Iza 53
53
1 #
Rɔm 10.16; Zaã 12.38 Wɔ boo mɛn ma,
die na á golee li?
Die na á Dɛnaa Lawa a boo sii
la dɔ̃?
2Dɛnaa Lawa yɔrɔ-a,
a dí-nyali gole kɔ
ka da ten bɛ́ lɔn,
ka da gòon bɛ́ lɔn soe tán gere la.
Siĩnbaa a paǹ ba a ganaa
màn mɛn bɛ́ toɛ yii bɔ li wa.
A gama-a sii a min kuĩ wa.
3Ǹ nə́ n la bɔ a ganaa,
ǹ nə́ da ǹ gɔn dɔ̀ɔ̃ nɛ.
Nɔmaa wole ne,
a lɛ mui ka fuu ni.
A n ka min mɛn bɛ́ min kɔn ba
li mà a ga a ganaa wa.
Ǹ nə́ n la bɔ a ganaa,
a màn kɔn lɛa wɔ yii li wa.
4 #
Mat 8.17
A da yaa,
wɔ dinin busun man nə́ goã
a mìi ni.
A na á wɔa fuu si a din ganaa.
Wɔsɛn dɔn man ke taasɛ,
wáa Lawa n dɔlɔ boe a ganaa,
a n nɔmaa diɛ a mìi ni,
a ná a yii puusə koe.
5 #
Piɛ1 2.24
Sɛnɛ, wɔ dinin siɛ̃n taman yii ni,
ǹ nə́ dɛ ǹ nə́ busu da a ganaa.
Wɔa sii baraan taman yii,
ǹ nə́ yɔyɔrɛ.
Dɔlɔ mɛn bɛ́ là nyantoro koe
wɔ la
bɛ na á mɛ asɛ la.
A busulɛn taman yii,
wɔsɛn man kakabaa yii.
6 #
Piɛ1 2.25
Wɔ tumaa n wɔ goã ka
sère papaã wolen bɛ́ lɔn,
didie n woe a din mìi gialaa,
Dɛnaa Lawa wɔ tumaa a siɛ̃n da
a mìi ni.
7 #
SNS 5.6
#
NDS 8.32-33
Ǹ nə́ fuu nyaa nɛ,
ǹ ná a yii puusə kɔ
sɛnɛ, á lɛ kɔ bɛ ganaa
a lɛ n tumu,
ka sère nɛ mɛn bɛ́ ǹ nə́ woe ne
a dɛ ǹ bǎã nɛ,
ka sère mɛn bɛ́ ǹ tá a ka kuri
a lɛ n tumu.
8Ǹ nə́ kũ, ǹ nə́ kiri wɔ a ganaa,
ǹ nə́ dɛ.
Sɛnɛ, a din a waáraa minin bii,
die na á n yiri kɔ bɛ li.
Sonbore,
maǹ nə́ dɛ ǹ nə́ bɔ
yiikoonaan bii.
Ǹ nə́ dɛ á gã,
a zaman a sii baraan taman yii.
9 #
Piɛ1 2.22
Ǹ nə́ bĩ kun ka min baraan nɛ,
a yala n kun ka pàãman nɛ.
A da yaa dɔn,
a kakaarɛbaa sii kɔ́n zɛnaa wa,
boo kɔkɔrɔ kɔ́n bɔ a lɛ-n wa.
10Dɛnaa Lawa na á goã li
a yɔyɔrɛ ka fuu ni.
A bɛ́ á n din kɔ zɛ̀rɛ si Lawa la
ǹ *wúlu màn lɛa,
á re tɔrɔn yii,
a yii á re goɛ̃ koo a belebɔ.
Sii mɛn bɛ́ kɔɔ̃n Dɛnaa Lawa-a,
bɛ lɛ n die n zɛnɛɛ.
11Fuun kɛn lɛa á ǹ si a ganaa,
á re wɔlɔ fúlu yii.
Á re piɛ̃ ka là nyantoro ne.
A sii-doɛ̃ taman yii,
maa dí-nyali,
min pepere taãn-taãn kɛ
á re min gigiã darɛɛ
peperebaa ganaa,
a giala, á n toɛ̃ ka ǹ sii baraan nɛ.
12 #
Mar 15.28; Luk 22.37 Bɛ lɛ nɛ,
man bǎã koe la
min dadaran bii.
Á re zɔ́ɔn gɔn màn gii kɔn
ka pàãdɛnan nɛ.
A giala á n din kɔ gɛ̀ la,
ǹ nə́ da kun ka min baraan nɛ.
Taãn nɛ,
á n toɛ̃ ka min gigiã a sii
baraan nɛ,
á daa sii baraa-zɛnaalin gú ganaa.
اکنون انتخاب شده:
Iza 53: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.