Iza 50
50
Lawa n sɛ̀ pii a zaman ganaa
1Dɛnaa Lawa n kɛ pii:
Ka ǹ pii mà má kaa
náa Zeruzalɛmu loo,
ka a loo ǹ sɛ́wɔ nyaa ma-n kəni!
Ma ka sã min mɛn la,
má maa giɔ̀mɔ saraa nɛ,
ka ǹ dɛnaa pɛ ma-n kəni!
Á ke, bɛ̀ n yaa ǹ nə́ ka sã,
kaa siɛ̃n lɛn lɛa nɛ.
Bɛ̀ ǹ nə́ kaa náa loo,
kaa sii baraan lɛn lɛa nɛ.
2Ma bɛ́ ma daa, wàa na á baa
ma da min kɔn yaa wa?
Má lɛ dia, min kɔn ma lɛ si wa.
Wàa na á baa kəni?
Ka ǹ taasɛ mà maa boe la
ma ka si ma ka kaa wa?
Kaa kirisibaa ǹ pàã na a ba
ma lon wa?
A da yaa, maa paraa-mali dinsɔɔ̃
n yìsi mu piɛ̃ ka daɛ̃.
Man tà bɔyɛɛ ma baa diə lɛa.
Mu wɛɛ taman yii,
zɔ̀nɔn man giɛ̃, ǹ bɔɔ̃.
3Man wɔlɔ tì koe lon lɛ,
ma gɛ̀ koa ǹ mɔnaa wɔ a ganaa.
Foo doa Lawa-a fuu gɔ́ɔ̃ nɛ
4Ma bɛ́ má kɔnbɔ ma boo mɛn da,
ma pàãwɛɛnaa foo taã nɛ,
Dɛnaa Lawa n ma darɛɛ bɛ ganaa.
Baraabaraa baayɛlɛ,
a n ma yii kiɛ,
man too kɔ ka
kialandɛnaa sonbore bɛ́ lɔn.
5Dɛnaa Lawa má toon bũ,
man piã wa,
ma wusoo ma kio-n wa.
6 #
Mat 26.67; Mar 14.65 Min mɛnɛn bɛ́ ǹ nə́ goã
ma duwii,
má n dɔ̀ɔ̃ dia ǹ la.
Má n lɛtoro dia ma lɛtoro ka
woɛ̃ wolen la.
Min mɛnɛn bɛ́ ǹ nə́ goã sɔ kiɛ
ma la,
ǹ nə́ sɛ̀ kiɛ ma ganaa,
man yɔrɔ duru bɛn la wa.
7Dɛnaa Lawa n die maa gú ganaa,
bɛ lɛ nɛ, ma yii puusə kɔ wa.
Bɛ lɛ nɛ,
má n yɔrɔ laa ka kɔlɔ bɛ́ lɔn,
ma á doɛ̃ máa sìi á ma kuĩ wa.
8 #
Rɔm 8.33-34
Dɛnaa Lawa n mɔrɛɛ-n
ma ganaa,
asɛ mɛn bɛ́ sonbore koe ma la.
Die yii n we a kiri wɔ ma ganaa?
Wɔ n ta kiri wɔ ǹ bǎã-n kəni.
Die n li a ma zɛ̀rɛ baa?
Ǹ dɛnaa nə n zɔ̃ a dɔ ma li.
9Hiĩ, Dɛnaa Lawa n die
maa gú ganaa.
Die n boe la a kiri da ma la?
Á ke, maa zɔ́ɔn tumaa n
die pɔpɔsɛ,
ka mɔnaa bɛ́ lɔn, nimii kũ.
10Die n nyɛ́ɛ biɛ Dɛnaa Lawa
yii-n ka bii?
Bɛa Dɛnaa doamaa nɛ
a n too kɔ a dí-nyali lon.
Die n tɔ we tèlò-n,
tɛ fúlu goon ná a banban?
Bɛa Dɛnaa doamaa nɛ
a golee Dɛnaa Lawa li,
a n foo doa a Lawa ganaa.
11Sɛnɛ, kasɛn man tɛ koɛ
ka n ka dinin lɛnpɛnɛ ka
kiɛ tɛdɛnan nɛ.
Á bǐɛ̃ kɔ, ka wo bɛa tɛ lɛ nɛ
ka kaa kiɛn tɛdɛnan lɛ nɛ.
Dɛnaa Lawa din nə die bɛ zɛnɛɛ,
ka n die wɛɛ tán fuu gole gɔ́ɔ̃ nɛ.
اکنون انتخاب شده:
Iza 50: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.