Zer 32
32
Zeremii n wuru pii Anaatɔti
1 #
Kiin2 25.1-7
Zudaan kii Sedekiasi a kiibaa lɛ̀ fùbaa ǹ wɔ li, *Baabiloniin kii Nebukadenezɔɔrɔ a kiibaa lɛ̀ fulukiwisibaa ǹ wɔ li, Dɛnaa Lawa boo da Zeremii ni. 2Bɛa biikoo lɛ nɛ, Baabiloniin kii a sɔraasin nə́ Zeruzalɛmu lɛnpɛnɛ. Lawa a boo gii-dali Zeremii sɛ lɛ na á goã tiɛ̃-n kòso-n Zudaan kii a wɔlɔ-lɛduə̃lin sumu-n. 3Sedekiasi din na á toa ǹ nə́ Zeremii da kòso-n. A giala, a n Zeremii zɛ̀rɛ biɛ Dɛnaa Lawa a da ǹ boon kɛn taman yii á pɛ: «Ma á re Zeruzalɛmu we Baabiloniin kii gɔn, a kũ. 4Zudaan kii Sedekiasi a re liɛ Baabilonii minin la wa. Man die we Baabiloniin kii gɔn. A tá re golee a yɔrɔ-a, a na a lɛ si. 5Ǹ tá re woe ka Sedekiasi ni Baabilonii gána nɛ. Á re goɛ̃ walan, yǎa ǹ mɛn waáraa bɛ̀ má n yiri koa li. Dɛnaa Lawa a da ǹ boo ne. Ta ka woo nyɛɛnɛ ka zia nɛ Baabilonii minin ganaa, kooro ne, ka a re boe màn kɔn la wa.»
6Zeremii pɛ: – Dɛnaa Lawa boo da ma nɛ á pɛ: 7«N dɔɔ̃ngiĩ Hanaaneyeli ke Salumu a nɛgiĩ lɛa, bɛ á re die n li, a pɛ n nɛ, mà asɛ a wuru ke Anaatɔti, mà n pii. A giala, mà a pii n doe n din ganaa.» 8Ka Dɛnaa Lawa goã á pɛ ma-n lɔn, ma dɔɔ̃ngiĩ Hanaaneyeli daa ma yaa wɔlɔ-lɛduə̃lin sumu-n, á pɛ ma-n kɛnɛn: «Maa wuru kɛ pii Anaatɔti, Bɛnzamɛn gána nɛ. A giala, n din nə ma dɔɔ̃n taãn lɛa, a pii n doe n din ganaa.» Má dɔ̃ ka bɛ-n kəni, máa Dɛnaa Lawa na á boo da ma nɛ. 9Má ma dɔɔ̃ngiĩ Hanaaneyeli a wuru lɛ pii Anaatɔti, má a wɔrɔ saraa, wɔrɔ we fulusɔbaa. 10Má wuru lɛ a pii ǹ sɛ́wɔ zɛnaa màn paa, siéren yɔrɔ-a, má goon lɛ tã má ma gòon ganaa ǹ kaaran bǎã da la#32.10 Maǹ nə n gɔn bǎã diɛ sɛ́wɔ nɛ ka gòon ganaa ǹ kaaran nɛ. má a wɔrɔ zɔɔ̃ kilo la. 11Wuru pii ǹ sɛ́wɔ ke a lɛ n tiɛ̃ nɛ, ǹ nə́ wuru lɛ a pii ǹ yɔrɔ nyaa a nɛ, má bɛ saa, ka goon kɛ dɔ nɛ a lɛ n koo. 12Má ǹ kɔ Maseya a nɔɔn, Neriya a nɛgiĩ Baruku la. Ma dɔɔ̃ngiĩ Hanaaneyeli laanka siéren mɛnɛn nə n gɔn bǎã da sɛ́wɔ lɛ nɛ, bɛn nə́ goã ǹ tan kɔnlɛ ka Zudaa minin mɛnɛn tumaa goã wɔlɔ lɛduə̃lin sumu-n. 13Ma tɔn pɛ Baruku ni min tumaa yɔrɔ-a: 14– Dɛnaa Lawa Pàãyiidɛnaa Izirayeli a Lawa n kɛ pii: «Wuru pii ǹ sɛ́wɔ màn paa lɛ saa, ǹ mɛn lɛ bɛ́ tiɛ̃ nɛ ka goon kɛ nɛ a lɛ ná a n tã wa, n nə ǹ kaa donkolon ne, màn mɛn bɛ́ toɛ ǹ belebɔ.» 15Dɛnaa Lawa Pàãyiidɛnaa Izirayeli a Lawa n kɛ pii: «Gána kɛ nɛ, minin tá re wusii ǹ kionən pii, wurun ni, ka rezɛ̃ wurun ni.»
Zeremii n Dɛnaa Lawa nyankoe
16Ma bɛ́ má wuru pii ǹ sɛ́wɔ lɛ kɔ Neriya a nɛgiĩ Baruku la, má Dɛnaa Lawa nyankɔ kɛnɛn: 17«E! Dɛnaa Lawa, n din ni n tán laanka lon zɛnaa, ka n Pàã gole ne, ka n boo sii la nɛ! Sii kɔn ba kaka koe n ganaa wa. 18N bɔlɔgoondɛnaabaa n nɔ̀ɔn duu damata wɔ lɛa. Sɛnɛ, n nə ǹ díin sii baraa a dɔlɔ boe ǹ nɛnyaanan ganaa. N din ni Lawa gole lɛa, pàã nə n lon. N tɔ n Dɛnaa Lawa Pàãyiidɛnaa. 19Ma n sii dadaran lɛ boe, maǹ yɔrɔ yii ka pàã gole ne. Minbuiin nɛn zɛnaa ǹ siin tumaa nə n yɔrɔ-a.
Ma n didie sarɛɛ a kɔnpɛ ka a giã ǹ gɔn laanka a zɛnaa ǹ siin ni.
20Lɛlɛ, Ezipti gána nɛ, ń kaãbaa siin zɛnaa. Haalɛ tɔn pelo, Izirayeli nɛnyaanan bii ka tɔrɔn tumaa nɛ, n bɛ́ màn mɛn lɛa, n nə ǹ tɔn bɛ nyɛɛ, ka wɔ yii bɛa ganaa sisia lɔn. 21N nə́ n zaman Izirayeli minin waa n soo ǹ ne Ezipti gána nɛ ń sii kakan zɛnaa, kaãbaa sii dadaran lɛa, ń nyɛ́ɛ gole da ǹ nɛ. 22N goã n nə́ n lɛ kɔ wɔ digolon la ka gána mɛn nɛ, bɔ̀nyaa laanka zoo nyɔɔ n baa sii a nɛ, n bɛ kɔ ǹ la. 23Ǹ nə́ wɔ a nɛ, ǹ nə́ si ǹ nə́ baa ǹ wɔ lɛa. Sɛnɛ, ǹ nə n too kɔ n lon wa, ǹ kɔ n daraan lɛ wa, ǹ kɔ n dí-pɛn lɛ wa. Bɛ lɛ nɛ pelo, koe kɛ tumaa á boe ǹ ganaa.
24Á ke, Baabilonii minin sa gɔn lɛ diri kiwi lɛ la, ǹ nə́ zoɛ̃ li maǹ kũ. Bòo laanka zia taman yii, ka piɛ̃ busu ni, ǹ tá re boe ǹ la. N boo mɛn pɛ, bɛ n yɔrɔ yii, ka n yii bɛ́ a ganaa lɔn. 25Taãn nɛ, ǹ nə́ Zeruzalɛmu kũ á nya! A da yaa Dɛnaa Lawa, ń ma da wuru pii ganaa Anaatɔti, a wɔrɔ nə n saraa siéren yɔrɔ-a. Bɛ mìi, Dɛnaa Lawa?»
Dɛnaa Lawa n Zeremii lɛ sii
26Dɛnaa Lawa n kɛ pii Zeremii ni: 27– Masɛ Dɛnaa Lawa n màn yiikoonaa tumaa a Dɛnaa lɛa. Sii á boe la a kaka kɔ masɛ ganaa? 28#Kiin2 25.1-11; KZS2 36.17-21 Bɛ lɛ nɛ, masɛ Dɛnaa Lawa á kɛ pii: «Man die Zeruzalɛmu we Baabilonii minin gɔn ka ǹ kii Nebukadenezɔɔrɔ nɛ, ǹ kũ. 29Baabilonii minin nə́ yoo a gialaa, ǹ tá re kuĩ, ǹ tɛ da a ganaa. Minin nə da yon gìĩ kɔɔ̃n tã kionən hinlaa kalan mɛnɛn la *Baali wɔ lɛa, ǹ nə́ mi ǹ màn zuməə dì soreen wɔ lɛa ǹ la, ǹ nə́ ma foo da yoo ganaa nɛ, ǹ tá re tɛ diɛ bɛn ganaa. 30A kũ ǹ tenmaa waáraa ganaa, sii mɛn bɛ́ bɔnɛɛ ma yii li, Izirayeli minin laanka Zudaa minin man nə́ bɛ lɛ zɛnaa. Ǹ zɛnaa ǹ siin tumaa n ma foo yui. Dɛnaa Lawa a da ǹ boo ne. 31Taãn nɛ, a kũ Zeruzalɛmu a giala kɔ ganaa a da kaa pelo lɛ, bɛa kiwi kɛ ma foo yoo. Bɛ lɛ nɛ, ma ba li ma yɛ ma yɔrɔ-a doo wa. 32Izirayeli minin laanka Zudaa minin nə́ sii baraa gigiã zɛnaa, ǹ nə́ ma foo yoo ne: Ǹ kiin ni, ǹ kiãn nɛ, ǹ Lawa a wúlu-bɔlen ne, ǹ Lawa a boo gii-dalin ni, Zeruzalɛmu minin ni ka Zudaa minin ni. 33Màn mɛn tá-a ǹ nə n bɔyaa ǹ da masɛ li, maǹ nə́ n dɔ̀ɔ̃ wɔ ma nɛ. A da yaa, biikoo tumaa li, má ǹ daraa, sɛnɛ, ǹ nə n too kɔ ma lon wa, ǹ lɛ kɔ maa daraan ganaa wa. 34#Kiin2 23.10; Zer 7.30-31; 19.1-6 Maǹ nə́ ǹ dì nyín bɔbɔnɛɛn kɛn kaa kion kɛ nɛ ma tɔ n la, ǹ nə́ *gɔ̀ da a ganaa. 35#LWS 18.21; Kiin2 23.10; Zer 7.31 Inɔn nyankɔrɔ basa nɛ, ǹ nə́ *wúlu bɔ ǹ bǎã dɔ dì Baali wɔ lɛa. Ǹ nə́ ǹ nɛgiĩn laanka ǹ nɛlɔn tã *wúlu màn lɛa dì Molɛki ganaa. A da yaa ma bɛa nɔ̀n da ǹ la wa, a taasiɛ din da ma yiri-n wa. Bɛa sii bɔbɔnɛɛn lɛn zɛnaa Zudaa minin dɔn kaa sii baraa zɛnaa nɛ. 36Ka n pii Zeruzalɛmu a paǹ li: Zia nɛ, bòo ne ka piɛ̃ busu nə́ ǹ wɔ Baabiloniin kii gɔn. Kanna kəni, ma din Dɛnaa Lawa Izirayeli a Lawa bɛ́ màn mɛn pii bɛa kiwi kɛa paǹ li, á ke: 37Ma foo goã á yoo a zaman li. Bɛ lɛ nɛ, maa foo-yoo gole lɛ gɔ́ɔ̃ nɛ, má ǹ loo paǹ tumaa li gána gigiã nɛ. Sɛnɛ, ma á re wusii ma da ǹ nɛ kànaa, ǹ wusoo ǹ goã yii-nyɛɛ la. 38Ǹ tá re wusii ǹ maa zaman baa, ma dɔ á re ǹ Lawa biɛ. 39Ma á re ǹ taasiɛ biɛ goon, ka sii zɛnaa ǹ gɔn goon ne, màn mɛn bɛ́ toɛ, ǹ nyɛ́ɛ baa ma yii ni yǎa duduu. Ka bɛ-n kəni, ǹ tá re yii-nyɛɛ yii, ǹ dinin ni ka ǹ nɛnyaanan dɔn nɛ ǹ kio. 40Man die lɛ kɔ kɔn la we ǹ ne duduu wɔ lɛa. Biikoo tumaa li, ma á re ǹ nyɛɛnaan boe, ma bǐɛ̃ zɛnaa ǹ nɛ. Ka bɛ-n kəni, ǹ tá re nyɛ́ɛ biɛ ma yii-n taãn-taãnɛ, ǹ nə́ ǹ ba n wɔlɔ lui ma ganaa wa. 41Á die kɔɔ̃n koe ma ganaa ma bǐɛ̃ zɛnaa ǹ nɛ. Man die ǹ gòã we tán taãn-taãnɛ gána kɛ lɛ nɛ ka ma foo tumaa nɛ, ka ma pàã tumaa nɛ.»
42Dɛnaa Lawa n kɛ pii doo: «Ma din ni má koe gole kɛ tumaa da Zudaa gána mìi ni. A din yɔrɔ goon la, ma n lɛ kɔ ǹ la ka yii-nyɛɛ gole mɛn nɛ, ma din nə die bɛ dɔ koe ǹ la. 43Ka ǹ pii: Gána kɛ na á n wɔ Baabilonii minin gɔn. Kanna, a n diə gole lɛa, minbuiin nɛ ka tɔɔ goon din ba a-n wa. A da yaa, bɛa gána lɛ nɛ, ǹ tá re wusii ǹ wurun pii a nɛ. 44Taãn nɛ, ǹ tá re wusii ǹ wurun pii Bɛnzamɛn tɔrɔn gána nɛ, Zeruzalɛmu yɔrɔ-a, Zudaa a kiwin ni, tenten gánan nɛ, *Sefelaa nɛ, ka Negɛvu gána nɛ. Minin tá re wuru sã ǹ sɛ́wɔn zɛnɛɛ, ǹ nə n gɔn bǎã da la ǹ tɔn a lɛ tã, ǹ da ka siéren ne. Sonbore, man die gána kɛa minin lɛlɛ ǹ giã ǹ gɔn koe ǹ la.» Dɛnaa Lawa a da ǹ boo ne.
اکنون انتخاب شده:
Zer 32: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.