SGK 33
33
Zakɔba a kaakɔnlɛ ka Ezawu ni
1Zakɔba nə́ n yii saa á ga, á Ezawu yɛ die ka giĩ biɛsii-n (400) kun ni. Á nɛnyaanan lɛn gii Leyaa laanka Raseli bii, ka bɛ̀rɛlɔ min paa lɛ nɛ. 2Á bɛ̀rɛlɔ min paa lɛ laanka ǹ nɛnyaanan kaa nyɛɛnɛ, bɛ kio, Leyaa laanka a nɛnyaanan nə́ kɔ bɛn lɛ, á tɔ́n Raseli laanka a nɛ Zozɛfu kaa bɛn kio. 3A dinmaa kiɛ̃ ǹ nyɛɛnɛ, á tɔ wɔ bɛ̀ a kaa tán gunyin sɔbaa, yǎa á woo á dɔ ǹ golo lɛ li. 4Ezawu baa si á woo n da lɛ, á n sɔɔ a nɛ ka parasa. Ǹ dinin paanan nə́ n lɛ da wuu-n kun. 5Bɛ kio, Ezawu nə́ n yii saa, á lɔn lɛn laanka nɛnyaanan lɛn yɛ. Á tɔ́n nɔ̀n da Zakɔba la: «Dien man ka kɛn nɛ kunun n ni?»
Zakɔba ná a lɛ si: «Lawa ma gɔ ka nɛnyaanan mɛnɛn nɛ, bɛn lɛn manɛ.»
6Bɛ̀rɛlɔn lɛn laanka ǹ nɛnyaanan nə́ n zɔ̃, ǹ nə́ n mɔrɔ, ǹ nə́ kaa tán-a a giulun. 7Leyaa dɔ laanka a nɛnyaanan nə́ n zɔ̃, ǹ nə́ n mɔrɔ, ǹ nə́ kaa tán-a a giulun. Bɛ kio, Zozɛfu dɔ laanka Raseli nə́ n zɔ̃, ǹ nə́ n mɔrɔ, ǹ nə́ kaa tán-a a giulun. 8Ezawu nɔ̀n da: «Ma kaa tɔɔn mɛnɛn lɛ, n nə n die wàa zɛnɛɛ ka bɛn tumaa nɛ?»
Zakɔba tɔ́n pɛ: «Man má daa n mɛ bɔ n nɛ, ka bɛn nɛ.»
9Ezawu tɔ́n pɛ: «Diɛ̃giĩ, màn mɛn bɛ́ ma lon, bɛ tá ma boe. Màn mɛn bɛ́ n gɔn, bɛ toa n gɔn.»
10Zakɔba pɛ nɛ: «Haayii, ma nə n nyankoe. Bɛ̀ sii ba n gɔ́ɔ̃-n doo masɛ wɔ paǹ li wa, ma bɛ́ n goe ka màn mɛn nɛ, lɛ kɔ n si. A giala, ma yii bɛ́ á mɛ n ganaa lɔn, a n ka min bɛ́ Lawa yii lɔn. N bɛ́ ń lɛ kɔ masɛ ganaa, 11ma da bǐɛ̃baa ǹ màn mɛn kɔ n la, lɛ kɔ n bɛ dɔ si. A giala, Lawa na á ma gɔ. Ma laadoo bɛ́ màn mɛn tumaa ganaa, a tumaa tá ma lon.»
Zakɔba nə́ n laa Ezawu ganaa, yǎa á lɛ kɔ á mànan lɛn si. 12Ezawu tɔ́n pɛ. «Yoo wɔ n ta. Ma á re tɔ we kunun n ni.»
13Zakɔba ná a lɛ si kɛnɛn: «Gologiĩ, ń doɛ̃, nɛnyaanan lɛn pàã á kiɛɛrɛ. Ka bɛ dɔ nɛ, sère daanan laanka dii daanan tá ma lon, nɛnyaan bɔnboɛɛnɛn manə ǹ kio. Bɛ̀ wɔ tɔ wɔ ǹ nɛ, á re kiɛ̃ ǹ tɔ-wɔ lɛ dan la, ta pinin goon tɔ din ni, ǹ tumaa n giɛ̃. 14Bǐɛ̃ kɔ, n wo wɔ nyɛɛnɛ. Ma din tá re tɔ we tɔɔn lɛn kio boɛboɛ, kun ka nɛnyaanan lɛn nɛ, yǎa ma doe n li Seyiri gána nɛ.»
15Ezawu tɔ́n pɛ: «Minin mɛnɛn bɛ́ ǹ nə́ daa ma da zii, ma á die bɛn kɔnɔn toɛ kunun n ni.»
Zakɔba ná a lɛ si: «Ma bɛn baa lɔn? Yǎa n bǐɛ̃ kɔ, n masɛ kũ doɛ̃!»
16A din pinaa, Ezawu nə́ n bɔyaa, á woo Seyiri gána nɛ, 17Zakɔba sɛ́ woo Sukɔti kiwi. Á kion dɔ walan a din wɔ lɛa, á zìã pɛnɛ a tɔɔn dɔn wɔ lɛa. Bɛ lɛ na á toa, ǹ tá bɛa bǎã lɛ bíi Sukɔti bɛ giala mà "Zìãn".
Zakɔba n giɛ̃ Sisɛmu
18Zakɔba bɛ́ á soo Mezopotamii gána nɛ, á daa á dɔ Sisɛmu kiwi, Kanaan gána-n ka bǐɛ̃ nɛ. Á giã á n wɔlɔ kunu kɔ kiwi lɛ ganaa. 19#Zoz 24.32; Zaã 4.5 A bɛ́ a ná a zìã dɔ bǎã mɛn nɛ, a na á bɛa bǎã lɛ pii Sisɛmu ǹ di Amɔɔrɔ tɔrɔn lon, wɔrɔ we paabiɛ. 20Á *wúlu bɔ ǹ bǎã dɔ walan, á bíi mà "Lawa n Izirayeli a Lawa lɛa".
اکنون انتخاب شده:
SGK 33: SBPE2011
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.