa,
a giala maǹ doobaa toe.
10Yaa-wɔli loo, zia á re nyɛɛ.
Zia laanka sɔ-kɔ a re yii doo wa!
11Min mɛn bɛ́ min pepere narɛ,
boo sonbore n soe a lɛ-n,
bɛ n kii á giaára lɛa.
12Dɛnaa Lawa n doɛ̃
sonbore tamɛɛ.
Sɛnɛ, a n soɛ-bɔlin boon ziziɛ̃.
13Yoonaa n pii:
«Yàra á kanaa zii mìi ni,
a n die ma kuĩ.»
14Lɔ naarɛbaali lɛ n
nyankɔrɔ zuzulu lɛa.
Dɛnaa Lawa bɛ́ re dɔlɔ boe
min mɛnɛn ganaa,
bɛn manə n doe a nɛ.
15Gaãnaabaa ǹ sii zɛnaa n kɔɔ̃n
nɛ tenən ganaa.
Sɛnɛ, ǹ doroo ǹ bàlà n die toɛ ǹ nə n wɔlɔ lui a ganaa.
16Bɛ̀ min mɛnaa doobaa la,
a n biɛ pàãma lɛa.
Min mɛn bɛ́ bǐɛ̃ biɛ pàãma la,
a n biɛ doobaa lɛa.
Doroo totoro
17Ń too da,
n nə n too kɔ min golen boon li.
Kɔ maa daraan kɛn lɛ
ka n foo tumaa nɛ.
18Bɛ̀ ń nə ǹ tamaa n foo ne,
ń nə́ ǹ pii n lɛ-a baraa nɛ,
ǹ tá re n foo kɔɔ̃n koe.
19Man zoɛ̃ li máa n nə n foo doa
Dɛnaa Lawa ganaa.
Bɛ lɛ nɛ,
pelo ma á n darɛɛ
boon kɛn ganaa.
20Á ke, má doroo laanka doɛ̃ pɔsɔɔ kiɛ̃
sɛ́wɔ la n wɔ lɛa,
21màn mɛn bɛ́ toɛ
n boo pepere da ǹ gɔn yɛ,
a n ka te.
Min mɛn bɛ́ n diɛ dí ganaa,
n tá re dia dí-a wole
sonbore biɛ a gɔn.
22N nyan doobaa koã
a giala mà doobaa n wa.
N nyan mɛnaa nɔmaa-wɔle la
kiri wɔ ǹ bǎã-n wa.
23Taãn nɛ,
Dɛnaa Lawa nə ǹ zia gii-dali lɛa,
min mɛnɛn bɛ́ mɛnɛɛ ǹ la,
Dɛnaa Lawan bɛn nyin boe.
24N nyan foo goledɛnaa baa
n giaára lɛa wa,
min mɛn foo bɛ́ a golee yoo-n wa,
n nyan koa kun ni wa.
25Bɛ bie wa,
n tá re n siɛ li n na a lɛn zɔɔ̃,
kan tɔn nə n kũ.
26N nyan min gɔn dɛ,
n nə n din baa
n miãn giɔ̀mɔ á siére lɛa wa.
27Bɛ̀ a boo a saraa la wa,
ń bɛ́ waa nɛ piì mɛn la,
ǹ tá re boe n giulun.
28Ń digolon nə kɔlɔ mɛn da tán
gèlè la wurun, ń nyan zɔ̃ wa.
29Min mɛn bɛ́ dí nyɛɛ
sɔnbɔraanɛ,
ga bɛa dɛnaa ganaa.
Á boe la a wo n din nyaa kii ni,
bɛ á soɛ a giã minin bii,
ǹ nə́ ǹ ba ǹ mɛnɛn doɛ̃ wa.
اکنون انتخاب شده:
Suu 22: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.