Roma 9
9
Allah en aphwami Israel a’ge poligenebesi wene
1-3An narilak norokhwi nena’gul onuk mesigat a’ge wiak oruak ai en, nede wiagat welat, nede obotut welat, taga legi o. Nede en e,
“Allah en, an Kristus emin hwedik welege a’ge ai ’goboksogo uknoboluk, is enebalema heman nebelep e, epasu legi ai pam, is wogenebelip e,” oluk Kristus emin hwedik welat egi ai re, demat egi. Niak esei egi puk o. Allah Arogun nogola welat,
“Wene ai re, demat o,” oluk mo’gulneselat, nu’gwarek nogola en ogo re,
“Demat egi o,” oluk epasulat, eselegi o. 4#Kel. 4:22Is aphwami Israel a’ge enebe demat Israel a’ge Allah en poligenebesi a’ge ai en e, at eiyagai emagoluk wogenebiselat, at Ebe erliktogwi a’ge ai isat mo’gulentasulat, wene wusogo isat wogenebiselat, wene nenesa’go weregei a’ge ano isat wogentasulat,
“An disogo erliknobogu lomup o,” oluk isat mo’gulentasulat,
“Pobuk disogo takhonobouwa o,” oluk obok isat mo’gulentasulat, tegei ai o. 5Nis nene’balak en de, is ai dagenebigisa a’ge. At Kristus ebe nis aphwami dagagai ’gela’ge dagaga ai, is a’ge en derigisa a’ge re, ebe Allah a’geat o. Di a’ge yu a’ge ’berlek e, sebelak ’gela’ge a’geat de, at nak e, abel likho ’gela’geat logo ai en e, at nak erliktogu lomul ai, demat emak o, oluk u ’gela’ge,
“Amin,” ogu lomok.
6Allah en e, is obok mo’gulentesi ai,
“Ebe sogwi aga,” oluk egi puk. Is Israel en dogo’gwe a’ge ai ’berlegat e, enebe Israel Allah en poligenebesi a’ge puk. 7#Kej. 21:12At Allah en Abraham wene disogo mo’gulesi,
“Hat en dogo’gwe a’ge wiyalema o, oluk mo’gulhegis ano ebe re, homlogo Ishak yu en dogo’gwe a’ge en wiyalema a’ge nak paget mo’gulhegis o,”
oluk mo’gulesi ai en e, Abraham en dogo’gwe a’ge ’berlegat e, Allah eiyagai oluk u puk. Erlak o. 8Asogo egei ai ebe disogo oluk egei. Enebe en dogo’gwe a’ge ai re, Allah eiyagai oluk u puk. We, Allah en obok mo’gulentesi a’ge holugat, at eiyagai oluk u o. 9#Kej. 18:10At Allah en Abraham obok mo’gulesi ano obok mo’guleselat e, disogo mo’gulesi,
“An pobuk he’bek wom hegitsogoat weik o. Wagoam e, hwe Sara emalik ap dorua o,”
oluk mo’gulesi.
10A’ge re, wene ai nak puk. At hwe Ribka emalik e, enaik Ishak nene’ba mesigat ai en ap enebe ’biren dagenebegei. 11#Kej. 25:23Is ap enebe ’biren ai, enebe dagom erlak welat enebabut op togulat, wiak togulat, tu erlak oruakhwe, at Allah ede opoluk poligenebesi ai demat otluk welemagoluk, 12enia Ribka wene disogo mo’gulesi,
“Hat hemalik dagonobogun a’ge eba de, naduk-naduk dagema a’ge ai,
ebe pobuk dagema a’ge eragam welema o,”
oluk asogo obok mo’gulesi. Asogo mo’gulesi ai re, is en di a’ge yu a’ge mesik tigisa pam poligenebesi puk. We, at Allah ogola opoluk poligenebesi ai o. 13#Mal. 1:2-3Wene ai ’gela’ge mesik disogo egeiyat,
“At Yakub ai nede o.
A’geat de, at Esau ai nebit o,”
oluk egeimu re, pelal wokho pegesa.
14Holuk e, nis en e, no’gosogo ul. At Allah ebabut dagansogo tegei u no? Modok erlak o. Allah ebabut e, hegit. 15#Kel. 33:19At en e, Musa disogo mo’gulesi,
“An enat e, nede a’ge holuk nedeabenebasulat,
nede hwedik a’ge holuk nede hwedigabenebasulat, tik o,”
oluk mo’gulesi. 16Allah en asogo oso ai re, aphwami onogola en op opoluk, is en logon ningsogo tolukmu en, edeabenebasu erlak. We, at Allah ebabut op enat edeabonoboluk enebe wogenebiso ai o. 17#Kel. 9:16At Allah en ’gain Firaun disogo mo’gulesi,
“An en yu pagerat edikhebegi o.
Aphwami en an nanni enaluk agalat,
nonuk o di owi yu owi mo’gulentil lagalat, tuagoluk edikhebegi o,”
oluk mo’gulesimu Allah iak pelal wogo ano pam pelal wokho pegesa. 18At Allah en e,
“At yu nede o,” oluk ede epasu a’ge holugat, edeap pasulat, ye,
“At ai a’gul erigap paik,” oluk ede epasu a’ge holugat a’gul erigap pasulat, tiso ai o.
Allah olot het aphwami enebam pasulat, edeabenebasulat, tiso wene
19Asogo tiso ai en, hat mesik en an disogo mo’gulnum epasu legi,
“At Allah ede opoluk tiso a’ge ai, ap sa en,
Nebit, oluk erlagap po no. Asogo erlagap po mia a’geat de, nopaget wene nenebam pasu,” oluk u epasu legi o. 20#Yes. 29:16; 45:9Eige! Nare yu. At Allah iak osoam, hat hiak uak lagalu no? Mia o. Aphwami en ik e’be domul a’ge hele’gogwiam e, ’gwiang domul ai en e, at hele’giso a’ge ai mo’guleselat e,
“Hat en an disogo nopaget taknebegen,” oluk mo’gulom no? Mia o. 21’Gwiang domul ai mesigat a’geat de, at hele’giso a’ge ai eiye atma re, mesik opsogo hele’gogo pasulat, mesik wiak-wiak heli’gogo pasulat, tu mia no? Tuat o.
22Ai ’gela’ge, at Allah ede epasulat e,
“Aphwami an en walentegis a’geat de, is pema en nolot herap pogwi ai en, wiagabenebaigoluk, nolot het aga a’ge ai, is en nebabut ’balogulat, nanni oruak a’ge ano enaluk agalat, tuak o,” oluk epe mosogo welago yo. 23Is ai enebaget asogo epe mosogo welat, nis nenebaget disogo epasu,
“Is logon nede a’ge obabenebigoluk naduk walentegis ai, op modok tagenebaik a’ge enaluk emak o,” oluk epasu. 24Asogo epasu a’ge ai, nis aphwami Yahudi a’ge nak poliknenebesirik yo’go nenebesi puk. Is o’borl o’gwe a’ge eneminat poliknenebesirik yo’go enebesiat o. 25#Hos. 2:23Asogo oluk at Allah en e, wene mesik disogo egei,
“Aphwami we a’ge an neiyagai erlak welegesa a’ge re, an neiyagaiat o, oluk eselat,
enebe nedeabonobo erlak a’ge, nedeat o, oluk eselat, tik o.
26 #
Hos. 1:10
An en e, aphwami o momu a’ge paget e,
His e, an neiyagai puk o, oluk egi a’geat de, pobuk is o eba a’ge enebagerat,
O yema an nelaluk welago a’ge neiyagai o, oluk ik o,”
oluk egeimu re, at Hosea en pelal wokho pesi.
27-28 #
Yes. 10:22-23
Ye, wene mesik at Allah en e, disogo egei,
“Aphwami ’gwiangma a’ge yema wene enebam modok perleneat enebam paik ai en e,
aphwami Israel en dogo’gwe a’ge enebe ik al mame’gik ik laut lok ye’gelak a’ge eragam o’gwe welago ai ’gela’ge oruak o.
A’geat de, we, enebe wei nak delenebik o,”
oluk egeimu Yesaya en pelal wokho pesi. 29#Yes. 1:9Asogo oluk Yesaya enat wene mesik pageat disogo egei,
“Nenaik ’gain Onuk Logo a’ge anni a’bik ano en e,
nis en dogo’gwe a’ge mesik ukpo erlakma en modogat warenebisellepma re,
Sodom ’gela’ge agalat,
Gomora hegit agalat, tolu o,”
oluk Yesaya en pelal wokho pesiat.
Aphwami Israel a’ge en enede Yesus ebam he’berik po erlakma en togu legesa wene
30Ai holuk e, nis en no’gosogo ul? Disogo u o. Is aphwami o’borl o’gwe a’ge en wene enebam a’ge Allah en no’gorlogo wokholuk, togolik emin hwedik tagonobouwagoluk tu a’ge logon ningsogo tu erlak. A’geat de, enede Yesus ebam he’berik pegesema re, Allah en wene enebam a’ge no’gorlogo wokholuk, pobuk togolik emin hwedik tagenebesi. 31Asogo a’geat de, is aphwami Israel a’ge en, Allah en wene enebam a’ge no’gorlogo wokholuk, pobuk togolik at emin hwedik tagonobo wene ano hologo wolomogoluk walhegesa a’geat de, mia aga. 32Nopaget en asogo mia aga. Ai re, enede Yesus ebam he’berik po erlak, we, onu’gwarek enede opoluk togu legesa ai enat o. Aphwami ebela pam lagalat helep pam onoyuk a’gul dungsogo wathorlogwi ’gela’ge, nal egesa ai o. 33#Yes. 28:16Wene ai paget Allah en e, disogo egei,
“An o Sion eba helep ’gela’ge mesik pegi yu hemit!
Helep ai pam aphwami onoyuk a’gul dungsogo wathorloluk, ’bulak horlogu lema o.
A’geat de, henebe lo’bok henede at ebam he’berik pagup a’ge hene’gerli hagup modok erlak o,”
oluk egeimu pelal wokho pegesa.
اکنون انتخاب شده:
Roma 9: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید