Iza 40
40
Dɛnaa Lawa a daa
1Kaa Lawa pɛ:
Ka maa zaman lɛ foo doa,
hiĩ ka maa zaman lɛ foo doa.
2Ka Zeruzalɛmu foo taã,
ka pɛ nɛ ka lɛn gole ne,
mà a bɛ̀rɛbaa ǹ dí lɛ nya,
mà a siɛ̃n lɛn dɔlɔ nya.
A giala Dɛnaa Lawa da
a sii baraan lɛn
tumaa a dɔlɔ saraa ganaa.
3 #
Mat 3.3; Mar 1.3; Zaã 1.23 #
Luk 3.4-6
Lɛ-dɛ n boe diə gole ne:
Ka zii zɛnaa Dɛnaa Lawa wɔ lɛa.
Bǎã gere ne,
ka zii tele wɔa Dɛnaa Lawa
wɔ lɛa.
4Ka tii kaa nyankɔrɔ basa kɛn nɛ,
n yoo lon.
Ka kelen laanka tentenen sɛlɛ,
ǹ kɔnpɛ.
Ka tenten mìin tumaa bɔyaa,
ǹ wurun baa.
Ka kelen tumaa baa
nyankɔrɔ basa lɛa.
5Ka bɛ-n kəni,
Dɛnaa Lawa a siĩnbaa á re n doɛ̃.
Minbuiin nɛ tumaa á re yii,
ǹ dɔ̃ mà Dɛnaa Lawa boo da.
6 #
Zaaki 1.10-11; Piɛ1 1.24-25 Min goon pɛ: «N lɛ dɛ!»
Min kɔsɔ nɔ̀n da:
«Man lɛ dɛ ka wàa n nɛ?»
Á ma lɛ si:
«Minbuiin nɛn man ka buu bɛ́ lɔn.
Ǹ ba kaka ǹ nə́ la wuru gɔ́ɔ̃ nɛ
ǹ buu-n wa.
7Bɛ̀ Dɛnaa Lawa a piɛ̃ daa,
buũ n laɛ, da buu n bɛbɛnɛ.
Sonbore,
minbuiin nɛn man ka buũ bɛ́ lɔn.
8Buu n laɛ, dà buu n bɛbɛnɛ.
Sɛnɛ, wɔa Lawa a boo na
a tan yǎa duduu.»
9 *Siɔn boo tii kɔɔ̃n pɛle,
dii kele sasa la,
Zeruzalɛmu, boo tii kɔɔ̃n pɛle,
n lɛn saa ka pàã nɛ,
n lɛn saa lon, nyɛ́ɛ nyan nə n kũ wa.
A pɛ Zudaa kiwin manɛ:
«Kaa Lawa á ke!
10 #
Iza 62.11; SNS 22.12 Á ke, kaa Dɛnaa Lawa
n die ka pàã gole ne.
Pàã tá a lon, a giã minin mìi la.
Á ke, a màn mɛn yɛ,
a n die ka bɛ nɛ.
A n die ka a dí a saraa nɛ.
11 #
Eze 34.15; Zaã 10.11 Ká tɔɔn-lɛduə̃li bɛ́ lɔn,
a na a tɔɔn lɛduĩ.
Bɛ̀ á n gɔn saa ǹ li,
maǹ nə n lɛ soekɔn.
A n sère nɛn guĩ a kolɔn.
Sere daanan mɛnɛn bɛ́ nɛn nə́ ǹ kio,
a n woe bɛn nɛ sɛlɛlɛ.»
Dɛnaa Lawa n màn tumaa mìi la
12Die bin na á yìsi mu zɔɔ̃
a gɔn tìsì bii?
Die bin na á lon a golebaa zɔɔ̃
ka a gòon yii ni?
Die bin na á tán a gusuũ zɔɔ̃ ka sóo ne?
Die bin na á kelen
gugurubaa zɔɔ̃,
á tentenen gugurubaa zɔɔ̃
ka kilo ne?
13 #
Rɔm 11.34; Kor1 2.16 Die bin na á Dɛnaa Lawa Yiri a woo ǹ bǎã yɛ?
Die bin na á doroo kɔ la?
14Dɛnaa na á n doa kɔn die ne
á tɔn sii giala ma?
Die na á peperebaa ǹ zii nyaa nɛ?
Die na á doɛ̃ kɔ la?
Die na á yiridɛnaabaa ǹ zii
nyaa nɛ?
15Á ke, gánan man ka mu a
dɔɔ bɛ́ lɔn doɛ sóo ne.
Maǹ ka nyɔɔsɔ̃ nàn goon bɛ́
lɔn kilo la.
Mu gánan mɛnɛn da bii,
bɛn man puusə ka gusuũ bɛ́ lɔn.
16 *Wúlu màn mɛn kɔnbɔ
ka Dɛnaa Lawa nɛ,
Liban a tɔɔn tumaa a kaa kun
ba bɛ boe wa.
Daã tumaa a gɔn a kaa kun
ba a *wúlu bɔ ǹ bǎã a tɛ koa boe wa.
Dɛnaa Lawa a zɔɔ̃ kɔn-a wole banban
17Tɔrɔn tumaa a kaa kun
ba màn kɔn lɛa
Dɛnaa Lawa yɔrɔ-a wa.
Ǹ ba màn kɔn lɛa a yii li wa.
Maǹ piɛ̃ lɛa a yɔrɔ-a.
18 #
NDS 17.29
Wɔ n boe la wɔ Dɛnaa Lawa
zɔɔ̃ kɔn ka die ne?
Wɔ n boe la wɔ wàa mɛn
baa a kɔnboe lɛa?
19Gɔn dí-nyali na á màn nyín
lɛ zɛnaa,
sana-yoli sana kaa la,
á wɔrɔ giin kaa a ganaa.
20Min mɛn bɛ́ doobaa lɛa
á la yii ni,
bɛa gɔn màn kɛ lɛ a zɛnaa ganaa,
gɔn mɛn bɛ́ a bɔɔ̃ wa,
asɛ n giɛ bɛ li,
bɛ kio, a n giɛ gɔn
dí-nyali sonbore li,
boe nyín sɛlɛ la,
boe la á n golee lon.
21Kaa tɔn bɛ doɛ̃ wa?
Ka tɔn ma wa?
Ǹ bɛa boon kɛn pɛ ka-n haalɛ
bibi wa?
Ka kanaa a giala daa ǹ gɔn
giala ma wa?
22Dɛnaa Lawa a kii dankan nə tán
a buuriibaa lalan lon.
Minbuiin nɛn man ka bisin
bɛ́ lɔn a yii li.
Á lon lɛ bɔ ka mɔnaa bɛ́ lɔn,
A ná a lɛ bɔ ka mɔnaa zìã bɛ́ lɔn,
a n die giɛ̃ a nɛ.
23A n kanaa nyɛɛnaandɛnan ziziɛ̃.
Min mɛnɛn bɛ́ kanaa
mìilandɛnan lɛa,
a n bɛn biɛ màn kooro lɛa.
24Ǹ tɔn nə ǹ da tán bɔrɔ wa,
ǹ tɔn nə ǹ zumu bɔrɔ wa,
ǹ gòonən nə tɔn wɔ tán
dinin bɔrɔ wa,
Dɛnaa Lawa n piɛ̃ pii ǹ ganaa.
Maǹ laɛ, piɛ̃ gole n woe ǹ ne,
ka buu gere bɛ́ lɔn.
25Lawa sonbore n nɔ̀n diɛ:
Ka n boe la ka ma zɔɔ̃ kɔn ka
die ne?
Die n boe la a goã goon ka
masɛ nɛ?
26Ka n yii saa lon ka ga!
Die na á leeren zɛnaa?
Die nə ǹ diɛ tɔ wɔ ganaa
kɔn kio ka sɔraasin bɛ́ lɔn?
Min mɛn bɛ́ ǹ tumaa bíi ka
ǹ tɔ nɛ,
ǹ dɛnaa a kakabaa laanka a pàã la yii ni.
Leere kɔn ba nyaabiɛ ǹ tɔ
bíi ǹ bǎã-n wa.
Dɛnaa Lawa n pàã koe pàãwɛɛnaan la
27Izirayeli, wàa na á baa n tá
boo diɛ,
Zakɔba wàa na á baa
n tá gungunun sii,
n nə́ pii:
«Maa biɛ̃ ǹ ke,
Dɛnaa Lawa yii ba bɛ ganaa wa.
Ma kɔnbɔ ka sii mɛn nɛ,
maa Lawa yii ba bɛ ganaa wa.»
28N ba bɛ doɛ̃ wa?
N bin ma wa?
Lawa mɛn bɛ́ a tan haalɛ bibi
yǎa duduu,
Dɛnaa Lawa,
a din na á tán tumaa zɛnaa.
Pàã a nyaabiɛ a ganaa duduu wa.
A nɔmɛɛ wa.
Dan ba a sii-doɛ̃ la wa.
29A n wusii a pàã kɔ
pàãwɛɛnaa la.
Min mɛn bɛ́ á nɔmaa,
a n bɛa dɛnaa foo taɛ̃.
30Tɔntɔraan dinin tá nɔmɛɛ,
ǹ pàã nya.
Min kakan dinin tá boe ǹ mɛnaa.
31Sɛnɛ, min mɛnɛn bɛ́ n foo
doɛ Dɛnaa Lawa ganaa,
bɛn man wusii ǹ pàã dii yɛ.
Maǹ yui ka giogialatã-a bɛ́ lɔn,
baa sii, ǹ ba nɔmɛɛ wa.
Maǹ woe nyɛɛnɛ, ka pàã nɛ.
اکنون انتخاب شده:
Iza 40: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.