प्रेरितों के कम 9

शाऊल दा एर्दें बदली ओना

1शाऊल जेड़ा प्रभु दे चेलें गी तमकाने ते मारी ओड़ने दी सोच च हा, यरूशलेम च महायाजक दे कोल गीया 2ते ओस थमां दमिश्क शैर दे प्रार्थनाकार दे नां उपर एस मकसद दियां चिट्ठीयां मंगियां, के पावें विश्वासी मरद, पावें जनानी, जिनेंगी ओ एस रस्ते उपर दिखै ते बन्नीयै उनेंगी यरूशलेम गी लेई अवै। 3लेकन चलदे-चलदे जेसलै शाऊल दमिश्क दे कोल पूजया, तां एक दम्म अम्बर थमां ओदे चौनी पासे लो चमकी, 4ते ओ जमीन उपर टेई गीया, ते परमेसर दी ए बाज सुनी, “ए शाऊल, ए शाऊल, तू मिकी कि सता नां ऐं?” 5ओसने पूछया, “ए प्रभु तू कुन्न ऐ?” ओसने आखया, “आंऊँ यीशु ऐं, जिसी तू सता करना ऐं। 6लेकन ऊन उठीयै शैर च जा, ते जे केछ तुगी करना ऐ ओ आखया जाग।” 7जेड़े मनुक्ख ओदे कन्ने हे, ओ चोप्प ओई गै; किके बाज तां सुनदे हे, लेकन कुसे गी दिखदे नेई हे। 8ओस बेलै शाऊल पुञें दा उठया, लेकन जेसलै अखीयाँ खोलीयां तां उसी केछ बी नेई लबया, ते ओ ओसदा अथ्थ पकड़ीयै दमिश्क दे शैर च लेई गै। 9ते ओ त्रै देन तकर नेई दिखी सकया, ते नां खादा ते नां पीता।

शाऊल दा पवित्रशनांन

10दमिश्क शैर च हनन्याह नां दा एक चेला हा, ओस कन्ने प्रभु ने दर्शन च आखया, “ए हनन्याह!” ओसने आखया, “आं, प्रभु।” 11ओस बेलै प्रभु ने उसी आखया, “उठीयै सीधी नां दी गली च जा, ते यहूदा दे कर च शाऊल नां दा एक तरसुस वासी गी पूछी लै; किके ओ प्रार्थना करा दा ऐ, 12ते ओसने हनन्याह नां दे एक मनुक्ख गी कर दे अन्दर औंदे ते अपने उपर अथ्थ रखदे दिखया ऐ; तां पी दिखी सकै।” 13हनन्याह ने जबाब दिता, “ए प्रभु, मैं एस मनुक्ख दे बारै च मतें थमां सुने दा ऐ के ओसने यरूशलेम च तेरे पवित्र लोकें कन्ने बड़ी-बड्डीयां बराईयां कित्तियां न; 14ते इत्थैं बी इसी प्रधान याजकें थमां अख्त्यार मिले दा ऐ, के जेड़े लोग तेरे नां उपर बश्वास करदे न, उनै सबनीं गी बन्नी लै ते यरूशलेम च लेई अवै।” 15लेकन प्रभु ने ओस कन्ने आखया, “तू चली जा; किके ओ तां दुई जाती ते राजा ते इस्राएलियें दे सामने मेरा नां परचार करने आसतै चुने दा पांढा ऐ। 16ते आंऊँ उसी सनागा, के मेरे नां आसतै उसी कियां-कियां दोख पोगना ओग।” 17ओस बेलै हनन्याह उठीयै ओस कर गीया, जिथें शाऊल रौंदा हा, ते ओस उपर अपना अथ्थ रखियै आखया, “ए प्रा शाऊल, प्रभु, मतलब यीशु जेड़ा ओस रस्ते च, जेस च तू आया तुगी लबया हा, उसै मिकी पेजया ऐ, के तू पी दिखी सकै ते पवित्र आत्मा कन्ने परपुरी ओई जा।” 18ते फोरन ओसदी अखीयाँ चा छिलके जिए किरे, ते ओ दिखना लगया, ते उठीयै पवित्रशनांन लेता; 19पी पोजन खाईयै बल पाया। ओ कई देन उनै चेलें कन्ने रिया जेड़े दमिश्क शैर च हे।

शाऊल थमां यीशु मसीह दा प्रचार

20ते ओ फोरन दमिश्क शैर दे प्रार्थनाकार च यीशु दा प्रचार करन लगया के यीशु गै परमेसर दा पुत्तर ऐ। 21ते सारे सुनने आले रांन ओईयै आखन लगे, “के ए उवै मनुक्ख नेईयैं जेड़ा यरूशलेम च उनेंगी जेड़े यीशु दे नां उपर बश्वास करदे हे, नाश करदा हा; ते ए इत्थैं बी एस आसतै गै आया हा, के उनेंगी बन्नीयै प्रधान याजकें दे कोल लेई जा?” 22लेकन शाऊल ओर बी समर्थवान ओंदा गीया, ते एस गल्ल दा सबूत देई-देईयै के यीशु गै मसीह ऐ, दमिश्क शैर दे रौने आले यहूदीयें दा मुंह बंद करदा रिया।

23जेसलै मते देन बीती गै, तां यहूदीयें मिलीयै उसी मारी देने दी सलाह बनाई। 24लेकन उंदी सलाह दा शाऊल गी पता चली गीया ओ तां उसी मारने आसतै रात देन रस्तें च मारी ओड़ने लेई लगे दे हे। 25लेकन रातो-रात ओदे चेलें उसी टोकरे च बठाया, ते दवार उपरा-उपरा लटकाईयै दुई जगा तुआरी दिता।

यरूशलेम च शाऊल

26यरूशलेम च पूजियै शाऊल ने चेलें कन्ने मिलने दा कोष्ट कित्ती; लेकन सारे शाऊल थमां डरदे हे, किके उनेंगी बश्वास नेई ओंदा हा, के ओ बी चेला ऐ। 27लेकन बरनबास ने उसी अपने कन्ने प्रेरितें दे कोल लेईयै सनाया के एस ने किस रीति कन्ने दमिश्क शैर जंदे रस्ते च प्रभु गी दिखया, ते प्रभु ने एस कन्ने गल्लां कित्तियां; पी दमिश्क च एस ने कियां इम्त कन्ने यीशु दे नां कन्ने प्रचार कित्ता। 28ओ उंदे कन्ने सारे यरूशलेम च ओंदा-जंदा रिया 29ते बे डरा ओईयै प्रभु दे नां कन्ने प्रचार करदा हा; ते यूनानी पाषा बोलने आलें यहूदीयें कन्ने गल्ल बात ते बैस-मूयासा करदा हा; लेकन ओ उसी मारने दी कोष्ट करने लगे। 30ए जानियें उसी प्रा कैसरिया शैर लेई आए, ते तरसुस शैर अपने कर गी पेजी देता।

31एस चाली सारे यहूदीया शैर, ते गलील जिले, ते सामरिया दे शैर च कलीसिया गी चैन मिलया, ते ओसदी तरकी ओंदी गेई; ते ओ प्रभु दे डर ते पवित्र आत्मा दी शान्ति च चलदी ते बददी गेई।

ऐनियास दी चंगाई

32पी ऐसा ओया के पतरस अर जगह फिरदे ओई, उनै पवित्र लोकें दे कोल पूजया जेड़े लुद्दा शैर च रोंदे हे। 33उत्थें उसी ऐनियास नां दे लकवे दा रोगी एक मनुक्ख मिलया, जेड़ा अट्ठ साल थमां खट्टे उपर पेदा हा। 34पतरस ने उसी आखया, “ए ऐनियास! यीशु मसीह तुगी चंगा करदा ऐ। उठ, अपना खट्ट चोक्क।” ओस बेलै ओ फोरन उठी खड़ोई गीया। 35ओस बेलै लुद्दा ते शारोन दे सारे रौने आले उसी दिखियै सारे प्रभु यीशु उपर विश्वास कित्ता।

दोरकास गी जेंद दान

36याफा शैर च तबीता मतलब दोरकास नां दी एक विश्वासं रौंदी ही। ओ मते सारे पले-पले कम ते गरीबें गी दान करदी ही। 37उनै दिनें च ओ बमार ओईयै मरी गेई; ते उनै ओसदी लाश नुहालीयै उपरली जगा उपर रखी दिती। 38ते एस लेई के लुद्दा याफा दे कोल हा, चेलें ए सुनीया के पतरस उत्थें ऐ, दो मनुक्ख पेजीयै ओस कन्ने अर्ज कित्ती, “साड़े कोल औने दा चेर नेई ला।” 39ओस बेलै पतरस उठीयै, उंदे कन्ने चली पिया, ते जेसलै ओ पूजया, तां ओ उसी ओस जगा उपर लेई गै जिथें तबीता दी लाश रखी दी ही। सारीयां विधवां रोईयै, ओदे कोल आई खड़ोती हियां, ते जेड़े कुरते ते कपड़े दोरकास ने उंदे कन्ने रोंदे ओई बनाए दे हे, दसना लगियाँ। 40ओस बेलै पतरस ने सारें गी बार करी दिता, ते कुटने टेकियै प्रार्थना कित्ती ते लाश दी बखी दिखियै आखया, “ए तबीता, ओठ।” ओस बेलै ओसने अपनीयां अखीयाँ खोलीयां; ते पतरस गी दिखियै उठी बैठी। 41ओसने अपना अथ्थ देईयै उसी ठुआलया, ते पवित्र लोकें ते बिधवाएं गी बलाईयै उसी उनेंगी जिंदा दसी दिता। 42ए गल्ल सारे याफा शैर च फैली गेई; ते मते सारें प्रभु यीशु उपर बश्वास कित्ता। 43ते पतरस याफा च शमौन नां दे कुसे चमड़े दा कारोबार करने आले दे इत्थैं मते देन रिया।

اکنون انتخاب شده:

प्रेरितों के कम 9: DOG

های‌لایت

کپی

مقایسه

به اشتراک گذاشتن