Zer 6
6
Koe n die Zeruzalɛmu ganaa
1Bɛnzamɛn tɔrɔn lɛn,
ka soo ka n bɔ Zeruzalɛmu!
Ka n duru bǎã kɔsɔ nɛ.
Ka sère gɔ̀lɔ̀ bɛn pɛ Tekoa,
ka sii giala pɛ ǹ màn
doa tán Bɛti-kerɛmu.
A giala, koe n die, koe taãn-taãn lɛa,
boe gɔsɛ a lɛ̀gɔn la.
2Á ke, *Siɔn nə die yui,
kiwi siĩn sonbore ke!
3Tɔɔ-lɛduəlin tá re die a gialaa,
kun ka ǹ tɔɔn tumaa nɛ.
Ǹ tá re mɔnaa kionən doe
ǹ na a lɛnpɛnɛ nɛ.
Didie á re a tɔɔn lɛduĩ a bǎã nɛ.
4Maǹ nə́ n lɛ dii:
«Ka yoo! Wɔ n yɔrɔ bɔ zia taman yii!
Ka wɔ n ta Zeruzalɛmu
gialaa, penleen!
Ebe! Wasa mɛ,
da wúlun nə́ sasa kɔ.
5Ka yoo! Ka wɔ n ta a gialaa tèlò-n,
wɔ a kion sonboren kɛn ziziɛ̃!»
6Dɛnaa Lawa Pàãyiidɛnaa a da ǹ boo
á ke:
«Ka dan kuru,
ka ziabaa ǹ kungɔn dɔ
Zeruzalɛmu ganaa.»
Kiwi mɛn doamaa bɛ-n ka dɔlɔ nɛ,
asɛ mɛn a sii tumaa bɛ́
ka kakaarɛbaa nɛ.
7Mu piã bɛ́ a mu sui lɔn,
a dɔ na a baraabaa lɛ sui miɛ̃.
A kiwi bii,
kakaarɛbaa laanka wɔlɔ yui
dinsɔɔ̃ boo na a tan.
Biikoo tumaa li,
nɔmaa laanka busulɛn
man ma yii giulun.
8Zeruzalɛmu,
lɛ kɔ maa doroon ganaa,
bɛ bie wa,
man die n lɛ boe n ganaa,
ma n baa diə gole lɛa,
tán lɛa min ná a boe la a giã la wa.
Zaman nə́ n piã ka too kɔ nɛ
Dɛnaa Lawa
9Dɛnaa Lawa Pàãyiidɛnaa a da ǹ boo
á ke:
Izirayeli min gialakunun kɛn,
ka ǹ tumaa goa,
ka rezɛ̃ bɛ́ lɔn wuru-n.
Ka n gɔn talaa *rezɛ̃ da lɛ la
doo gunyin damata,
ka ǹ dɛnaa bɛ́ zɛnɛɛ lɔn
kaa-piɛ waáraa.
Zeremii
10Ma doamaa nɛ ma boo da die ne?
Ma doamaa nɛ man gɔn waa die ne,
a n too kɔ ma lon?
Ǹ too tiɛ̃maa nɛ,
ǹ ba n too koe doɛ̃ wa.
Ǹ laadoo bie ka Dɛnaa Lawa
a boo-n wa.
Ǹ ba li wa.
11Ma piɛ̃maa-n ka Dɛnaa Lawa
a foo-busii ni.
Ma a boe la ma kũ ma foo n doo wa.
Dɛnaa Lawa
Bɛa foo-yoo lɛ sawaa nɛnyaanan
la zii la,
kɔnlɛ ka nɛ tenən tumaa nɛ.
Ǹ tumaa tá re kòso nɛn biɛ,
giĩn ni lɔn nɛ,
min golen ne ka min zizin ni.
12 #
Zer 8.10-12
Ǹ kionən tá re min kɔsɔn wɔ biɛ,
kɔnlɛ ka ǹ wurun ni ka ǹ lɔn nɛ.
Ma á re n gɔn siɛ gána kɛa minin li.
Dɛnaa Lawa a da ǹ boo ne.
13A giala,
a kũ ǹ boɛɛndɛnaa ganaa
a wo ǹ goledɛnaa yaa,
ǹ tumaa n giɛ là li.
A kũ ǹ Lawa a boo gii-dalin ganaa
a wo ǹ Lawa a wúlu-bɔlen yaa,
ǹ tumaa n kɔkɔrɔ.
14 #
Eze 13.10
Koe mɛn bɛ́ maa zaman lɛ mìi ni,
ǹ ba bɛ biɛ ǹ parsii lɛa wa.
Maǹ pii:
«Sii kɔn banban, sii kɔn banban!»
A da yaa, sii tan.
15Ǹ sii bɔbɔnɛɛn mɛnɛn zɛnaa,
bɛa sìi tá ǹ ganaa?
Kɛnɛn dinin wa!
A ǹ mìi da kuməə ganaa wa.
Bɛ lɛ nɛ, ǹ tá re mɛnɛɛ kun
ka mɛnaa wolen ne.
Bɛ̀ ma yoo ǹ gialaa,
ǹ tá re woe n dinin yiɛ tán.
Dɛnaa Lawa a da ǹ boo ne.
16Dɛnaa Lawa bɛ màn mɛn pii á ke:
Ka zii mɛn saa,
ka golee bɛ la, ka n taasɛ.
Ka nɔ̀n da lɛlɛ ǹ ziin kɛn nɛ,
ka ga zii lɛ a sonbore li,
ka kɔ lɛ.
Ka bɛ nɛ,
ka á re susui yii
ka dinin wɔ lɛa.
Sɛnɛ, ǹ nə́ pɛ kɛnɛn:
«Wɔ a re koe lɛ wa.»
17Má minin bɔ má ǹ koa máa ǹ nə n gɔn waa ǹ nɛ:
«Bɛ̀ ka sère gɔ̀lɔ̀ bɛn wuu ma,
ka yiri bɔ.»
Sɛnɛ, ǹ nə́ pɛ:
«Wɔ laadoo bie wa.»
18Bɛ lɛ nɛ, tɔrɔ kɔsɔn lɛn,
ka n too kɔ.
Sii mɛn bɛ́ re ǹ yii ka tumaa bɛ dɔ̃.
19Ka n too kɔ kanaa tumaa a tɔrɔn:
Man die koe boe minin kɛn ganaa.
Ǹ dí mɛn lɛ bɔ, bɛ lɛ a binyəə ne.
Ma boo mɛn da ǹ nɛ,
ǹ yiri bɔ bɛ li wa.
Ǹ nə́ n piã ka maa dí-pɛn nɛ.
20Ka bɛ́ boe da yon gìĩ kɔɔ̃n nɛ
Sabaa ka n die ne,
ka gána sɔsɔɔ buu gìĩ kɔɔ̃n kɛ
nɛ masɛ wɔ lɛa,
bɛ là n ka wàa-n kəni?
Kaa *wúlu màn tiɛ̃n kɛn,
ma ba ǹ li wa.
Kaa wúlu mànan kɛn
ba kɔɔ̃n ma ganaa wa.
21Dɛnaa Lawa bɛ́ boo mɛn diɛ, á ke:
Man die màn koɛ tán zaman
kɛ nyɛɛnɛ,
a ǹ bɔ a ǹ kaa.
Ǹ tumaa á re giɛ̃ kun,
díin laanka nɛnyaanan nɛ,
miãkɛn laanka giaáran nɛ.
Zɔ́ɔn boe gɔsɛ a lɛ̀gɔn la die
Dɛnaa Lawa
22Dɛnaa Lawa bɛ́ boo mɛn pii, á ke:
Tɔrɔ goon nə boe gɔsɛ a lɛ̀gɔn li die.
Zaman gole kɔ́n nə n toɛ kanaa
lɛ dan ganaa die.
23Ziabaa ǹ mànan manə
ǹ sɔraasin gɔn,
sa laanka ziabaa ǹ màn lɛ
pɛpɛnɛn nə́ ǹ gɔn.
Maǹ baraa, ǹ ba makara doɛ̃ wa.
Ǹ bìn diɛ wuu n boe ka yìsi mu
gole a ginii bɛ́ lɔn.
Maǹ sùin la, telee-n kɔn li
sɔnbɔraa nɛ,
ǹ nə́ die ziabiɛ n ganaa Siɔn kiwi.
Zaman
24Wɔ bɛ́ wɔ bɛa kibərə lɛ ma,
wɔ foo ziziɛ̃,
nyɛ́ɛ wɔ kũ,
wɔ n nɔmaa nɛ
ka lɔ bɛ́ lɔn a nɛ yɛ biikoo li.
25Ka nyan wo wuru-n wa,
ka nyan wo ziin la wa.
A giala, zɔ́ɔ tan, a n gɛ̀ dii.
Nyɛ́ɛ n bǎã tumaa nɛ.
Dɛnaa Lawa
26Maa zaman,
ka gɛ̀ koa ǹ mɔnaa wɔ.
Ka n birikəə̃ tii li.
Ka gɛ̀ zɛnaa giala kɔ,
ka nɛgiĩ goon toto wɔ bɛ́ lɔn.
Ka gɛ̀ koa ǹ loe kɔɔsɛ lɔ.
A giala, sisia bɛ̀ zɔ́ɔ basaã-kɔle lɛ
dɔ ka ganaa.
Zaman lɛ n zaman gòãn dii wolen lɛa
Dɛnaa Lawa
27Zeremii, man má n bɔ
má n koa maa zaman lɛ bii,
ka fɔlɔ dí-nyali bɛ́ lɔn.
Ga ǹ sii zɛnaa ǹ gɔn ganaa,
n nə n da ǹ gɔ́ɔ̃ li.
Zeremii
28Ǹ tumaa n gòãn dii wolen lɛa,
Ǹ foo n kaka.
Maǹ soɛ diɛ kɔn la.
Ǹ sii a kakabaa n ka zan hinlaa
fɔlɔ wɔ bɛ́ lɔn.
Ǹ tumaa n basaã-kɔle lɛa.
29Fuũ na a tɛ zoɛ̃ biikoo yii li.
Bɛ̀ á daa a zii li, fɔlɔ n yoe tɛ-n.
Fuũ lɛ n zoɛ̃ li mà a zan lɛ yoreen kɔ.
Sɛnɛ kànaa, bɛa yɔrɔ yii wa,
*gɔ̀ lɛ a boe wa.
30Maǹ bɛa minin kɛn lɛn bíi:
"wɔrɔ bɔbɔnɛɛ".
A giala, maǹ màn bɔbɔnɛɛ lɛa
Dɛnaa Lawa yɔrɔ-a.
اکنون انتخاب شده:
Zer 6: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.