Zer 27
27
Zǔu mɛn bɛ́ Baabiloniin kii a pàã giala pii
1 #
Kiin2 24.18-20; KZS2 36.11-13 Zoziasi a nɛgiĩ Zozakimu a kiibaa giala kɔ waáraa Zudaa gána mìi la, Dɛnaa Lawa boo da Zeremii ni á pɛ-n kɛnɛn: 2– Dɛnaa Lawa màn mɛn pɛ ma nɛ á ke: «Ki ma, n gɔnɔn sɛlɛ, n zǔun zɛnaa. Bɛ kio, n nə ǹ kaa n wìi li. 3N tɔn nə ǹ kɔ Edɔmun kii a dí-nyali gole kɛ la kànaa, Moabu gána a kii wɔ nɛ, Amɔnitin kii wɔ nɛ, Tiirin kii wɔ nɛ ka Sidɔn gána kii wɔ nɛ, ǹ mɛnɛn bɛ́ ǹ nə́ daa Zeruzalɛmu Zudaan kii Sedekiasi li. 4N die n kɛ laa ǹ ganaa ǹ kiin wɔ lɛa mà Dɛnaa Lawa Pàãyiidɛnaa, Izirayeli a Lawa n kɛ pii: 5Ma din ni má tán zɛnaa, minbuiinin ni ka tɔɔn tumaa-n tán la. Man má ǹ zɛnaa ka ma pàã gole kɛ laanka maa boo sii la gole kɛ nɛ. Bɛ̀ min mɛn kɔɔ̃n kɔ ma ganaa, ma mànan mɛnɛn zɛnaa ma ǹ koe bɛa dɛnaa la. 6Kanna kəni, man die kaa gánan kɛn tumaa kiɛ maa dí-nyali *Baabiloniin kii Nebukadenezɔɔrɔ a pàã giulun. Gòon-mànan dinin tá re a dí nya ǹ mànan biɛ. 7Tɔrɔ tumaa á re dí nyɛɛ nɛ, a nɛgiĩn ni ka a nɔ̀ɔnɔn nɛ. Bɛ n die n zɛnɛɛ miɛ̃ yǎa biikoo mɛn li bɛ̀ tɔrɔ gigiã laanka kii pàãdɛnan ná a dɔ a gána da ǹ dɔn pàã giulun. 8Kɔntan, gána hinlaa tɔrɔ kɔn tá yii a n piã ka Nebukadenezɔɔrɔ a pàã kɛ nɛ, ke ma da ǹ wìi li ka zǔu bɛ́ lɔn. Á bǐɛ̃ kɔ, man die yui bɛa gána kɛ gialaa ka zia nɛ, bòo ne ka piɛ̃ busu ni. Man die Baabiloniin kii biɛ bɛa gána lɛ a ziziɛ̃ wole lɛa. Dɛnaa Lawa a da ǹ boo ne. 9Kasɛn, ka nyan nə n too kɔ kaa Lawa a boo gii-dalin lon wa, ǹ mɛnɛn bɛ́ biɛ̃ ǹ pii, narɛɛ giala-pɛlen ne, lon gɔ̀nɔn ganaa pɛlen ne, ka kɔ́lɔnbaalin ni. Maǹ pii ka nɛ, mà ka a re goɛ̃ Baabiloniin kii a pàã kɛ giulun wa. 10Ǹ bɛ́ boo mɛn diɛ ka nɛ, soɛ nɛ. Bɛ̀ ka n too kɔ ǹ lon, ka wɔlɔ á re sɔsɔɔ koe kaa gána ganaa. Hiĩ, man die ka pɛsɛ̃ bǎã yii ni, ka gã walan. 11Sɛnɛ, bɛ̀ tɔrɔ mɛn lɛ kɔ Baabiloniin kii a zǔu kɛ ganaa á dí nya nɛ, man die bɛa tɔrɔ lɛ toɛ a gána nɛ, ǹ na ǹ tán kɔsɔ, ǹ giã a nɛ. Dɛnaa Lawa a da ǹ boo ne.»
12Masɛ Zeremii n má kɛa boo kɛ lɛ miã pɛ Zudaan kii Sedekiasi ni. Má pɛ nɛ: – Nsɛ, n laanka n zaman doamaa nɛ ka lɛ kɔ Baabiloniin kii a pàã kɛ ganaa ka zǔu bɛ́ lɔn. Ka dí nya nɛ, ka dí nya a zaman dɔ nɛ, ka yii á re goɛ̃ koo. 13A n siɛ lɔn n laanka n zaman tá zoɛ̃ li mà ka gã zia gɔn, bòo ne hinlaa piɛ̃ busu ni. Táa Dɛnaa Lawa na á bɛ lɛ pɛ gánan kɛn wɔ paǹ li, ǹ mɛnɛn bɛ́ re n piɛ̃ mà ǹ ba dí nyɛɛ Baabiloniin kii n wa. 14Lawa a boo gii-dali tɛnɛn man pii ka nɛ: «Ka a re goɛ̃ Baabiloniin kii a pàã giulun wa.» Ǹ bɛ́ boo mɛn diɛ, soɛ nɛ. Ka nyan nə n too kɔ ǹ lon wa. 15Masɛ bie má ǹ dia wa. Maǹ pii mà ǹsɛn man boo diɛ ka masɛ tɔ nɛ, sɛnɛ, soɛ nɛ. Bɛ̀ ka n too kɔ ǹ lon, ka ǹ die giɛ̃, man die ka lui ma ka bɔ kànaa, ka dinin ni ka kaa Lawa a boo gii-dalin kɛn nɛ bɛa boon lɛn pii ka nɛ. Dɛnaa Lawa a da ǹ boo ne.
16Masɛ Zeremii, má boo da Lawa a wúlu-bɔlen manɛ ka minin kɛn tumaa nɛ ǹ nə́ goã ǹ tan. Má pɛ ǹ nɛ kɛnɛn: – Dɛnaa Lawa a da ǹ boo á ke: «Ka nyan nə n too kɔ Lawa a boo gii-dalin kɛn lon pii mà kànaa ka boɛɛn mà Lawa a kion a dí-nya ǹ mànan kɛn tá re wusii ǹ bɔ *Baabilonii gána nɛ ǹ daa. Maǹ soɛ boe. 17Ka nyan nə n too kɔ ǹ lon wa. Ka dí nya Baabilonii n kii ni. Ka yii á re goɛ̃ koo. Wàa n die toɛ kaa kiwi kɛbɔlɔ baa?» 18Bɛ̀ bɛa minin lɛn man Lawa a boo gii-dalin lɛa, bɛ̀ maǹ Lawa a boo gii diɛ sonbore, ǹ doamaa bɛ́ nɛ ǹ màn mɛn nyankɔ Dɛnaa Lawa Pàãyiidɛnaa lon, bɛ n ka kɛ nɛ: Màn giɔ̀mɔ kakan mɛnɛn bɛ́ tɔn Lawa a kion, Zudaan kii a kion ka Zeruzalɛmu kiwi ni, ǹ nyan toa bɛn nə wo Baabilonii wa. 19Boo n Dɛnaa Lawa li bìbìn kɛn wɔ paǹ li, doo kaaraa kɛ nɛ, wotoron kɛn nɛ, ka mànan kɛn tumaa nɛ tɔn Zeruzalɛmu. 20Taãn nɛ, Baabiloniin kii Nebukadenezɔɔrɔ bɛ́ Zozakimu a nɛgiĩ Zudaan kii Yekonia laanka Zeruzalɛmu ka Zudaa a kiãn goɛ, a bɛa mànan lɛn tumaa goa Zeruzalɛmu á woo ǹ ne Baabilonii wa. 21Dɛnaa Lawa Pàãyiidɛnaa, Izirayeli a Lawa n kɛ pii màn giɔ̀mɔ kakan kɛn wɔ paǹ li Lawa a kion, Zudaan kii a kii kion ne hinlaa ka Zeruzalɛmu kiwi ni: 22«Bɛa mànan lɛn tumaa tá re n goɛ, ǹ wo ǹ ne Baabilonii gána nɛ. Maǹ die goɛ̃ walan, yǎa ǹ mɛn pinaa bɛ̀ ma yiri daa ǹ nɛ, má n die ǹ ne kànaa.» Dɛnaa Lawa a da ǹ boo ne.
اکنون انتخاب شده:
Zer 27: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.