MNS 35
35
Kiwin mɛnɛn nə dɔ Levii tɔrɔn ganaa
1 #
Zoz 21.1-42
Dɛnaa Lawa boo da ka Muizu ni, Moabu gána a nyankɔrɔ lɛ kɛ nɛ, kunu Zurdɛ̃ tà li, Zerikoo kiwi yɔrɔ-a, á pɛ: 2A pɛ Izirayeli minin lɛn nɛ, mà bǎã mɛn bɛ́ re doe ǹ ganaa ǹ wɔ gii lɛa, mà ǹ die ǹ kiwin kɔnɔn bɔ bɛ nɛ ǹ nə ǹ kɔ *Levii tɔrɔn kɛn la, ǹ giã ǹ nɛ. Ǹ die ǹ bǎã dɔ kɔ ǹ la bɛa kiwin kɛn lɛn lɛkoro-a, kiwin lɛn nə goã bii. 3Bɛa kiwin kɛn lɛn tá re Levii tɔrɔn lɛn giã ǹ bǎãn biɛ, kiwin lɛn lɛkoro lɛ-a bǎãn kɛn nə goã ǹ tɔɔn laanka ǹ gɔn mànan wɔ lɛa, ka ǹ tɔɔ màn tumaa nɛ. 4Ka bɛ́ re bǎãn mɛnɛn koe Levii tɔrɔn lɛn la kiwin lɛn lɛkoro-a, bɛn gogoonmaa doamaa nɛ a saa tán kiwi lɛ a kungɔn li, a n lɛ bɔ li ka a kio ne, a wo dɔ mɛtərə biɛsooro kungɔn lɛ paǹ yii ganaa. 5Kiwi lɛ a kanaa wɔlɔ-a, ka mɛtərə duu goon zɔɔ̃ lɛ̀giala gɔn la, ka mɛtərə duu goon zɔɔ̃ gusin a lɛ̀gɔn la, ka mɛtərə duu goon zɔɔ̃ lɛ̀nyɛɛn gɔn la, ka mɛtərə duu goon zɔɔ̃ gɔsɛ a lɛ̀gɔn la, kiwi lɛ goã bii, bɛn lɛn man die ǹ bǎãn biɛ kiwi Lɛkoro-a. 6Ka die ka mìi duru ǹ kiwi sɔrɔ kɛ kɔ Levii tɔrɔn lɛn la, bɛa kiwin mɛnɛn lɛn nə́ ke, bɛ̀ min nə́ gɛ̀ dɛ, ǹ dɛnaa ná a bie á zɛnaa woon wa, á n boe la a baa si a wo n duru ǹ ni. Ka die ka kiwi pusiwenpaa kɔsɔ dɔ kɔ ǹ la. 7Ka bɛ́ re kiwin mɛnɛn koe Levii tɔrɔn lɛn la, ǹ tumaa a kaa kun nə goɛ̃ kiwi pusiwenkiwisi, ǹ gogoonmaa laanka a lɛkoro lɛ-a bǎãn nɛ. 8Bɛa kiwin kɛn lɛn ka tá re ǹ pɔrɛɛ Izirayeli minin bǎãn nɛ, bɛ̀ ǹ mɛnɛn kiwin tá mɔnaa nɛ, ka die ka bɛn wɔ baa didi, bɛ̀ ǹ mɛnɛn kiwin ba tɛ wa, ka baran bɛn wɔ baa didi wa. Bǎã mɛn dɔ tɔrɔ lɛ a gogoonmaa ganaa, didie n die a kiwin lɛn koe Levii tɔrɔn lɛn la, a zɛnɛ bɛ lɛ.
Gɛ̀-dɛlen duru ǹ kiwin
9 #
TDP 19.2-4; Zoz 20.1-9 Dɛnaa Lawa boo da Muizu ni á pɛ: 10mà a boo da ka Izirayeli minin lɛn nɛ, a pɛ ǹ nɛ: «Bɛ̀ ka Zurdɛ̃ tà lɛ kuru ka wɔ Kanaan gána nɛ, 11ka die ka kiwin kɔnɔn bɔ ka ǹ koa mìi duru ǹ bǎãn lɛa. Bɛ̀ min mɛn nə́ gɛ̀ dɛ, ǹ dɛnaa ná a bie á zɛnaa woo-n wa, ǹ dɛnaa die a wo n duru walan. 12Bɛa kiwin kɛn lɛn man die goɛ̃ ka gɔn, mìi duru ǹ kiwin lɛa gɛ̀ dòo-bɔle nyɛɛnɛ, màn mɛn bɛ́ toɛ gɛ̀-dɛle lɛ baran gã, bɛ̀ zaman lɛ ná a tɔn kiri wɔ a ganaa wa. 13Mìi duru ǹ kiwin lɛn man die goɛ̃ kiwi sɔrɔ, 14sɔɔ ń Zurdɛ̃ tà kio, sɔɔ dɔ ń Kanaan gána nɛ. 15Bɛa kiwi sɔrɔ kɛ lɛ n die mìi duru ǹ bǎã biɛ Izirayeli minin lɛn gɔn, ka gùli laanka min mɛn dɔ á ke tii biɛ ǹ li. Bɛ̀ min woo min gɛ̀ dɛ, ǹ dɛnaa ná a bie á zɛnaa woon wa, á boe la a wo n duru bɛa kiwin kɛn lɛn goon ne. 16Sɛnɛ, bɛ̀ min nə́ ǹ miã dɛ ka fɔlɔ màn nɛ yǎa a gã, bɛa dɛnaa n gɛ̀ woon dɛli lɛa, ǹ doamaa nɛ ǹ na a dɔ dɛ.
17Bɛ̀ min nə́ n miã dɛ ka kɔlɔ nɛ yǎa a na a gɛ̀ giala baa, gɛ̀ woon dɛli n ka bɛa dɛnaa nɛ, ǹ doamaa nɛ ǹ nà a dɔ dɛ a gã. 18Bɛ̀ min nə́ n miã dɛ ka gɛ̀ dɛ ǹ màn nɛ gɔn lɛa yǎa a gã, gɛ̀ woon dɛli n ka bɛa dɛnaa nɛ, ǹ doamaa nɛ ǹ nà a dɔ dɛ a gã. 19Gɛ̀-wɔle lɛ a gɛ̀-dòo bɔ bɛ́ doe min mɛn ganaa, bɛ doamaa nɛ a gɛ̀-dɛli lɛ dɛ a gã: bɛ̀ gɛ̀ dòo-bɔle lɛ kaa lɛ lɔn gɔrɔ, a dɛ. 20Bɛ̀ min nə́ ǹ miã nyanaa ka zɔ́ɔbaa nɛ, hinlaa bɛ̀ á màn zũ ǹ miã nɛ ka gɔ́ɔ̃ tìbaa nɛ yǎa bɛa miã lɛ gã, 21hinlaa bɛ̀ á n gɔn munu á dɛ nɛ ka baraabaa nɛ yǎa a gã, gɛ̀ woon dɛli n ka ǹ dɛnaa nɛ. Ǹ doamaa nɛ ǹ na a dɔ dɛ a gã. Gɛ̀-wɔle lɛ a gɛ̀ dòo bɔ bɛ́ doe min mɛn ganaa, bɛ̀ bɛ́ kaa lɛ lɔn gɔrɔ, a dɛ a gã.
22Sɛnɛ, a tá boe la a n zɛnaa, min nə n miã nyanaa, bɛa miã lɛ gã, a da yǎa ǹ dɛnaa ná a bɛa taasiɛ wɔ wa, a ná a zɛnaa ka zɔ́ɔbaa-n wa, hinlaa min tá boe la a màn zũ a wo n miã kũ, baraa zɛnaa ná a bie ǹ dɛnaa yiri-n wa. 23Min dɔ á boe la a kɔlɔ bɔ a da ǹ miã la a gã, a yii ná a ǹ miã lɛ yɛ wa, ǹ miã lɛ ná a bie a zɔ́ɔ lɛa wa, a ná a bie giɛ li dɔn a baraa zɛnaa-n wa. 24Zaman lɛ n die bɛ miã sii lɛ yɔrɔ boe gɛ̀-dɛle lɛ laanka gɛ̀ dòo-bɔle lɛ biin ni, a kɔnpɛ ka a yɔrɔ bɔ ǹ gɔnɔn kɛn nɛ. 25Zaman lɛ die a gɛ̀-dɛle lɛ si gɛ̀ dòo-bɔle lɛ la ǹ da. Gɛ̀-dɛli lɛ goã á woo n mìi duru duru ǹ kiwi mɛn nɛ, zaman lɛ die ǹ kũ ǹ wo-n walan doo. A die a goã walan yǎa Lawa a wúlu-bɔlen kiã kɛ giɛ̃, ǹ nyɔɔ sonbore lɔ ǹ mɛn lɛ-a, ǹ nə́ koa. 26Sɛnɛ, gɛ̀-dɛle lɛ wo n duru duru ǹ kiwi mɛn nɛ, bɛ̀ á bɛ da a kio, 27yǎa gɛ̀ dòo-bɔle lɛ yɛ bǎã kɔsɔ nɛ, bɛ ná a bie ka duru ǹ kiwi kɛ-n wa, bɛ̀ gɛ̀ dòo-bɔle lɛ dɛ, gɛ̀ lɛ a dɔlɔ ba kuĩ a mìi-n wa. 28Sonbore, gɛ̀-dɛle lɛ doamaa nɛ a giã mìi duru ǹ kiwi lɛ nɛ, yǎa Lawa a wúlu-bɔlen kiã lɛ giɛ̃. Bɛa gɛ̀ kio, á boe la a wusoo a da a giã ǹ bǎã nɛ.
29Bɛ n die goɛ̃ sii zɛnaa ǹ gɔn lɛa Izirayeli minin mìi ni biikoo yii li, ta maǹ bǎã woo bǎã nɛ. 30#TDP 17.6; 19.15 Gɛ̀-dɛ sii tumaa gɔ́ɔ̃ nɛ, gɛ̀-dɛle lɛ ba n dii, bɛ̀ siére didi ná a boo da wa. Ka a boe la ka gɛ̀ dɔlɔ bɔ min ganaa, siére goon dinsɔɔ̃ a da ǹ boo taman yii wa. 31Bɛ̀ gɛ-dɛli mɛn doamaa-n ka gɛ̀ nɛ, ka baran toa ka paa si, ka a yii toa koo wa. Ka dɛ a gã. 32Bɛ̀ gɛ̀-dɛle mɛn dɔ́ baa si á woo n duru duru ǹ kiwi, ka baran toa ka lɛ kɔ ka paa si bɛ dɔ la, a n bɔyaa a da a giã ǹ bǎã nɛ, Lawa a wúlu-bɔlen kiã kɛ ná a tɔn gã wa. 33Ka bɛ́ re goɛ̃ gána mɛn lɛ nɛ, ka doamaa bie ka bɛ gɔgɔrɛ kɔ wa. Sonbore, gɛ̀-dɛ n sii lɛa, sii mɛn nə́ ke gána gɔgɔrɛ koe. Bɛ̀ ǹ nə́ mà kaa gána lɛ nɛ, màn kɔn ba boe la a bɛ tuturu wa, yǎa mà-kaali lɛ mà. 34Gána mɛn lɛ bɛ́ ka n die giɛ̃ a nɛ, masɛ dinmaa dɔ́ n die goɛ̃ ka bii a nɛ, ka die ka yiri bɔ kəni, ka baran bɛ gɔgɔrɛ kɔ wa. Masɛ din nə Dɛnaa Lawa lɛa, má ń Izirayeli minin lɛn bii.»
اکنون انتخاب شده:
MNS 35: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.