Zer 29
29
Zeremii n sɛ́wɔ diɛ goa-wolen la
1 #
Kiin2 24.12-16; KZS2 36.10 Lawa a boo gii-dali Zeremii nə́ n toa Zeruzalɛmu, á sɛ́wɔ dia min golen la, Lawa a wúlu-bɔlen ne, Lawa a boo gii-dalin ni, ka min mɛn tumaa bɛ́ Nebukadenezɔɔrɔ nə́ ǹ goa Zeruzalɛmu á woo ǹ ne *Baabilonii. 2Bɛ giala mà kii Yekonia nɛ, kii ǹ dan nɛ, kii a dí-nyali dadaran nɛ, Zudaa laanka Zeruzalɛmu a kiãn nɛ, fuũn ni ka gɔn dí-nyalin ni. 3Zeremii na á bɛa sɛ́wɔ lɛ kɔ Safan a nɛgiĩ Elaasaa la ka Ilkia a nɛgiĩ Gemaria nɛ. Zudaan kii Sedekiasi na á ǹ dia Baabiloniin kii Nebukadenezɔɔrɔ li. A na á goã kiɛ̃-n sɛ́wɔ lɛ-n kɛnɛn: 4– Dɛnaa Lawa Pàãyiidɛnaa, Izirayeli a Lawa n kɛ pii goa wolen kɛn wɔ paǹ li, á ǹ goa Zeruzalɛmu á woo ǹ ne Baabilonii gána nɛ: 5«Ka kionən dɔ, ka giã ǹ nɛ. Ka dù gɔrɔn bɔ ka ǹ dù bii. 6Ka kɔn wɔ, ka nɛgiĩn laanka nɛlɔn yɛ. Ka lɔ kɔ kaa nɛgiĩn la ka kaa nɛlɔn kɔ zuũn ganaa màn mɛn bɛ́ toɛ ǹ dɔn nə nɛnyaanan yɛ. Ka mɔnaa parsiini, màn kɔn baran n bɔ ka lɛ wa. 7Ka dí nya kaa gùli kɔ ǹ kiwi lɛ nɛ màn mɛn bɛ́ toɛ a wo nyɛɛnɛ. Ka Dɛnaa Lawa nyankɔ a lɛa a giala kaa yii-nyɛɛ n boe bɛa kiwi kɛ lɛ a là nyantoro li.»
8Dɛnaa Lawa Pàãyiidɛnaa, Izirayeli a Lawa n kɛ pii: «Lawa a boo gii-dalin kɛn ka bii ka biɛ̃ ǹ pɛlen kɛn nɛ, ka nyan toa ǹ ka sã wa. Ka bɛ narɛɛn mɛnɛn we, ka nyan nə n saa bɛn li wa. 9Maǹ pii mà ǹsɛn man boo diɛ ka masɛ tɔ nɛ, sɛnɛ soɛ nɛ. Ma ǹ dia wa.» Dɛnaa Lawa a da ǹ boo ne.
10 #
KZS2 36.21; Zer 25.11; Dan 9.2 Dɛnaa Lawa n kɛ pii: – Bɛ̀ Baabiloniin kii a pàã kɛ dɔ lɛ̀ pɔsɔbaa, ma á re die kaa gú ganaa. Ma á re maa lɛ kɔ kɛ lɛ piɛ̃: Ma á re soe ka-n kànaa ma wo ka nɛ Zeruzalɛmu. 11Hiĩ, masɛ Dɛnaa Lawa, ma sii mɛn yɔrɔ bɔ kaa wɔ lɛa, ma á bɛ doɛ̃: «Baraa bie wa, bǐɛ̃ lɛ piɛ̃ nɛ. Ma á re toɛ kaa biɛ̃ ǹ n biɛ̃ kɔ.» Dɛnaa Lawa a da ǹ boo ne. 12Bɛ̀ kaa ma bíi we, bɛ̀ ka daa ma nyankɔ, ma á re n too koe ka lon. 13#TDP 4.29 Bɛ̀ ka ga ma li, ka á re ma yii. Bɛ̀ ka ga ma li ka ka foo din tumaa nɛ, ka á re ma yii. 14Ma á re toɛ ka ma yɛ. Dɛnaa Lawa a da ǹ boo ne. Ma ka loo gánan mɛnɛn tumaa nɛ, ma á re wusii ma ka sɔkɔn walan. Ǹ ka goa bǎã mɛn nɛ, ma á re wusii ma da ka-n walan. Dɛnaa Lawa a da ǹ boo ne. 15A da yaa ka ǹ pii mà Dɛnaa Lawa na á boo gii-dalin kɔ ka la Baabilonii gána nɛ!
16Kanna kəni, Dɛnaa Lawa n kɛ pii kii kɛa paǹ li giã-n Davida a kii dankan la. A din boo goon lɛ nɛ á pii ka dɔɔ̃nɔn kɛn wɔ paǹ li, ǹ mɛnɛn bɛ́ ǹ wo gùli kɔ ǹ bǎã-n wa, giã-n Zeruzalɛmu. 17Dɛnaa Lawa Pàãyiidɛnaa n kɛ pii: «Man die yui ǹ gialaa ka zia nɛ, bòo ne ka piɛ̃ busu ni. Man die ǹ biɛ ka gɔ́rɔ bɔnɛɛ bɛ́ lɔn, bɔnɛɛ, min ná a boe la á bii wa. 18Man die ǹ kio lui ka zia nɛ, bòo ne ka piɛ̃ busu ni. Bɛ̀ gánan mɛnɛn nə́ ǹ yɛ, nyɛ́ɛ á re bɛn tumaa kuĩ. Ma bɛ́ re ǹ lui ma ǹ kaa gánan mɛnɛn nɛ, ǹ tá re sii a kɔnboe biɛ bɛn li, bɛ̀ ǹ tá re lɛn baraa bíi, bɛ̀ ǹ tá sii bɔbɔnɛɛ boo diɛ, nyɛ́ɛ da ǹ sii ni ka sìi boo ni. 19Man bɛ zɛnɛɛ a giala, ǹ nə n too kɔ maa boon ganaa wa. Masɛ Dɛnaa Lawa a da ǹ boo ne. A da yaa, má maa dí-nyalin, maa boo gii-dalin dia ǹ la gunyin damata, sɛnɛ ǹ nə n too kɔ ǹ lon wa. Masɛ Dɛnaa Lawa a da ǹ boo ne.»
20Kasɛn wo bɛ̀rɛbaa ǹ bǎã n wolen lɛn Dɛnaa Lawa ka goa Zeruzalɛmu á woo ka nɛ Baabilonii, ka n too kɔ a da ǹ boo li! 21Dɛnaa Lawa Pàãyiidɛnaa Izirayeli a Lawa n kɛ pii, Kolaya a nɛgiĩ Akaabu a paǹ li ka Maseya a nɛgiĩ Sedekiasi ni. Ǹ dinin min paa mà ǹsɛn man Dɛnaa Lawa a boo gii diɛ, sɛnɛ soɛ nɛ. Á bǐɛ̃ kɔ, man die ǹ we Baabiloniin kii Nebukadenezɔɔrɔ gɔn, a ǹ dɛ ka yii giulun. 22Ǹ Zudaa min mɛn tumaa goa ǹ nə́ woo ne Baabilonii gána nɛ, ǹsɛn min paa tɔ á re sii a kɔnboe biɛ bɛ̀ ǹ tá lɛn baraa bíi. A giala maǹ die pii: «Dɛnaa Lawa die a n baa ka Sedekiasi bɛ́ lɔn hinlaa ka Akaabu bɛ́ lɔn Baabiloniin kii nə́ ǹ kaa tɛ-n!» 23Kɛa sii kɛ n die ǹ yii, a giala, maǹ nə́ sii bɔbɔnɛɛ zɛnaa Izirayeli gána nɛ, maǹ nə́ naarɛbaa zɛnaa ka ǹ miãn lɔn nɛ. Maǹ nə́ goã mà maǹ boo diɛ ka masɛ tɔ nɛ, sɛnɛ soɛ nɛ. A da yaa, ma màn kɔn pɛ ǹ nɛ wa. Ma tá a tumaa doɛ̃ ma tá a siére-a dɔn. Dɛnaa Lawa a da ǹ boo ne.
Semayia a soɛ
24N die n kɛ pɛ Nehelamu min Semayia nɛ: 25– Dɛnaa Lawa Izirayeli a Lawa n kɛ pii: «Ń goã ń sɛ́wɔ dia ka n din tɔ nɛ minin kɛn la giã-n Zeruzalɛmu, Maseya a nɛgiĩ Lawa a wúlu-bɔle Sefania nɛ ka Lawa a wúlu-bɔle gialakunun kɛn nɛ. A n kiɛ̃-n bɛa sɛ́wɔ lɛ-n kɛnɛn: 26Dɛnaa Lawa na á n koa Lawa a wúlu-bɔle lɛa Lawa a wúlu-bɔle Zozadaa bǎã nɛ. N doamaa nɛ n ga gàãnaan kɛn walan n dinin biɛ Lawa a boo gii-dalin lɛa Lawa a kion. N doamaa nɛ n nə ǹ tumaa kaa zɔrɔka nɛ, n fɔlɔ guguru da ǹ bɔlɔ-a. 27Sɛnɛ, n boo da ka Anaatɔti min Zeremii-n wa, asɛ mɛn nə goã n din biɛ Lawa a boo gii-dali lɛa wɔ yɔrɔ-a. Bɛ n siɛ lɔn? 28Á ke, á sɛ́wɔ din kiɛ̃ á dia wɔ la Baabilonii a n pii: Ka á re beleboe walan. Ka kionən dɔ ka giã ǹ nɛ. Ka dù gɔrɔn bɔ ka ǹ dù bii!» 29Sɛnɛ, Lawa a wúlu-bɔle Sefania bɛa sɛ́wɔ lɛ pɛ Lawa a wúlu-bɔle Zeremii ni. 30Dɛnaa Lawa tɔ́n boo da ka Zeremii ni á pɛ nɛ: 31– Boo kɛ dia wo bɛ̀rɛbaa ǹ bǎã-n wolen kɛn tumaa la: «Dɛnaa Lawa n kɛ pii Nehelamu min Semayia a paǹ li: Semayia boo da ka nɛ ka ma tɔ nɛ, sɛnɛ masɛ dia wa. Á soɛ boon da ka nɛ. 32Kanna, masɛ Dɛnaa Lawa n kɛ pii: Man die yui Nehelamu min Semayia gialaa, a nɛnyaanan nɛ ka a nɔ̀ɔnɔn nɛ. A sumu min kɔ́n ba re goɛ̃ maa zaman lɛ bii wa. Ma bɛ́ re bǐɛ̃ mɛn zɛnɛɛ maa zaman nɛ, Semayia a sɔmɔ min kɔn ba re bɛ yii wa. A giala, Semayia na á maa zaman sɔsɔmɔ ǹ nə́ n gòãn dii ma ganaa.» Dɛnaa Lawa a da ǹ boo ne.
اکنون انتخاب شده:
Zer 29: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.