Roma 4
4
At Abraham ede Allah ebam he’berik pesimu, wene ebam a’ge no’gorlogo wokhesirik e’birek hwedik takpesi wene
1Holuk e, nis aphwami Yahudi a’ge en nene’ba Abraham ebabut taga laga a’ge paget obok no’gosogo ul. 2At u’gwarek en mesik op tegei pam, Allah en,
“Wene hebam a’ge no’gorlogo wokhegirik, togolik an nemin hwedik takhebegi o,” oluk mo’guletlipmu re, u’gwarek en erlikhwerlelep o. A’ge re, at Allah ilem erlikhorlo mia welaga ai. 3#Kej. 15:6; Gal. 3:6Allah iak pelal wokho pegesa ai pam no’gosogo egesa no. Disogo egesa erlak no? Abraham ede Allah ebam he’berik pesimu re, at Allah en e,
“Hat hebabut hegitsogo tagalom ’gela’ge, hede nebam he’berik pegenma,
wene hebam a’ge no’gorlogo wokhegirik,
togolik nemin hwedik takhebegi aiat o,”
oluk mo’gulesimu, pelal wokho pegesa. 4Aphwami en di yabuk yu yabuk togwiam, ene’gik o’go wogontogwi ai re, ap yo’go pogwi a’ge enebabut op en weat wogontogwi puk. We, ene’gik o’go wogonto ’gela’geat wogontogwi ai o. 5Asogo a’geat de, aphwami logon en Allah ede opsogo di a’ge yu a’ge togwi erlak welarat de, onogola en e,
“Is aphwami logon en Allah ebe onogola en mi-miarak pogu legesa a’geat de, at en e, is wene enebam a’ge elirat no’gorlogo erlagap poluk pobuk togolik at emin hwedik tagenebasu o,” oluk enede at ebam he’berik pogwiam e, at en e,
“Henebabut hegitsogo togulom ’gela’ge re, henede an nebam he’berik pegepma wene henebam a’ge no’gorlogo wokhegirik, togolik nemin hwedik takhenebegi aiat o,” oluk mo’gulentasuat. 6At Allah en asogo tagenebasu oluk, at Daud en disogo egei,
“Aphwami en e, Allah ogola opsogo logon tu erlakmayat de, wene enebam a’ge no’gorlogo wokholuk, emin togolik hwedik tagenebasu, oluk, onogola enagai houwak o,” oluk egeitik pelal disogo wokho pesi,
7 #
Mzm. 32:1-2
“Is aphwami enesa’go werak erlak welat dagan togwi a’ge,
Allah en erlagapsogo ukpasulat,
wiak togwi a’ge, sebelogo ukpasulat,
tegei a’ge onogola enagai houwak o.
8Ye, is aphwami logon wiak togwi a’ge paget,
nenaik ’gain Allah Onuk Logo a’ge en wene e’gen poluk wene enebam pasu erlak a’ge
onogola enagai houwak o,”
oluk egeimu pelal wokho pegesema oruak.
9“Onogola enagai houwak o,” oluk egei ai re, is aphwami enagap ene’gerlimu a’ge ’belak a’ge enebaget nak egei ya? At e, is enagap ene’gerlimu a’ge ’belak erlak a’ge paget eminat egei ya. Naduk wene disogo ege epegi,
Abraham ede Allah ebam he’berik pesimu re, at en e,
“Hat hebabut hegitsogo tagalom ’gela’ge, hede nebam he’berik pegenma re,
wene hebam a’ge no’gorlogo wokhegirik,
togolik nemin hwedik takhebegi aiat o,”
oluk mo’gulesi. 10Asogo mo’gulesi ai re, at Abraham ebe no’gosogo oruakma. Agap e’gerlimu a’ge ’belakma ya? At e, ’belak erlakma ya. Ai re, agap e’gerlimu a’ge ’belakma puk. Owan ’belak erlakmayat o. 11#Kej. 17:10Agap e’gerlimu a’ge asogo owan ’belak erlak welat ede Allah ebam he’berik pesimu re, at Allah en e,
“Wene hebam a’ge no’gorlogo wokhegirik,
togolik nemin hwedik takhebegi o,”
oluk mo’gulesi. Asogo tegeimu mo’gulesi ai, enede we’gerlogo welemagoluk,
“Hagap he’gerlimu a’ge ’balin o,” oluk mo’gulesimu ’balegeimu re, ebabut enagat aga ai. Ai en e, aphwami enagap ene’gerlimu a’ge asogo ’belak erlak welat, enede Allah pam he’berik pogwi a’ge ’berlegat, enaik e, Abraham at o. Is asogo enede Allah pam he’berik pogwiam e, at en e,
“Henebabut hegitsogo togulom ’gela’ge henede nebam he’berik pegepma re, wene henebam a’ge no’gorlogo wokhegirik togolik nemin hwedik takhenebegi ai arat o,” oluk mo’gulentasuat ai o. 12Nene’ba Abraham ai agap e’gerlimu a’ge ano ’belak erlak welat, ede Allah pam he’berik pesi ’gela’ge, nis nenagap nene’gerlimu a’ge asogo nak ’belak holuk, nene’ba Abraham u mia o. At e, Abraham ebabut wokho nenede asogo Allah pam he’berik pege a’ge holuk en de, nene’ba Abraham at u o.
Aphwami enede Allah ebam he’berik pogwiam,
at en obok mo’gulentesi a’ge ebe wogwi wene
13 #
Kej. 17:4-6; 22:17-18; Gal. 3:29 At Allah en e, Abraham disogo mo’gulesi,
“’Gwiangma o di owi yu owi ’berlegat e, hat emin, hat en dogo’gwe a’ge emin, henemin eiye orogup ani o,” oluk obok mo’gulentesi. Asogo mo’gulentesi ai re, wene at en nenesa’go weregei wene ano hwelak poluk hegitsogo togu legesa pam mo’gulentesi puk. Erlak o. We, at ede Allah ebam he’berik pesimu, at Allah en eselat e,
“Wene hebam a’ge no’gorlogo wokhegirik, togolik nemin hwedik takhebegi o,” oluk mo’gulesi ai en o ’gwiang obok mo’gulentesi ai o. 14#Gal. 3:18Aphwami wene Allah en nenesa’go weregei wene ai enesa’go hwelak poluk hegitsogo togwi a’ge nak Allah en obok egei a’ge ai eiye agallepma re, nenede Allah pam we ’burlat he’berik pogullo yo. Ye, obok mo’gulentesi a’ge ai ogo erlak elebat o. 15Wene Allah en nenesa’go weregei wene ai pam e, Allah olot het nenebam pasu. Wene nenesa’go weregei ai werak erlak wellepma re, wene sagalogo wiak togwi ai o, oluk elip erlagat o. 16#Gal. 3:7Holuk e, Allah ebabut op en weat woknentasu, oluk uagoluk e, nenede at ebam he’berik pogwiam obok egei a’ge ai, woknentasu ai o. Nis at en dogo’gwe a’ge wene Allah en nenesa’go weregei a’ge ai hwelak poluk hegitsogo togulat, nenede Allah pam he’berik pogu lege a’ge nak woknentasu puk. We, Abraham is muon logon enemin ’berlegat nenaigatma re, is ai at Abraham ede Allah pam he’berik pesi ai ’gela’ge, enede Allah pam he’berik pogwi a’ge ogo wogentasuat o. 17#Kej. 17:5Wene ai paget Allah en Abraham disogo mo’gulesi,
“Di aphwami yu aphwami ena’gul onuk a’bigat enaik e, hat edikhebegi o,”
oluk mo’gulesimu pelal wokho pegesa. Asogo mo’gulesimu re, at Abraham ogola en e,
“At Allah re, aphwami werak a’ge enelalugabenebiselat, ye, di a’ge yu a’ge erlak a’ge iak pam oruagaptagalat, tiso a’ge en obok mo’gulnesi ai demat mo’gulnesi o,” oluk ede ebam he’berik pesi ai o. 18#Kej. 15:5At Abraham en e,
“An en dogo’gwe a’ge asogoat ema o,” oluk ede opo pukmu en de,
“Demat ema o,” oluk ede Allah pam he’berik poluk modok taga laga ai pam, Allah en e,
“Hat en dogo’gwe a’ge modok a’bik disogo ema o,”
oluk obok mo’gulesi hegitsogoat, di aphwami yu aphwami ena’gul onuk a’bigat enaik Abraham at aga o. 19#Kej. 17:17Ap Abraham u’gwarek en e,
“An nebe 100 tahun ’gela’ge welegirikmu re, nanni erlak agarik, neiyagai dagonobu modok mia egi o. Ye, nugwe Sara ebe ogo re, abeliat o,” oluk aluk welaga a’geat de, ede Allah pam he’berik pesi a’ge ano, ede ’buk om erlak he’berik modogat welaga. 20Abraham ede Allah pam asogo he’berik modogat welat,
“Allah en obok mo’gulnesi a’ge ano, demat ema ya? Sogwi ema ya,” oluk wenemennei eberu erlakma en welaga. Asogo ede Allah pam he’berik poluk welaga ai pam anniap pesimu Allah erliktaga laga. 21Asogo erliktagalat e,
“Allah re, di a’ge yu a’ge tu elit nakma no oluk e, obok mo’gulnesi ai, demat ema o,” oluk wenemennei daksogoat welaga. 22Asogo taga laga ai pam, Allah en e,
“Hebabut hegitsogo wolom ’gela’ge, hede nebam he’berik pegenma,
wene hebam a’ge no’gorlogo wokhegirik togolik nemin hwedik takhebegi ai o,”
oluk mo’gulesi. 23At Allah en e,
“Wene hebam a’ge no’gorlogo wokhegirik togolik nemin hwedik takhebegi o,” oluk mo’gulesimu re, pelal wokho pegesema oruak ai re, at Abraham paget nak puk. 24Nis nenemin nenebagerat mo’gulnentesi o. Holuk, nis ogo re, nenede nenaik Allah nonue ’gain Onuk Logo a’ge Yesus waragama en elalugaptegei a’ge ano ebam he’berik pogu lege ai en, at en e,
“Henebabut hegitsogo togulom ’gela’ge, henede nebam he’berik pegepma, wene henebam a’ge no’gorlogo wokhegirik togolik henemin hwedik takhenebegi aiat o,” oluk mo’gulnentasuat o. 25#Yes. 53:4-5At Allah en e, nis at iak sagalogo ukpoluk wiak togu lege ai en e, Yesus ebe aphwami en woruagoluk ’belakpou wagoam ebe werigisema re, pobuk,
“Wene his henebam a’ge no’gorlogo wokhegi o,” oluk, at emin togolik hwedik taknenebaigoluk elalugap pesi ai o.
اکنون انتخاب شده:
Roma 4: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید