Zer 44
44
Lawa n boo diɛ gùli-kɔlin manɛ
1Dɛnaa Lawa boo da Zeremii ni. Zudaa minin mɛnɛn nə goã giã-n Ezipti gána nɛ, a n boo diɛ bɛn wɔ paǹ li, Migdɔli minin ni, Tapanɛsi wɔn nɛ, Mɛmifisi wɔn nɛ ka Patɔrɔsi gána minin ni. Zeremii tɔn pɛ ǹ nɛ: 2– Dɛnaa Lawa Pàãyiidɛnaa, Izirayeli a Lawa n kɛ pii: «Ma koen mɛnɛn da Zeruzalɛmu laanka Zudaa kiwin tɛnɛn mìi ni, táa ka bɛn yɛ. Pelo, ǹ tumaa kɛbɔlɔ baa, min goon din ba ǹ nɛ wa. 3Ǹ sii baraan mɛnɛn zɛnaa ǹ nə́ ma foo yoo ne, bɛ lɛ na á toa sii kɛ nə ǹ yɛ. A giala, maǹ nə́ da yon gìĩ kɔɔ̃n tã dì soreen manɛ, ǹ nə́ ǹ guguru kɔ, a da yaa, ǹ ba bɛa dìn lɛn dɔn dinin doɛ̃ wa, ka dɔn dinin ni ka ka dogolon dɔn ba ǹ doɛ̃ wa. 4A da yaa, biikoo tumaa li, má maa dí-nyalin, Lawa a boo gii-dalin dia ka la. Ǹ nə́ pɛ ka nɛ kɔn kio mà ka sabara baa, mà kaa sii bɔbɔnɛɛn kɛn tìĩ a boe-n ma nɛ, mà ka nyan bɛ zɛnaa wa. 5Sɛnɛ, ka n too kɔ wa, ka n too da wa. Ka goã sii baraa mɛn tumaa zɛnɛɛ, ka ǹ kɔn toa walan wa. Ka nə n tiɛ̃ tɔn da yon gìĩ kɔɔ̃n tiɛ̃ dì soreen manɛ. 6Bɛ lɛ nɛ má maa foo-yoo baraa kaa Zudaa kiwin laanka Zeruzalɛmu a ziin la. Ǹ nə́ kɛbɔlɔn baa, diə bǎã lɛa ka ka yii bɛ́ a ganaa lɔn pelo.»
7Kanna kəni, Dɛnaa Lawa Pàãyiidɛnaa, Izirayeli a Lawa n kɛ pii: «Wàa na á baa ka á baraa kɛ tumaa zɛnɛɛ ka dinin manɛ? Ka ǹ zoɛ̃ li mà ka Zudaa a giĩn dɛ, a lɔn nɛ, a nɛ tenən ne ka a nɛnyaan bɔnboɛɛnɛn nɛ? Ka ǹ li ka bɔ̀nbaa lenlen? 8Ka ǹ ma foo yui ká kaa zɛnaa ǹ siin ni. A giala, ka ǹ da yon gìĩ kɔɔ̃n tiɛ̃ dì soreen manɛ Ezipti gána nɛ. Ka ǹ li ka papaã lenlen ka n bɔ gána lɛ nɛ, ka sii a kɔnboe baa kanaa a gánan tumaa yɔrɔ-a lɛn baraa bíi laanka sìi a paǹ li? 9Ka yiri na á bɔ sii baraan kɛn nɛ ka ǹ zɛnaa Zudaa gána nɛ ka Zeruzalɛmu a ziin la ǹ nɛ? Kaa díin zɛnaa ǹ sii bɔbɔnɛɛn kɛn manɛ, Zudaa kiin wɔn nɛ, ǹ lɔn wɔn nɛ, ka dinin wɔn nɛ ka kaa lɔn wɔn nɛ. 10A da kaa pelo ǹ lɛ, min kɔn tɔn nə n din boɛɛn kɔ, á ma guguru kɔ wa. Min kɔn tɔn kɔ maa daraan laanka maa dí-pɛn kɛn lɛ wa, kɛn má ǹ kɔ ka la kɔnlɛ ka ka digolon ne.»
11Zeremii pɛ doo: – Bɛ lɛ nɛ, Dɛnaa Lawa Pàãyiidɛnaa, Izirayeli a Lawa á kɛ pii: «Man die yui ka gialaa, ma koe bɔ ka ganaa, ma Zudaa gána a zaman tumaa dɛ. 12Zudaa minin mɛnɛn yii goã koo ǹ nə́ daa gùli kɔ Ezipti gána nɛ, ma á re ǹ tumaa dii lenlen. Ǹ tumaa n die giɛ̃ bɛa gána lɛ nɛ, zia laanka bòo gɔn, ǹ tumaa, nɛnyaanan nɛ ka min zizin ni. Hiĩ, ǹ tumaa n die giɛ̃ bɛa yɔrɔ kɛ lɛ la. Maǹ die ǹ biɛ sii a kɔnboe lɛa, bɛ̀ ǹ tá re lɛn baraa bíi, ǹ sii bɔbɔnɛɛ boo da, ǹ nyɛ́ɛ da min ganaa ka sìi da ǹ sii ni. 13Ma yoo Zeruzalɛmu minin gialaa lɔn, man die yui minin kɛn gialaa giã-n Ezipti gána nɛ ka zia nɛ, bòo ne ka piɛ̃ busu ni. 14Min mɛnɛn yii goã koo Zudaa gána nɛ, ǹ nə́ woo gùli kɔ Ezipti gána nɛ, ǹ kɔn ba re boe la a baa si a la wa. Ǹ kɔn ba re n sii gɛ̀ la wa. Min mɛnɛn tumaa bɛ́ li ǹ wusoo ǹ wo Zudaa gána nɛ, ǹ ba re boe la ǹ wusoo ǹ woo wa, yǎa min gogoon mɛn bɛ́ re n sii gɛ̀ la.»
15Min mɛn tumaa goã giã-n Ezipti gána nɛ Patɔrɔsi kiwi, giĩn mɛnɛn tumaa goã doɛ̃ mà ǹsɛn lɔn tá da yon gìĩ kɔɔ̃n tiɛ̃ dì soreen wɔ lɛa, bɛn tumaa goã ǹ tan, ka lɔ damata nɛ. Ǹ nə́ pɛ Zeremii ni: 16«Ń bɛ́ mà n man boo diɛ wɔ nɛ ka Dɛnaa Lawa tɔ nɛ, wɔsɛn ba re n too koe n lon wa. 17Wɔ sii mɛn tumaa koa wɔ yɔrɔ-a, wɔ ǹ bɛ zɛnɛɛ. Wɔ ǹ da yon gìĩ kɔɔ̃n laanka duvɛ̃ zumii lon a kii lɔ wɔ lɛa. Bɛ ǹ wɔa zɛnaa ǹ sii lɛa haalɛ bibi, wɔ dinin ni, wɔ din ni, wɔa kiin ni ka wɔa gána nyɛɛnaandɛnan nɛ Zudaa kiwin ni ka Zeruzalɛmu ziin la ǹ nɛ. Bɛa biikoo li, màn-bii goã wɔ lon, là nyantoro ne, wɔ a koe doɛ̃ wa. 18Sɛnɛ, ǹ mɛn pinaa, wɔ bɛ́ wɔ́ da yon gìĩ kɔɔ̃n laanka duvɛ̃ zumii lon a kii lɔ la toa walan, a kũ bɛ ganaa, màn tumaa n nyaabiɛ wɔ ganaa, wɔ n giɛ̃ zia laanka bòo gɔn.» 19Lɔn nə́ pɛ doo: «Bɛ̀ wɔ á da yon gìĩ kɔɔ̃n tiɛ̃ lon a kii lɔ lɛ wɔ lɛa, wɔ n duvɛ̃ zumii a wɔ lɛa, táa wɔ zuũn tá a siére-a? Wɔ bɛ́ mɔ̀mɔn mɛnɛn zɛnɛɛ lon a kii lɔ a kɔnboe lɛa, ka duvɛ̃ kɛ nɛ wɔ n zumii la, táa ǹ tá bɛ dɔ siére-a.» 20Sɛnɛ, min mɛn tumaa Zeremii lɛ si ka kɛa yɔrɔ kɛ lɛ nɛ, zaman tumaa nɛ, giĩn ni ka lɔn nɛ Zeremii pɛ ǹ nɛ: 21«Taãn nɛ, ká goã *wúlu màn gìĩ kɔɔ̃n tiɛ̃ Zudaa kiwin ni ka Zeruzalɛmu a zii la ǹ nɛ: Ka dinin ni, kaa díin ni, kaa kiin ni, kaa gána nyɛɛnaandɛnan nɛ, ka Zudaa min kɔsɔn nɛ. Dɛnaa Lawa yiri tá a-n parsiini, a yiri bɔ-n wa. 22Sɛnɛ, Dɛnaa Lawa boo la á kaa giã ǹ gɔn babaraan laanka kaa sii bɔbɔnɛɛn kɛn si a din ganaa wa. Bɛ lɛ nɛ kaa gána lɛ kɛbɔlɔ baa, bǎã bɔbɔnɛɛ lɛa, min goon din ná a ba a-n wa. A n sii a kɔnboe lɛa lɛn baraa bíi a paǹ li ka min tumaa yii bɛa ganaa lɔn pelo. 23Koe na á ka yɛ bɛ lɛ taman yii: Ka n ka da yon gìĩ kɔɔ̃n tã dì soreen wɔ lɛa, ka sii baraa zɛnaa ka wɔ Dɛnaa Lawa lon ne. Ka n too kɔ a lon wa, ka n too kɔ a daraan li wa, a dí-pɛn nɛ ka a doroon ne ka min tumaa yii bɛ́ a ganaa lɔn pelo.»
24Zeremii pɛ zaman lɛ tumaa nɛ, ka lɔn nɛ: – Kasɛn Zudaa minin kɛn giã-n Ezipti gána nɛ, ka n too kɔ Dɛnaa Lawa a boo li. 25Dɛnaa Lawa Pàãyiidɛnaa Izirayeli a Lawa n kɛ pii: «Ka laanka kaa lɔn man ka pɛ kɛnɛn: Wɔ n lɛ kɔ wáa wɔ á re da yon gìĩ kɔɔ̃n laanka duvɛ̃ zumii lon a kii lɔ la. Wɔ ǹ li wɔ wɔa lɛ-kɔ lɛ pã.» Ka bɛ́ li lɔn ka zɛnaa miɛ̃, ka kaa lɛ-kɔn lɛ pã! 26Sɛnɛ, kasɛn Zudaa minin kɛn giã-n Ezipti gána nɛ, ka n too kɔ Dɛnaa Lawa a boo kɛ li! Á ke, masɛ Dɛnaa Lawa, ma nə n liɛ ka ma tɔ gole kɛ nɛ: Ezipti gána tumaa nɛ, Zudaa min kɔn ba re masɛ tɔ pii wa. Min kɔn ba re pii doo: "Ka Dɛnaa Lawa, Lawa yiikoonaa tɔ nɛ wa". 27Man die n yii soe ǹ ganaa ǹ koe yɛ a lɛa. Zudaa minin mɛnɛn bɛ́ giã-n Ezipti gána nɛ, zia laanka bòo á re ǹ dii. Ǹ goon din ba re goɛ̃ wa. 28Ǹ gogoon dinsɔɔ̃ n die liɛ zia la, ǹ bɔ Ezipti ǹ da Zudaa gána nɛ. Bɛa waáraa kəni, Zudaa min gialakunun kɛn tɔn Ezipti gána nɛ, bɛn tá re doɛ̃ bɛ̀ ǹsɛn boo hinlaa bɛ̀ masɛ a boo n yɔrɔ yii. 29Dɛnaa Lawa a da ǹ boo á ke: Man die yui ka gialaa kànaa Ezipti gána nɛ. Man die sii a kɔnboe nyɛɛ ka nɛ, ka dɔ̃ mà ma din a da ǹ boon man yɔrɔ yii, kaa koe yɛ a lɛa. Bɛa sii a kɔnboe lɛ á ke: 30Má Zudaan kii Sedekiasi wɔ Baabiloniin kii Nebukadenezɔɔrɔ gɔ#Kiin2 25.1-7n, a zɔ́ɔ kɛ lɛ giɛ a gɛ̀ li. A din yɔrɔ goon la, man die Eziptin kii *Faarahɔn Ofra we a zɔ́ɔn gɔn ǹ mɛnɛn lɛn bɛ́ giɛ a gɛ̀ li. Masɛ Dɛnaa Lawa n má pɛ.
اکنون انتخاب شده:
Zer 44: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.