Suu 13
13
1Nɛnyaan yiridɛnaa nə
ǹ di a gɔn waa ma-n sii.
Sɛnɛ, nɛnyaan mɛn laadoo bɛ́ a bie
ka sii kɔn nɛ wa,
bɛa n too koe doroo li wa.
2Min tá boe la a màn bii
a lɛ gɔ́ɔ̃ ǹ boo barka nɛ.
Sɛnɛ, min mɛnɛn bɛ́ baraa zɛnɛɛ,
kakaarɛɛbaa boro n bɛn ganaa.
3Min mɛn bɛ́ yiri boe
a din a da ǹ boo li,
a nə nyin tamɛɛ.
Sɛnɛ, min mɛn bɛ́ boo sawɛɛ,
nɔmaa n die bɛ yii.
4Yoonaa nə n yiri koɛ màn gigiã-a
sɛnɛ, a ba ǹ kɔn yii wa.
Gɔ̀nɔndɛnaa bɛ́ giɛ màn mɛn li,
a n bɛ yii.
5Sii sonbore-zɛnaali soɛ̃ n ka
soɛ nɛ.
Sɛnɛ sii baraa-zɛnaali n sɔ kiɛ
ǹ miãn la,
a n sìi diɛ ǹ ganaa.
6Bɛ̀ peperebaa
á min sonbore nyin tamɛɛ,
sii baraa n min baraa nyin boe.
7Min tɛnɛn manə
ǹ dinin biɛ pàãman lɛa,
màn kɔn dɔ ná a ba ǹ gɔn wa.
Ǹ tɛnɛn dɔn manə
ǹ dinin biɛ doobaan lɛa,
ǹ gɔn màn dɔ n
mɔnaa-n taãn-taãnɛ.
8Pàãma gɔn màn na a nyin tamɛɛ.
Sɛnɛ, min kɔn ba yui
doobaa gialaa wa.
9Min mɛnɛn bɛ́ sii sonbore zɛnɛɛ,
ǹ foo n kɔɔ̃n duduu.
Sɛnɛ, min baraan man ka
bolon tɛ bɛ́ lɔn nimi.
10Din gole kɔlen man zia yiɛ.
Sɛnɛ, min mɛnɛn bɛ́ lɛ koe
doroo ganaa,
sii-doɛ̃ n bɛn wɔ lɛa.
11Naforo mɛn bɛ́ yii bǎã goon ne,
bɛ n nyɛɛ fufuu.
Ǹ mɛn yɛ boɛ boɛ,
bɛ n woe nyɛɛnɛ.
12Bɛ̀ min nə n yii da màn la
á belebɔ nɛ,
a foo n ziziɛ̃.
Sɛnɛ, n yiri bɛ́ màn mɛn ganaa,
bɛ̀ n bɛ yɛ,
a n goon ka yiikoonaabaa da nɛ.
13Bɛ̀ min nə n piã ka doroo ne,
a lɛ á re we ǹ dɛnaa ganaa.
Sɛnɛ, bɛ̀ min mɛn dí-pɛ tamaa,
á re a saraa yii.
14Sii-dɔ̃li a daraa n
yiikoonaabaa ǹ mu yala lɛa.
Sãn mɛnɛn bɛ́ die ka gɛ̀ nɛ,
a n toɛ min nə n nyɛnaa
bɛn manɛ.
15Yiri sonbore bɛ́ min mɛn nɛ,
bɛa dɛnaa n kɔɔ̃n minin ganaa.
Sɛnɛ min baraan n zii baraa la.
16Min mɛn yiri bɛ́ a din li,
a nə n taasɛ a tɔn sii zɛnaa.
Sɛnɛ, baãnaa sɛ
na a gaãnaabaa nyɛɛ.
17Dia dí-a wole baraa
n die ka koe ne.
Sɛnɛ, dia dí-a wole bɔlɔgoondɛnaa
n die ka yii-nyɛɛ nɛ.
18Min mɛnɛn bɛ́ n piɛ̃
ka doroo ne,
doobaabaa laanka sìi n
bɛn wɔ lɛa.
Sɛnɛ, min mɛnɛn bɛ
lɛ koe doroon ganaa,
yii gugurubaa n bɛn wɔ lɛa.
19Taasɛ sii ganaa
a yɔrɔ yɛ n kɔɔ̃n foo ganaa.
Sɛnɛ baãnaan a wusoo
si baraa kio ba kɔɔ̃n a wa.
20Bɛ̀ n koa kun ka sii-dɔ̃li ni,
ma n sii-dɔ̃li biɛ.
Bɛ̀ n koa kun baãnaa nɛ,
n tá re nɔmaa we.
21Koe n sii baraa-zɛnaalin kio.
Sɛnɛ là nyantoro n
sii bǐɛ̃ baraa-zɛnaalin saraa lɛa.
22Min mɛn bɛ́ sii bǐɛ̃ zɛnɛɛ,
a n kíɛ̃ koɛ a nɔ̀ɔnɔn manɛ.
Sɛnɛ, sii baraa-zɛnaali a naforo n
sii sonbore-zɛnaalin wɔ lɛa.
23Doobaa a wuru mɛn nə n kɔsɔ
sɔnbɔraanɛ,
màn-bii gigiã n yii a nɛ.
Sɛnɛ, min kɔkɔrɔ pàã n nyɛɛ
boɛ boɛ.
24Min mɛn bɛ́ a ba a nɛ dii wa,
a na a ba narɛ wa.
Sɛnɛ, ǹ mɛn bɛ́ a wɔ doree,
bɛ n nyɛɛ mà a n narɛ.
25Min mɛn bɛ́ sii sonbore zɛnɛɛ,
á re màn-bii a kã.
Sɛnɛ, min mɛnɛn bɛ́
sii baraa zɛnɛɛ,
bɛn tá re bòo koe.
اکنون انتخاب شده:
Suu 13: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.