Abak 2
2
1Masɛ Abakuku,
man die giɛ̃ wɔlɔ lɛduə̃
ǹ bǎã kɛ nɛ,
ma gole lon kungɔn la,
man yii da ma ga,
Dɛnaa Lawa bɛ́ re
boo mɛn pii ma nɛ,
maa lɛ dia lɛ a binyəə lɛa.
Dɛnaa Lawa a lɛ si
2Dɛnaa Lawa ma lɛ si á pɛ:
Ma bɛ́ sii mɛn nyɛɛ n nɛ, a kiɛ̃.
A kiɛ̃ goon la màn mɛn bɛ́ toɛ,
ǹ boo la ǹ pɛ foaã nɛ.
3 #
Ebr 10.37
Siin kɛn ma á ǹ nyɛɛ,
ǹ tá re yɔrɔ yii.
Sɛnɛ, yǎa ǹ biikoo doe.
Kànaa ka boɛɛnɛ,
ǹ tá re yɔrɔ yii.
Soɛ bie wa.
Haalɛ ta a biikoo n sɔsɔɔ,
n yii da n foo n doa nɛ.
Ma boo mɛn pɛ,
á re yɔrɔ yii a biikoo li,
sàabaa ba la wa.
4 #
Rɔm 1.17; Gal 3.11; Ebr 10.38 Á ke: Min mɛn bɛ́ a pepere wa,
bɛa dɛnaa á re mɛnɛɛ.
Sɛnɛ, min mɛn bɛ́ pepere,
a bɔlɔgoondɛnaabaa n die toɛ
a yii goã koo.
5Duvɛ̃ nə min piɛ̃ boe.
Din gole-kɔlin ba kiɛ̃
bǎã goon ne wa.
Ǹ bɔlɔ yala n koo banabana
ka geren piɛ bɛ́ lɔn.
Ǹ ba kiɛ̃ wa ka gɛ̀ bɛ́ lɔn.
Maǹ nə́ n dinin lɛnpɛnɛ
ka gánan nɛ,
ǹ tɔrɔn tumaa kaa ǹ pǎã giulun.
6Sɛnɛ, ǹ tɔrɔn mɛnɛn tumaa kũ,
bɛn tá re yui ǹ gialaa
ka suusun ni,
ka boo baraan nɛ.
Koe sooro min baraan wɔ lɛa
Maǹ pii: Kaa wɔ n ka koe ne,
kasɛn mɛnɛn bɛ́ gɔn mànan soekɔn,
ǹ nə ǹ ba kaa wɔ lɛa wa.
Kaa giɔ̀mɔ kɛ n goɛ̃ gole
yǎa biĩ kəni?
7Kaa giɔ̀mɔdɛnan
tá re yui bǎã goon ne,
ǹ da ka kio.
Ǹ tá re n yii dɔrɛɛ,
ǹ ka gɔ̀nɔn da bìn diɛ ganaa.
Ǹ dɔn tá re ka kokoe.
8Ká tɔrɔ gigiã gɔn duduu.
A bɛ́ miɛ̃,
tɔrɔ gialakunun tá re
ka dɔn gɔn dudui.
A giala, ka mà kaa tán.
Ka kakaarɛbaa zɛnaa
gánan manɛ,
kiwin ni ka ǹ minin ni.
9Kaa wɔ ǹ ka bɔ̀n nɛ!
Ka mɛnaa minin la,
ka gɔn mànan yɛ,
kaa kion minin wɔ lɛa.
Ka bàan wɔ bɛ́ lɔn,
ka n kaa giãǹ bǎã doe lon,
màn mɛn bɛ́ toɛ koe
ná a doe ka ganaa wa.
10Ka n sìi diɛ
kaa sumu minin ganaa.
Ka tɔrɔ gigiãn mɛnɛn dɛ,
ka n ka dinin nyin boe ka bɛ nɛ.
11Haalɛ ǹ kion a kigiala kɔlɔn
dinin tá re n lɛ dii ǹ ka zɛ̀rɛ baa,
ǹ kion a mɛnɛn nə ǹ lɛ si.
12Kaa wɔ n ka koe ne!
Ka ǹ kaa kiwin doe gɛ̀-dɛ gɔ́ɔ̃ nɛ,
ka nə ǹ koɛ ka mɛnaa kɔn la nɛ.
13Á ke,
minbuiin nɛn dí tumaa n die
n gɔn nyɔmiɛ tɛ-n.
Minbuiin nɛn man
nɔmaa kooro we.
Bɛ tumaa bie boe
Dɛnaa Lawa Pàãyiidɛnaa
din li wa?
14 #
Iza 11.9
Sonbore, min tumaa á re
Dɛnaa Lawa a gugurubaa doɛ̃.
Á re tán piɛ̃
ka yìsi mu gole bɛ́ lɔn.
15Kaa wɔ n ka koe ne!
Mi ǹ màn mɛn bɛ́ baraa
ka sèwò bɛ́ lɔn,
ka ǹ bɛ koe ka miãkɛnɛn la
ka pàã nɛ ǹ mi a ǹ yii kũ,
màn mɛn bɛ́ toɛ ka ǹ tontoro yɛ.
16Sɛnɛ, kaa wɔ ǹ die goɛ̃ ka sìi ni,
gugurubaa ná a bie wa.
A mii dɔ ka dɔn ganaa kanna.
Ka dɔn tontoro á re goɛ̃,
ǹ kaa soromabaa nyaa.
Dɛnaa Lawa n die
a foo-yoo baraa
kɛ kiɛ ka la taãn-taãnɛ.
Kaa gugurubaa kɛ á re n bɔyɛɛ a sìi baa.
17Ka kakaarɛbaa mɛn zɛnaa
Liban ganaa,
bɛ n die kuĩ ka dinin mìi ni.
Ka tɔɔn dɛ,
á ke tɔɔn tá re ka gɔ̀nɔn diɛ
bìn diɛ ganaa nyɛ́ɛ gunun.
Bɛ tumaa ǹ die n zɛnɛɛ
a giala ka mà kaa tán,
Ka kakaarɛbaa zɛnɛɛ gánan manɛ
kiwin ni ka ǹ minin ni.
18Dì zɛnaa a là n ka wàa nɛ?
Gɔn kooro ne ǹ nə́ sɛlɛ.
Fɔlɔ màn nyín zɛnaa nɛ,
a n minin kiɛ golee soɛ li ganaa.
Gɔn dí-nyali na á zɛnaa,
a ba boo diɛ wa.
A n siɛ lɔn kəni gɔn dí-nyali
kɛ tá n foo doɛ a ganaa.
19Kaa wɔ n ka koe ne!
Ka ǹ pii gɔn lɛkoro ne:
«N yii bũ!»
Ka ǹ pii màn nyín ni kɔlɔ lɛa
a ná a boo diɛ wa:
«N nyan nyuù wɔ wa!»
A da yaa ǹ ba boe la
ǹ tá sii kɔn nyɛɛ ka-n wa.
Sonbore,
maǹ nə́ sana laanka wɔrɔ
kaa bɛa màn nyínin lɛn la.
Sɛnɛ, yiikoonaabaa ǹ piɛ̃ goon
din ba ǹ nɛ wa!
20Dɛnaa Lawa sɛ na
a kion sonbore kɛ nɛ.
Tán tumaa nə́ n lɛ tã a nyɛɛnɛ!
اکنون انتخاب شده:
Abak 2: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.