Iza 28
28
Izirayeli a kiwi gole Samarii a ziziɛ̃
1Wàa koe-n ka kɛ nɛ
Samarii ganaa!
Efrayimu a yɔ-milin man nə
n dinin koɛ kiwi k a lɛa.
Ǹ dinin yii li a n ka kii bafolo
bɛ́ lɔn
tenten mìi ni nyankɔrɔ
basa sonbore kɛ nɛ.
Sɛnɛ, ka da buũ gere
bɛ́ lɔn yɔ-milin mìi ni,
kiwi lɛ dɔ n die n biɛ miɛ̃.
2Min kaka n ke, pàã ná a lon,
Dɛnaa n bɛ lɛ diɛ.
A na á kɔnbɔ ka la nɛ,
kiɛ ka gii ni, basaã koe,
la gole lɛa a mu bǎã tumaa si
á n kɔ lɛ.
Bɛa min kɛ n màn tumaa ziziɛ̃
ka pàã nɛ.
3Kiwi ke ka kii bafolo bɛ́ lɔn
Efrayimu a yɔ-milin kɛn yii li,
bɛ n die n yɔyɔrɛ.
4Da buũ geren kɛn,
nyaǹ sonbore lɛa Samarii kiwi
lɛ ganaa,
tenten mìi ni nyankɔrɔ
basa sonbore kɛ nɛ,
bɛn tá re n biɛ ka gɔ́rɔ nɛ bɛ́ lɔn,
á ma, a niɛ̃ biikoo ná a tɔn dɔ wa:
Bɛ̀ min mɛn yɛ,
bɛa dɛnaa n siɛ a bii goon lɛa.
5Bɛa pinaa kɛ nɛ, Dɛnaa Lawa Pàãyiidɛnaa a zaman mɛn yii goã koo, a dinmaa n die n biɛ kii bafolo lɛa, gii giɔ̀mɔ kaka lɛa bɛn wɔ lɛa. 6Min mɛnɛn doamaa bɛ nɛ ǹ kiri pepere wɔ, a n die peperebaa ǹ yiri koe bɛn la. Min mɛnɛn bɛ́ zɔ́ɔn lui kiwi a kiɛnlɛn ganaa, a n die pàã koe bɛn la.
Yɔ-mili baraan man yaa we Izayii ganaa
7Duvɛ̃ taman yii
Lawa a wúlu-bɔlen
laanka Lawa a boo gii-dalin
man boo kooron diɛ,
yɔ kakaarɛ nə ǹ diɛ
tatalaa ganaa.
Yɔ kakaarɛ taman yii
maǹ boo kooron diɛ,
duvɛ̃ nə́ ǹ yiri lɔlɔkɔn,
yɔ kakaarɛ nə ǹ diɛ
tatalaa ganaa.
Bɛ̀ ǹ nə́ sii-nyaan yɛ,
maǹ boo kooron diɛ.
Bɛ̀ ǹ tá kiri we, ǹ yii á wɔlɔ
yii wa.
8Ǹ tabalan tumaa n pisəə lɛa,
ǹ tumaa n gɔgɔrɛ.
9Bɛa màn-milin lɛn man nɔ̀n diɛ:
Izayii n zoɛ̃ li a daraa kɔ die la?
A na a boo giala pii die ne?
Nɛnyaanan mɛnɛn bɛ́ ǹ nə́ ǹ lɛ
na nyɔ ganaa sisia?
Nɛnyaan tiɛɛ̃nɛn mɛnɛn bɛ́
ǹ nə́ ǹ lɛ bɔ nyɔ ganaa sisia?
10A n zoɛ̃ li mà a wɔ daraa
sɛ́wɔ nɛ gogoonmaa dan yii li,
sii-nyaa gogoonmaa dan yii li,
doroo gogoonmaa dan yii li!
11 #
Kor1 14.21
Haya, sisia kəni,
Dɛnaa Lawa n die boo diɛ
ka zaman lɛ nɛ ka bobo-pɛlin ni,
bɔlɔ soree lɛa zaman lɛ bɛ́ a ba
ǹ mɛn miɛ wa.
12A da yaa, á pɛ ǹ nɛ:
«Kànaa n bǎã kiĩn lɛa.
Min mɛn nɔmaa,
ka toa bɛa dɛnaa nə n susu.
Kànaa n bǎã kiĩn lɛa.»
Sɛnɛ, ǹ lɛ kɔ ǹ nə́ n too kɔ wa.
13Bɛ lɛ nɛ, Dɛnaa Lawa á re ǹ darɛɛ kɛnɛn: Sɛ́wɔ nɛ gogoonmaa dan yii li, sii-nyaa gogoonmaa dan yii li, doroo gogoonmaa dan yii li! Bɛ̀ ǹ tá tɔ we kəni, maǹ die mɛnɛɛ tán ǹ làfu la, ǹ wen nə yiyiɛ. Kan tá re ǹ kuĩ, ǹ nə ǹ baa kòso nɛn lɛa.
Kion gòã daa ǹ kɔlɔ Siɔn
14Kasɛn foo-saalin kɛn
Zeruzalɛmu nyɛɛnaan boe,
ka n too kɔ Dɛnaa Lawa a boo li:
15Ka ǹ pii:
«Wɔ́ lɛ kɔ kɔn la wɔ ka gɛ̀ nɛ,
wɔ́ lɛ kɔ kɔn la wɔ ka geren ne.
Bɛ̀ koe daa, a re wɔ yii wa.
A giala,
soɛ n wɔa mìi duru ǹ bǎã lɛa,
màn mɛn bɛ́ a taãn lɛa wa,
bɛ n wɔa duru ǹ bǎã lɛa.»
16 #
Loe 118.22-23; Rɔm 9.33; 10.11; Piɛ1 2.6 Bɛ lɛ nɛ,
Dɛnaa Lawa a boo á pii:
«Man kion gòã daa ǹ kɔlɔ diɛ tán *Siɔn.
Kɔlɔ barkadɛnaa nɛ,
doa-n tán kaka.
Min woo min nə́ n tiləə a ganaa,
bɛa dɛnaa a re bìn diɛ wa.
17Peperebaa n die goɛ̃ maa
màn zɔ́ɔ̃ ǹ màn lɛa,
kiri pepere n die goɛ̃ maa biɛ nàn lɛa.»
La gii á re kaa minin sã ǹ
mìi duru ǹ bǎã kɛ ziziɛ̃.
Mu á re n koe kaa duru ǹ bǎã kɛ lɛ.
18Ka lɛ kɔ kɔn la mɛn wɔ ka gɛ̀ nɛ,
bɛ á re sàabiɛ,
ka ǹ mɛn dɔ wɔ ka geren ne,
bɛ dɔ a re yɔrɔ yii wa.
Bɛ̀ koe daa, á re ka yɔyɔrɛ.
19A n die kiɛ̃ baayɛlɛ baayɛlɛ,
penleen ka tèlò.
A kiɛ̃ gogoonmaa yii,
a n die ka bii.
Bɛ̀ minin ná a boo giala ma,
nyɛ́ɛ gole á re ǹ dii.
20Ka n die n biɛ ka min mɛn bɛ́
a piì kiɛɛrɛ kɔ waa ma la ganaa,
a kɔmalɛ kiɛɛrɛ kɔ
kɔ min lɛ ganaa.
21 #
Zoz 10.10-12; Sam2 5.20; KZS1 14.11 Dɛnaa Lawa n die sii zɛnɛɛ
ka Perasimu a nyankɔrɔ basa bɛ́ lɔn.
Bɛ̀ á re a dí nyɛɛ,
a foo-yoo á die a gɔ̀nɔn diɛ
bìn diɛ ganaa,
ka Gabawɔ̃ nyankɔrɔ basa wɔ bɛ́ lɔn.
Sɛnɛ, a n die goɛ̃ tɔwaa ǹ dí lɛa.
A bɛ́ re dí mɛn nyɛɛ,
bɛ n die goɛ̃ kaãbaa ǹ dí lɛa.
22Ka foo-saa ǹ sii toa walan kanna kəni!
Bɛ bie wa,
kaa fɔlɔ biɛn tá re wusii ǹ ka suu.
A giala,
má Dɛnaa Lawa Pàãyiidɛnaa lɛ ma,
á gole kiwi lɛ tumaa a ziziɛ̃ li.
Yiridɛnaabaa n Dɛnaa Lawa wɔ lɛa
23Ka n too da,
ka n too kɔ ma lon!
Ka yiri bɔ,
ka n too kɔ maa boon li.
24Buu-kɔsɔli ba n din
nɔmɛɛ biikoo yii li
a na a wuru lɛ kɔsɔ, a na a zii bɔ,
a na a tii kòrò yu wa.
25Sɛnɛ, a n wuru lɛ gɔ́ɔ̃
zɛnɛɛ bɔrɔ,
bɛ kio, a n nigɛli laanka kumɛ̃#28.25 Nigɛli laanka kumɛ̃ man nə́ kɔnbɔ ka nyansã nɛ. diɛ,
bɛ kio, a tɔn *belee laanka *ɔrzi da,
a tɔn a gɔn nyɔmɔɔ ka màn
tɔrɔ kɔsɔ nɛ wuru lɛ lɛkoro-a.
26A Lawa na á bɛa sii zɛnaa ǹ
gɔn kɛ lɛ nyaa nɛ,
á daraa a ganaa.
27Min kɔn ba nyansan duwii
ka ɛrsi#28.27 Wuru tii nyuə̃ ǹ màn nɛ a sɔn nə́ sosolo diin nə́ baɛ̃. n wa,
ǹ ba boe la ka wotoro-n wa.
Sɛnɛ, maǹ nigɛli duwii ka bàlà nɛ,
ǹ kumɛ̃ duwəə ka lasa nɛ.
28Maǹ belee loe ǹ nə́ buuru diɛ nɛ,
sɛnɛ ǹ bie duwii miɛ̃ duduu wa.
Tɔɔn laanka wotoro gòã n boe la,
sɛnɛ, ǹ ba yɔyɔrɛ wa.
29Bɛa dí nya ǹ gɔn kɛ dɔ n boe
Dɛnaa Lawa Pàãyiidɛnaa li.
Yiri kɔ wole sonbore ne,
a dí-doɛ̃ á gole.
اکنون انتخاب شده:
Iza 28: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.