Suu 16
16
Dɛnaa Lawa a minin tamaa
1Minbuiin nɛ n sii lɛ boe,
sɛnɛ a yɔrɔ yɛ n boe
Dɛnaa Lawa li.
2Minbuiin nɛ n taasɛ mà asɛ n sii
sonbore zɛnɛɛ biikoo tumaa li.
Sɛnɛ, Dɛnaa Lawa n kiri we
foo ganaa.
3N bɛ́ sii mɛn tumaa zɛnɛɛ,
a sii wɔ Dɛnaa Lawa gɔn.
Ń sii mɛn lɛ bɔ, bɛ á re yɔrɔ yii.
4Mìi n Dɛnaa Lawa a sii
zɛnaa tumaa la ka te.
A na á min baraan dɔn zɛnaa
koe pinaa taman yii.
5Din gole-kɔlin tìĩ n boe-n
Dɛnaa Lawa nyin ni,
ǹ dɔlɔ bɔ ma-a a sàabiɛ wa.
6Min mɛn bɛ́ bɔlɔgoondɛnaa lɛa,
a sãn tá re n toɛ nɛ.
Min mɛn bɛ́ nyɛ́ɛ biɛ
Dɛnaa Lawa yii ni,
a nə n wɔlɔ lui sii baraa ganaa.
7Bɛ̀ min a giã ǹ gɔn kaa Dɛnaa Lawa foo la,
a n kiɛ kun ka a zɔ́ɔn dinin ni.
8Màn boɛɛn yɛ
peperebaa gɔ́ɔ̃ nɛ á soɛ
màn gigiã yɛ soɛ gɔ́ɔ̃-n nɛ.
9Minbuiin nɛn manə ǹ zii boe,
sɛnɛ, Dɛnaa Lawa n tɔ wɔ bǐɛ̃ koe.
Kiin wɔ paǹ li
10Kii n boo diɛ ka Dɛnaa Lawa tɔ nɛ.
Bɛ̀ á kiri we, a siɛ̃ wa.
11Màn zɔɔ̃ ǹ kilo laanka
a tasanan man Dɛnaa Lawa wɔ lɛa.
A din na á ǹ tumaa zɛnaa.
12Sii baraa tìĩ n boe ne
kii nyin ni.
Taãn nɛ, bɛ̀ n sii bǐɛ̃ zɛnaa,
n kiibaa gòã n we tán.
13Min mɛn bɛ́ boo diɛ kii ni
ka peperebaa nɛ,
bɛ n kiɛ a foo la.
Sonbore-pɛli n kɔɔ̃n a ganaa.
14Kii a foo-yoo á min we gɛ̀ gɔn,
sɛnɛ, sii-dɔ̃li á boe la
a na a foo waa.
15Bɛ̀ kii yaa wɔ,
bɛ n yiikoonaabaa lɛa.
A bǐɛ̃baa n ka la bibinaa bɛ́ lɔn.
Giã ǹ gɔn sonbore wɔ paǹ li
16Sii-doɛ̃ á soɛ sana nɛ.
Yiridɛnaabaa á soɛ wɔrɔ nɛ.
17Min pepere nə n nyɛnɛɛ
baraa nɛ.
Min mɛn bɛ́ n yiri koɛ
a din a giã ǹ gɔn li,
a nə n nyin tamɛɛ.
18Din gole kɔ n die mɛnaa nɛ.
Din koa n die ka bɔ̀n nɛ.
19Giã doɛ̃ kiĩn kun
ka doobaan nɛ,
á soɛ zia mànan gii kun
ka din gole-kɔlin ni.
20Min mɛn bɛ́ taasiɛ we sii ganaa
a belebɔ nɛ,
a sii n bǐɛ̃ koe.
Min mɛnɛn bɛ́ n foo doɛ
Dɛnaa Lawa ganaa,
gɛrɛsiɛdɛnan manɛ.
21Min mɛn bɛ́ kiri kuri
ka sii-doɛ̃ nɛ,
yiridɛnaa nɛ.
Bɛ̀ boo sonbore soo a lɛ-n
a n min tumaa yiri wɛɛ.
22Bɛ̀ doɛ̃ tá min mɛn gɔn,
a n yiikoonaabaa ǹ mu yala lɛa.
Sɛnɛ, baãnaan dɔlɔ n ka
ǹ baãnaabaa nɛ.
23Sii-dɔ̃li nə n taasɛ a tɔn boo da.
Ka bɛ nɛ,
a n boe la
a ǹ miãn yiri waa
ka a da ǹ boon ne.
24Boo kɔɔ̃n nə ka zoo nyɔɔ bɛ́ lɔn,
a n foo basɛ̃, a n gɔ̀nɔn bǐɛ̃ koe.
25 #
Suu 14.12
Min tá boe la a taasɛ
mà asɛ a giã ǹ gɔn tá siĩni
a da yaa dɔn a n woe-n gɛ̀ ganaa.
26Dí-nyali nɔ̀ n diɛ dí nyɛɛ ganaa,
a giala, a nə n siɛ a lɛn gɔ́ɔ̃ li.
27Min gɔ́ɔ̃ baraa a sii tumaa n
doa-n baraa zɛnaa ganaa.
A lɛ gɔ́ɔ̃ ǹ boo n ka tɛ bɛ́ lɔn
kuĩ girigiri.
28Min gɛsɛ n zia yiɛ.
Tenten nə giaáran niɛ̃ kɔn.
29Min kakaarɛ nə ǹ miãn siɛ̃
á ǹ diɛ zii baraa la.
30Min mɛn bɛ́ ń yii tiɛ̃,
sii baraa zɛnaa ná a gɔ́ɔ̃ nɛ,
bɛ̀ á n lɛ məə,
bɛ n nyɛɛ mà á sii baraa lɛ zɛnaa.
31Nyin sasa n saraa sonbore lɛa,
min mɛnɛn bɛ́ sii sonbore zɛnɛɛ,
bɛn man yii.
32Min mɛn foo bɛ́ a yui wa,
á soɛ gɔ̀lɔ̀ nɛ.
Min mɛn bɛ́ boe a din la,
á soɛ zia mìinaa nɛ.
33Minin tá boe la ǹ nə n pã,
sɛnɛ, Dɛnaa Lawa
na a tumaa yɔrɔ boe.
اکنون انتخاب شده:
Suu 16: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.