होशे 7

1आऊँ इस्राएलो साथे आपणा रिश्ता ठीक करना चाऊँआ। पर जेबे आऊँ एड़ा करने री कोशिश करूँआ, तो एप्रैमो रे पाप सबी रे सामणे आई जाओए। सामरिया रे पाप सबी खे लगी जाओए। लोक चूठ बोलोए। सेयो कअरा दे कूसी की चोरी करोए। सेयो बाटा रिये लोका खे लूटोए। 2तेबे बी सेयो नि सोचदे कि परमेशर म्हारी सारी बुराई याद राखोआ। इजी री खातर एबे सेयो आपणे कामो रे जाल़ो दे फसणे, कऊँकि तिना रे काम मेरी नजरा दे बणे दे ए। 3सेयो राजे खे बुराई करने ते ओर परदाना खे चूठ बोली की खुश करोए।

4सेयो सारे के सारे व्याभिचारी ए, सेयो तेस तन्दूरो जेड़े ए जेतेखे पकाणे वाल़ा गर्म करोआ, पर जदुओ तक आटा बाटेया नि जांदा ओर सजेड़े साथे फूली नि जांदा, तदुओ तक से आगी खे नि धधकांदा। 5म्हारे राजे रे खास दिनो दे परदान शराब पी की मस्त ऊए, तिने मजाक करने वाल़ेया साथे आपणा आथ मलाया। 6जदुओ तक सेयो ताका दे रओए, तदुओ तक सेयो आपणा मन तन्दूरो जेड़ा त्यार करी की राखोए, तिना रा पकाणे वाल़ा पूरी रात सऊँदा रओआ, से प्यागा खे तन्दूरो री धधकदी आगी जेड़ा लाल ऊई जाओआ। 7सेयो सारे के सारे लोक तन्दूरो जेड़े धधकोए ओर आपणे न्यायिया खे स्वा करी देओए। तिना रे सारे राजे रूड़ी गे दे ओर तिना बीचा ते कोई बी माखे याद नि करदा।

इस्राएल ओर दूजी जातिया

8एप्रैम दूजी जातिया रे लोका साथे मिलेया-जुलेया दा रओआ, एप्रैम एक रोटिया जेड़ा ए जो सिर्फ एकी तरफा ते पक्की री ए। 9पराये देशो रे राजेया साथे मिली की इस्राएल एक कमजोर देश बणीगा दा ए, पर इस्राएलिया खे एतेरा एहसास नि ए। इस्राएल एक चीटे बाल़ा वाल़े स्याणे जेड़ा बणीगा दा ए, जेसरी तागत कम ऊई गी दी ए। पर इस्राएलो रे लोका खे एतेरा एहसास नि ए। 10इस्राएलो रे लोका रा कमण्ड तेसरे ई खलाफ गवाई देयोआ, इना सबी गल्ला रे रंदे ऊए बी सेयो आपणे परमेशर यहोवे रिया तरफा खे नि फिरे ओर ना से टोल़ेया। 11एप्रैम एक कबूतरिया जेड़ा ऊईगा रा, जेसरे कोई दमाक नि ए, से मिस्र देशो खे मतादा रिया तँईं बुलाओ तो अया, पर जाओआ अश्शूर देशो गे। 12जेबे सेयो आऊणे तेबे मां तिना पाँदे आपणा जाल़ सेटणा। सर्गो रे पंछिया जेड़े मां सेयो फसाई की थाले ल्याऊणे। मां तिना रे बुरे कामा रिया बजा ते तिना खे सजा देणी।

13तिना पाँदे हाय, कऊँकि सेयो मांगा गे ते पटकी गे! तिना रा सत्यानाश ओ, कऊँकि तिने मां साथे बगावत कित्ती! आऊँ तो तिना खे छुड़ांदा रया, पर सेयो मां साथे चूठ बोलदे आई रे। 14सेयो सच्चे मनो ते मेरी दुहाई नि देंदे, पर आपणे बछौणे पाँदे लेटे दे रोंदे रओए। सेयो कट्ठे ऊई की मांते नज्ज ओर नवें शराबो खे मांगदे रओए, पर सेयो मांते मूँ मोड़ी लओए। 15आऊँ तिना खे शिक्षा देंदा रया ओर तिना खे मजबूत करदा आई रा, तेबे बी सेयो मेरे खलाफ बुरी योजना बणाओए। 16सेयो मतादा रिया तँईं मेरिया तरफा खे नि देखदे। सेयो तोखा देणे वाल़े धनुषो जेड़े बेकार ए जो सई टंगो दे तीर नि चलाई सकदे। तिना रे परदान आपणियां तागती पाँदे कमण्ड करोए, पर सेयो लड़ाईया दे तलवारी की मरी जाणे। तेबे मिस्रो रे लोक तिना पाँदे आसणे।

اکنون انتخاب شده:

होशे 7: BGH

های‌لایت

کپی

مقایسه

به اشتراک گذاشتن