Mat 4
4
Sɛtaan a da Yezu gɔ́ɔ̃ li
(Mar 1.12-13; Luk 4.1-13)
1 #
Ebr 2.18; 4.15 Bɛ kio, Yiri Fu mɛ Yezu nyɛɛnɛ, á woo-n diə gole ne, màn mɛn bɛ́ toɛ *Sɛtaan nə n da a gɔ́ɔ̃ li walan. 2Yezu bɛ́ á lɛawaa pusi laanka tèlò pusi zɛnaa, a ná a màn bii wa, bòo kũ. 3Da minin gɔ́ɔ̃ li wole lɛ tɔ́n nə́ n zɔ̃ á dɔ a li, á pɛ nɛ: «Bɛ̀ ń tá Lawa a Nɛgiĩ lɛa sonbore, a pɛ kɔlɔn kɛn manɛ, mà ǹ nə n bɔyaa ǹ nə n baa màn-bii lɛa.»
4 #
TDP 8.3
Yezu tɔ́n pɛ nɛ:
– A tá kiɛ̃-n Lawa a boo-n kɛnɛn: «Màn-bii dinsɔɔ̃ bie minbuiin nɛ toe wa. Boo woo boo tá boe Lawa lɛ-n, bɛ lɛ n min toe.»
5Bɛ kio, Sɛtaan nə́ woo ne Lawa a kion mìi ni Zeruzalɛmu kiwi sonbore kɛ nɛ, 6#Loe 91.11-12 á pɛ nɛ:
– Bɛ̀ n tá Lawa a Nɛgiĩ lɛa sonbore, n toa walan n furəə tán. A giala a tá kiɛ̃ nɛ Lawa a boo-n kɛnɛn: «Lawa á re pii a dia dí-a wolen manɛ, mà ǹ nə n gɔn koa n li ǹ nə n yo lon, màn mɛn bɛ́ toɛ, n baran n gòã na kɔlɔ ganaa wa.»
7 #
TDP 6.16
Yezu tɔ́n pɛ nɛ:
– Lawa a boo lɛ pɛ dɔn: «N baran n da n Dɛnaa Lawa gɔ́ɔ̃ li wa.»
8Sɛtaan nə́ wusoo á kũ doo á woo ne kele sasa goon mìi ni, á kanaa laanka a siĩnbaa din tumaa nyaa nɛ. 9Á tɔ́n pɛ nɛ: «Bɛ̀ ń lɛ kɔ n kaa tán masɛ giulun, n masɛ guguru kɔ, masɛ n kɛ din tumaa koe n la.»
10 #
TDP 6.13
Yezu tɔ́n pɛ nɛ:
– N tan n nə n bɔ kànaa, Sɛtaan! A giala, a kiɛ̃maa tá Lawa a boo ne: «Kaa tán n Dɛnaa Lawa dinsɔɔ̃ yɔrɔ-a n na a guguru kɔ.»
11Bɛ kio, Sɛtaan kiɛ̃ á toa walan. Lon a dia dí-a wolen nə́ daa Yezu li, ǹ ná a laadoo bǐɛ̃ kɔ.
Yezu na a dí giala kɔ Galilee gána-n lɔn
(Mar 1.14-15; Luk 4.14-15)
12 #
Mat 14.3; Mar 6.17; Luk 3.19-20 Yezu bɛ́ á ma mà ǹ nə́ Zaã kũ ǹ nə́ da kòso-n, á n zɔ̃ á woo Galilee gána nɛ. 13#Zaã 2.12 A golee Nazarɛti kiwi wa. A na á kiɛ̃ á woo giã Kafaranaamu. Bɛ n Galilee tà lɛkoro-a ǹ kiwi goon lɛa, Zabulɔn laanka Nɛfutalii gána nɛ. 14Kɛ na á n zɛnaa á kaa Lawa a boo gii-dali Izayii a boo kɛ lɛ:
15 #
Iza 8.23–9.1
Zabulɔn gána laanka Nɛfutalii gána
ke Zurdɛ̃ tà kio,
bɛa gána kɛ lɛ ǹ nə bíi Galilee,
tɔrɔ kɔsɔn giã ǹ bǎã lɛa sisia,
16 Tɔrɔ mɛn nə́ ke tɔ we wɔlɔ tì li,
bɛ á re wɔlɔ fúlu gole yii.
Min mɛnɛn bɛ́ gána tì ni, geren piɛ,
wɔlɔ fúlu á re boe bɛn manɛ.
17 #
Mat 3.2
A kũ a da Galilee biikoo lɛ ganaa, Yezu ná a giala kɔ á Boo Tii Kɔɔ̃n pɛ. A na á goã pii: «Ka n taasɛ ka wusoo kaa sii baraan kio, a giala, Lawa n die a kiibaa ǹ dí lɛ nyɛɛ wɔsɛn bii sisia.»
Yezu zɔ̀-kũli min sii mɛn bíi
(Mar 1.16-20; Luk 5.1-11)
18Yezu bɛ́ kiɛ̃ Galilee tà lɛ-a, á dɔɔ̃ngiĩ min paa yɛ, ǹ nə́ zɔ̀-kũlin lɛa: Ǹ bɛ́ Simɔn mɛn bíi Piɛrɛ, bɛ laanka ǹ dɔɔ̃n Andre ne. Maǹ nə́ goã zɔ̀ɔ zuĩ tà mu li, ǹ nə́ zɔ̀ kuĩ. 19Yezu tɔ́n pɛ ǹ nɛ: «Ka kɔ ma kio lɛ, ma á re ka biɛ ga minin li wolen lɛa Lawa nɛ.»
20Bɛa bǎã-n gɔrɔ, ǹ nə́ ǹ zɔ̀ɔn toa walan, ǹ nə́ kɔ a kio lɛ.
21Á n zɔ̃ á woo nyɛɛnɛ, á dɔɔ̃ngiĩ min paa yɛ doo, Zaaki laanka Zaã nɛ, Zebedee a nɛnyaanan manɛ. Maǹ nə́ goã tà kuru ǹ goo ne, kun ka ǹ di Zebedee ne, ǹ zɔ̀ɔn zɛnɛɛ. Yezu lɛ dia ǹ la. 22Bɛa bǎã-n gɔrɔ, ǹ nə́ ǹ di toa walan ka goo lɛ nɛ, ǹ nə́ kɔ Yezu kio lɛ.
Yezu a minin daraa, ka a busulən kaka kɔ
23 #
Mat 9.35; Mar 1.39 Yezu na á goã n bibiĩ Galilee gána din tumaa nɛ, bɛ̀ a minin daraa Zuifun lɛsɔkɔn kionən ne. Á goã lon a kiibaa ǹ Boo Tii Kɔɔ̃n lɛ pii. A na á goã minin busu tɔrɔ din tumaa nyɛɛ bɛ̀ a bɔ ǹ ganaa. 24Yezu tɔ bɔ gána lɛ din tumaa nɛ, yǎa á woo dɔ Siirii gána nɛ. Bɛ lɛ na á toa min mɛnɛn bɛ́ ǹ nə́ goã nɔmaa-n busu tɔrɔ gigiã gɔn, busii n die ǹ dii, ǹ nə́ daa ka bɛn nɛ a li. Nɔ̀ɔnɔn bɛ́ ǹ nə́ goã min mɛnɛn ganaa, gigirisandɛnan nɛ, ka min paǹ paa gere-an nɛ, ǹ nə́ daa ka bɛ din tumaa nɛ, Yezu nə́ ǹ busu nya. 25Zaman gigiã kɔ a kio lɛ, ǹ tɛn nə boe Galilee gána nɛ, ǹ tɛn nə boe Kiwi Fu gána nɛ, ǹ tɛn nə boe Zudee gána nɛ, Zeruzalɛmu minin dinin man ka ǹ tɛn nɛ, ǹ tɛn dɔn Zurdɛ̃ tà kio minin lɛa.
اکنون انتخاب شده:
Mat 4: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.
