Zer 34
34
Lawa a boo Sedekiasi a paǹ li
1 #
Kiin2 25.1-11; KZS2 36.17-21 Nebukadenezɔɔrɔ na á goã *Baabilonii gána a kii lɛa. Á yoo zia-n Zeruzalɛmu laanka Zudaa a kiwin gialaa, kun ka a zia kurun ni ka kanaa tumaa a sɔraasin ni ka gánan mɛnɛn bɛ́ a pàã giulun. Bɛa waáraa lɛ nɛ, Dɛnaa Lawa boo da Zeremii ni á pɛ-n kɛnɛn: 2– Dɛnaa Lawa, Izirayeli a Lawa n kɛ pii: «Wo pɛ Zudaan kii Sedekiasi ni, mà masɛ n kɛ pii: Man die kiwi kɛ we Baabiloniin kii gɔn, a tɛ da a ganaa. 3Nsɛ kɔn ba re liɛ la wa. Ǹ tá re n kuĩ ǹ nə n baa a kòso nɛ lɛa. N tá re golee a yɔrɔ-a, n na a lɛ si, bɛ kio, n tɔn wo Baabilonii. 4Sɛnɛ, Zudaan kii Sedekiasi, ma bɛ́ boo mɛn diɛ n nɛ, bɛ̀ n nə n too kɔ li, n ba re gɛ̀ kaka we wa, ma din Dɛnaa Lawa n má pɛ. 5N tá re giɛ̃ yii-nyɛɛ gɔ́ɔ̃ nɛ. Ǹ tá re n gɛ̀ zɛnɛɛ ka n digolo kiin kɛn wɔ goã lɔn. Ǹ tá re da yon gìĩ kɔɔ̃n tiɛ̃ n wɔ lɛa, ǹ gɛ̀ loe kɛ lɔ: Koe woo koe, kii lɛ gã. Hiĩ, má n lɛ kɔ, ma din Dɛnaa Lawa n má pɛ.»
6Lawa a boo gii-dali Zeremii woo boo lɛ pɛ Zudaan kii Sedekiasi ni, Zeruzalɛmu. 7Bɛa waáraa lɛ nɛ, bɛ̀ Baabiloniin kii a sɔraasin tá Zeruzalɛmu gialaa ka Zudaa kiwin kɛn nɛ tɔn doaboe, bɛn man ka Lakiisi laanka Azekaa nɛ tamaa nɛ.
Bɛ̀rɛn kaa ka ǹ wusoo a kuĩ
8Dɛnaa Lawa wusoo á boo da Zeremii ni kii Sedekiasi a lɛ-kɔ kɛ kio Zeruzalɛmu a zaman tumaa nɛ, màn mɛn bɛ́ toɛ, a ǹ bɛ̀rɛn kaa. 9Didie doamaa nɛ, a na a *Ebrəə bɛ̀rɛn kaa, ta giĩ ni hinlaa lɔ nɛ. Min kɔn doamaa bie a ǹ dɔɔ̃n Zudaa min da dí ganaa ka bɛ̀rɛ bɛ́ lɔn wa. 10Bɛa yɔrɔ lɛ la, nyɛɛnaandɛnan laanka zaman tumaa bɛa lɛ-kɔ lɛ wɔ ǹ nə́ lɛ kɔ ǹ bɛ̀rɛn kaa ganaa, ta a n giĩ hinlaa lɔ lɛa, ǹ nə́ ǹ ba re ǹ kiɛ dí kaka ganaa doo wa. Didie bɛa lɛ-kɔ lɛ si, ǹ nə́ ǹ bɛ̀rɛn lɛn kaa. 11Sɛnɛ bɛ kio, ǹ taasiɛn nə́ n bɔyaa. Ǹ giĩn laanka lɔn mɛnɛn lɛn kaa, ǹ nə́ wusoo ǹ nə́ ǹ kũ doo ǹ nə́ ǹ kaa dí ganaa ka bɛ̀rɛn bɛ́ lɔn.
12Dɛnaa Lawa tɔn boo da Zeremii ni á pɛ nɛ: 13– Dɛnaa Lawa, Izirayeli a Lawa n kɛ pii: «Ma dɔ goã má lɛ-kɔ wɔ ka ka digolon ne, bɛ̀ ma bɛ́ má ǹ waa bɛ̀rɛbaa ǹ bǎã nɛ Ezipti gána nɛ má soo ǹ ne. 14#BBN 21.2; TDP 15.12 Man má pɛ ǹ nɛ: Kànaa ka lɛ̀ sɔbaa, didie doamaa nɛ a ǹ dɔɔ̃n Ebrəə min toa walan, ǹ mɛn lɛ nə n din sã ka la. Lɛ̀ sɔrɔ gɔ́ɔ̃ nɛ, a n die goɛ̃ kaa bɛ̀rɛ lɛa, sɛnɛ, a lɛ̀ sɔbaabaa ǹ wɔ li ka ǹ dɛnaa toa walan.» Sɛnɛ, ka digolon nə n too kɔ ma lon wa, ǹ nə n yiri kɔ maa boon li wa. 15Sɛnɛ, kasɛn nə́ goã ka kaa giã ǹ gɔn bɔyaa. Sii mɛn bɛ́ pepere ma yii li, ká bɛ zɛnaa. Didie pɛ ǹ miã nɛ, mà a bɛ̀rɛbaa nya. Ká lɛ-kɔ din wɔ ka ma nɛ maa kion kɛ nɛ ma tɔ n la. 16Sɛnɛ, ká kaa taasiɛn bɔyaa, ká ma yii puusə kɔ. Didie wusoo a ná a bɛ̀rɛgiĩ hinlaa a bɛ̀rɛlɔ kũ, ka goã ká ǹ mɛnɛn lɛn kaa, ká n wusii ǹ kiɛ bɛ̀rɛbaa ǹ dí ganaa.
17Bɛ lɛ nɛ Dɛnaa Lawa á kɛ pii: – Ka ma lɛ si wa, min kɔn nə ǹ dɔɔ̃n da á bɔ bɛ̀rɛbaa-n wa. Masɛ Dɛnaa Lawa n kɛ pii: «Man die yui zia-n ka ganaa, piɛ̃ busu ni ka bòo ne. Bɛa waáraa kəni, tán a tɔrɔn tumaa gɔ̀nɔn tá re bìn diɛ ka nyɛɛnɛ. 18-19Zudaa laanka Zeruzalɛmu a nyɛɛnaandɛnan nɛ, ǹ dí-nyali dadaran nɛ, ǹ Lawa a wúlu-bɔlen ne, ka min mɛnɛn tumaa bɛ́ tándɛnan lɛa, bɛn tumaa lɛ-kɔ wɔ ka masɛ nɛ. Maǹ nə́ wúlu bɔ ǹ dii nɛ lɛ na kɔn paa, ǹ nə́ bɔ a bii ni. Sɛnɛ, bɛa minin lɛn nə kɔ ǹ lɛ-kɔ lɛ wa, ǹ tamaa wa. Ma dɔ n die ǹ dɔn biɛ ka dii nɛ lɛ bɛ́ lɔn ǹ nə́ na kɔn paa. 20Man die ǹ we ǹ zɔ́ɔn gɔn, ka min mɛnɛn bɛ́ zoɛ̃ ǹ gɛ̀ li. Ǹ siĩ á re zèwon laanka tolokan màn-bii biɛ. 21A din goon ne, man die Zudaan kii Sedekiasi laanka a gána nyɛɛnaandɛnan kiɛ ǹ zɔ́ɔn pàã giulun ka min mɛnɛn bɛ́ zoɛ̃ ǹ gɛ̀ li. Man die ǹ we Baabiloniin kii a sɔraasin gɔn. Bɛa sɔraasin lɛn dinin wɔlɔ n lui ni ǹ gana. 22Sɛnɛ, man die wusii ma da ǹ nɛ Zeruzalɛmu, ǹ yoo a gialaa, ǹ kũ, ǹ tɛ da a ganaa. Zudaa kiwin tá re diə gole biɛ, min ná a ba ǹ nɛ wa.» Dɛnaa Lawa a da ǹ boo ne.
اکنون انتخاب شده:
Zer 34: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.