Zer 13
13
Maabɛlɛ a sii a kɔnboe
1Dɛnaa Lawa a da ǹ boo á ke: «Maabɛlɛ sonbore pii, n yii n binbin ni, sɛnɛ, n nyan toa mu mɛ a ganaa wa.» 2A kɔnpɛ ka Dɛnaa Lawa a da ǹ boo ne, má bɛa maabɛlɛ lɛ pii, má n binbin kũ ni. 3Dɛnaa Lawa wusoo á boo da ma-n doo á pɛ: 4«N maabɛlɛ mɛn lɛ pii n nə́ n binbin kũ ni, wo Faara tà lɛ-a, n duru gɛ̀fu yala-n.» 5Má woo Faara tà lɛ-a, má maabɛlɛ lɛ duru ka Dɛnaa Lawa pɛ ma-n lɔn. 6Lɛawaa damata bɛ kio, Dɛnaa Lawa boo da ma nɛ á pɛ: «N bɔyaa n wo Faara. Ma pɛ máa n maabɛlɛ mɛn lɛ duru walan ke, wusoo n wo bɛ lɛ saa.» 7Má n bɔyaa ma woo Faara, má woo ga bɛa maabɛlɛ lɛ li a duru ǹ bǎã nɛ. Sɛnɛ, má woo maabɛlɛ lɛ yaa á bɔɔ̃ lenlen, là goon din ba a ganaa doo wa. 8Dɛnaa Lawa tɔn boo da ma-n kəni á pɛ: 9«Masɛ Dɛnaa Lawa a da ǹ boo á ke: A din yɔrɔ goon la, man die Zudaa a din koa kɛ ziziɛ̃, kɔnlɛ ka Zeruzalɛmu dɔ a din koa gole kɛ nɛ. 10Tɔrɔ baraan manɛ. Ǹ ba n too koe maa da ǹ boon li wa. Maǹ nə n dinin foo kaka koe, ǹ paraamaa-n lawa kɔsɔn ganaa ǹ tá ǹ guguru koe. Ǹ tá re n biɛ ka maabɛlɛ kɛ bɛ́ lɔn, a na a màn kɔn bǐɛ̃ koe doo wa!» 11Dɛnaa Lawa a da ǹ boo á ke: «Minbuiin nɛn bɛ́ maabɛlɛ yii ǹ binbin ni lɔn, ma dɔ n má Izirayeli zaman laanka Zudaa zaman yii ma binbin ni miɛ̃, máa ǹ maa zaman baa, ǹ ma tɔ bɔ, ǹ gugurubaa da ma tɔ la, ǹ ma foo kɔɔ̃n kɔ. Sɛnɛ, ǹ nə n too kɔ ma lon wa.»
Lawa foo yoo a zaman li
12N die n pɛ ǹ nɛ kɛnɛn: – Dɛnaa Lawa, Izirayeli a Lawa a da ǹ boo á ke: «Doon man nə́ n zɛnaa mà ǹ duvɛ̃ kaa ǹ nɛ.» Bɛ̀ ǹ nə́ n lɛ si mà ǹsɛn tá bɛ doɛ̃, 13n pɛ ǹ nɛ kɛnɛn: – Dɛnaa Lawa a da ǹ boo á ke: «Maa foo-yoo kɛ n die gána kɛa min tumaa yii kuĩ ka yɔ bɛ min yii kuĩ lɔn, ǹ kiin mɛnɛn bɛ́ giã-n Davida a kii dankan la, ǹ Lawa a wúlu-bɔlen ne, ǹ Lawa a boo gii-dalin ni, ka Zeruzalɛmu min tumaa nɛ. 14Man die ǹ totoe kɔn nɛ, díi laanka nɛ, Dɛnaa Lawa a da ǹ boo ne. Sabarabaa ba a-n wa. Min kɔn makara á re ma kuĩ wa. Sàabaa ba la wa, man die ǹ bɔ̀n biɛ.»
Ka n too kɔ a biikoo li
15Ka n too kɔ, ka n too da.
Ka nyan nə n dinin koa wa.
Dɛnaa Lawa n boo diɛ ka ka nɛ.
16A laan bɛ̀ a n tèlò diɛ kɔ ganaa,
bɛ̀ ka n gòã na kɔlɔ ganaa kele
mìi ni,
ka gugurubaa da Dɛnaa Lawa,
kaa Lawa tɔ la.
Ka nə n yii diɛ penleen la,
sɛnɛ Dɛnaa Lawa n bɔyɛɛ a baa
wɔlɔ tì biribiri lɛa,
a n furuməə gole koe lɛ.
17Bɛ̀ ka n too kɔ gɔn waa kɛ li wa,
man wuu pii ka durii ni
kaa din koa kɛ taman yii.
Ma yii mu n piɛ̃ kiɛ,
a giala, maǹ nə́ Dɛnaa Lawa a zaman
goa ǹ nə́ woe ne.
Dɛnaa Lawa a boo kii wɔ paǹ li
18A pɛ kii laanka kii ǹ dan nɛ kɛnɛn:
Ka giã tán furu-n
a giala, kaa kii bafolo sonbore
kɛ bɔ ka mìi ganaa á mɛnaa.
19Negɛvu a kiwin kiɛnlɛn tiɛ̃maa nɛ.
Min kɔn ba ǹ buĩ doɛ̃ wa.
Sonbore, ǹ nə́ Zudaa minin goa,
ǹ nə́ woo ǹ tumaa nɛ bɛ̀rɛbaa
ǹ bǎã nɛ.
Zeruzalɛmu a yii gugurubaa nya
20Zeruzalɛmu, n yii saa n ga:
Zɔ́ɔn man boe gɔsɛ a lɛ̀gɔn li.
Ma tɔɔ kuru mɛn koa n li, bɛ á maa?
Sèren mɛnɛn nə goã n foo kɔɔ̃n koe,
ǹ tá maa?
21Ń giaárabaa zɛnaa ka ǹ tɛnɛn nɛ
ǹ lɛ mui ni.
Ǹ mɛn pinaa bɛ̀ ǹ nə́ n bɔyaa,
maǹ die n diɛ ǹ pàã giulun,
n nə n die wàa boo diɛ?
N nə n die fuu yii ka lɔ nɔɔrɔ kɔle
bɛ́ lɔn.
22Bɛa biikoo li,
n tá re nɔ̀n diɛ n din la
mà wàa na á baa kɛ á n yii.
Sonbore, bɛ̀ ǹ nə́ n mɔnaa goa lon,
bɛ̀ ǹ nə́ n kũ ka pàã nɛ,
n din a sii baraa damata lɛ a lɛa nɛ.
23Etiopii min tá boe la a n gɔ̀nɔn
ki bɔyaa?
Goe á boe la a na a sisiabaa kɛ bɔ
a din ganaa?
Haayii!
Kasɛn mɛnɛn dɔn lɛ mui ka
sii baraa zɛnaa nɛ,
ka ǹ siɛ lɔn ka boo sii bǐɛ̃ zɛnaa la.
24Man die ka pɛsɛ̃ paǹ yii li,
ka buu bisin bɛ́ lɔn,
diə gole a piɛ̃ n goɛ.
25Dɛnaa Lawa a da ǹ boo á ke:
Zeruzalɛmu, sii mɛn bɛ́ re n yii,
ma sii mɛn yɔrɔ bɔ n wɔ lɛa, bɛ á ke.
A giala, n yiri bɔ ka ma nɛ
ń nə n foo doa lawa kooron ganaa.
26Sɛnɛ, masɛ n die n mɔnaa goɛ
ma kɔ n yɔrɔ lɛ,
ma n tontoro da kanaa.
27Áh! Má n naarɛbaa kɛ yɛ,
n foo kɔɔ̃n lɛ dian kɛn nɛ,
n sìi da ǹ kɔrɔbaa kɛ nɛ,
kelen la, wurun ni.
Má n dì bɔbɔnɛɛn kɛn yɛ.
Wàa koe n ka kɛ nɛ
Zeruzalɛmu ganaa?
N ba li n nə n din *yoreen kɔ wa?
Yǎa biĩ kəni?
اکنون انتخاب شده:
Zer 13: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.