Ibrani 9
9
Aphwami ’gwiangma en onuam wusogo emep Allah wogogu legesa ai ’gela’ge, Yesus ebe
emep Allah wogosi wene
1Naduk e, Allah en wene wusogo eiyagai wogenebegei wene ai hegitsogo, is en at ede opsogo togu lemagoluk mo’gulentesimu,
“Disogo togulom, yusogo togulom,” oluk wene enaluk welegesa. Ye, o sum a’ge lodu paget togulomma aphwami en werigisema welagayat. 2#Kel. 25:31-40; 25:23-30; 26:1-30O hwerlisogo ’goduk akhit onuk e, o asuema u ’gela’ge, Allah owi werikmu ogu legesa. Eba esaga ’gwialogwi a’ge emin, e meja delak so’boru roti a’ge Allah paget pogwi a’ge emin, welaga. 3#Kel. 26:31-33Ye, o hwerli o’gut akhit sum pam hwerlirak a’ge ai onuk e, o hwerlirak modok asuema u ’gela’ge, Allah u’gwarek owi ogu legesa. 4#Kel. 16:33; 25:10-16; 30:1-6; Bil. 17:8-10; Ula. 10:3-5O eba re, a’bosu e’ben op a’ge Allah narlik obogu legesa pam emas hele’gik a’ge emin, peti Allah emin hwedik welege oluk peti o’borl o’gwe ’berlegat emas la’bulik a’ge emin, welaga. Peti ai ogola re, manna no’gu legesa a’ge sogoluak emas a’ge ogola yagarak a’ge ai emin, ap Harun o’bouwa’gun esemis dain taga laga a’ge ai emin, wene Allah en nenesa’go weregei wene pelal helep pam wogo a’ge ai emin, welaga. 5#Kel. 25:18-22Peti ai o’borl pam is malaikat ’gela’ge enebe ’biren, enagapsaburl oruak a’ge Allah ebe oruak oluk ogut walsogo pegesa a’ge welegesa. Is ai, aphwami wiak togwi a’ge Allah en erlagapsogo ukpoluk, at emin opsogo la’bulik enebasu lagama, enagapsaburl en sebelogo poluk welegesa. Asogo welegesa a’geat de, wene ai ’berlegat paget yogodak ya mesik-mesik ’beling-’belangsogo u mia o.
6 #
Bil. 18:2-6
Di a’ge yu a’ge eba ’berlegat ebale lo’bok degelak oruakma, is ap Allah eiye a’ge enebe ’berlegat nin hwedik nan hwedik Allah ede opsogo tuogoluk o hwerli ’goduk akhit hwerlirakma ano, ’gogu legesa. 7#Ima. 16:2-34Asogo ’gogu legesa a’geat de, o o’gut akhit hwerlirak a’ge ai nak e, at Allah eiye a’ge onue ’gain a’ge ai nak u’gwarek wiak taga laga a’ge paget emin, eiyagai Israel a’ge enebabut heberlak erlak dong-pongtakma wiak togu legesa a’ge paget emin, onuam wusogo emep woluk, o mo ligom ’bugom osokhwe tahun ebe lo’bok agauwa mesik erlige ’gwise laga. 8Asogo tagalom oluk wene enesa’go werak welaga ai ebam elitsogo, nis dokhumsogo pobi tuagoluk Allah Arogun en, disogo mo’gulnentasu,
“O hwerlirak a’ge ’goduk akhit ai oruakhwe, Allah u’gwarek owi demat a’ge ’goduk hwerik erlakma en lerak welaga,” oluk mo’gulnentasu. 9-10Wene ai, ebe yogodak ago a’ge paget ogut walsogo welaga. Wene ogut waltak welaga a’ge ai hegitsogo togu lemagoluk, so’boru emin, ik emin, disogo no’gulat, di a’ge yu a’ge pam disogo ho togulom, oluk Allah en mo’gulentesi a’ge hegitsogo togulat, onuam Allah warogu legesa ai, Allah en wene ’get demat a’ge owan tu erlak oruakhwe, ’gwiangma lodu paget welat, ogut walsogo togu legesa ai en e, wene enebam erlak oluk enede ’garoksogo selagap po mia welaga.
11-12Is asogo togu legesa a’geat de, Allah en e,
“Di a’ge yu a’ge pobuk disogo op ema o,” oluk obok egei ai ebe re, at Kristus Allah eiye onue ’gain waga ai o. Asogo wagarik e, is naduk di a’ge yu a’ge Allah en walhesi a’ge pam e, ’gegilogo o werigisema ai ’gwegei puk. Erlak o. We, o demat a’ge lok a’ge op werikmu agauwa mesik erlige ’gwegeitik, o ogorlitak ’goduk akhit ukpoluk ’bekhit o hwerlirak o’gutmu modok ebe asuema oluk u ’gela’ge, Allah u’gwarek owi pam eba ’gwegei. Asogo ’gwegei ai re, kambing emin, sapi emin, emep woluk ’gwegei puk. Erlak o. We, nis herle werak ’gela’ge oruakma hebelik modok welemagoluk, nono’go ’balogo waragarik, u’gwarek emep woluk eba ’gwegeitik, nis nenebaget oruak o. 13#Ima. 16:15-16; Bil. 19:9,17-19Ye, is aphwami naduk togu legesa ai pam togulat, aphwami enasua a’ge ene’gik tenholuk, peik ’balonobogwi ai ’gela’ge, is ap Yahudi a’ge enasua a’ge ene’gik tenho erlak a’ge tenhogwi holuk, op emagoluk kambing emep emin, sapi emep emin, sapi ebe wusogo Allah paget odouk narlogwi a’ge uak odouk en noluk, ul ago a’ge emin, wokho enagap o’borl o’gwe a’ge paget hoonobogu legesa ai o. 14Is enagap o’borl o’gwe a’ge paget wam emep mia a’ge pam elirat opsogo hoonobogu legesa. Holuk, nis Kristus emep logo a’ge pam,
“Wene henebam erlak,” oluk nonogola selaksogo elit modok nenebasu o. Nis Allah elaluk welago a’ge ogola opsogo togu lemagoluk, wam asu op a’ge Allah warogu legesa ai ’gela’ge, at Kristus Allah Arogun otok modok welago a’ge anni pam, waragalat, ebe Allah wogesi ai pam, nis nadugat erlak ema a’ge ’burlat togu lege a’ge, at en,
“Wene henebam erlak,” oluk, at emep pam nonogola selaksogo nenebesimu welege o.
15Ai en e, wene wusogo naduk woknenebegei a’ge ai pam welat, nis nenesa’go werak erlak wiak togu lege ai pam nenebe herle werak ’gela’ge welege o. Asogo oruakma, at Allah en Kristus waraga ai pam herle hebilnenebegeitik e, nis at en worlnentesi a’ge nak emin hwedik taknenebasulat, op a’ge otok modok welema a’ge woknentaigoluk, wene ’get a’ge wusogo woknenebiselat, Kristus ebe ’burl heisogo edikpesi.
16-17Ap mesik en,
“An nemening a’ge disogo so’busogo wogontomup,” oluk oso a’ge ebe elaluk oruakhwe, enemening a’ge eiye agai puk. We, at ebe warago holugat,
“At arat waraga o,” oluk selakma ogwi holugat, enemening a’ge eiye agai o. 18Asogo ogwi holuk, enemening a’ge horlogwi ai ’gela’ge, Allah en wene naduk a’ge wusogo wogenebegei ai, mep wusogo enat ologun ’belakpesi. 19#Kel. 24:6-8Allah en,
“Disogo tip, asogo tip,” oluk, nenesa’go weregei wene ai ’berlegat, at Musa en is aphwami Israel a’ge mo’gulentesirik e, pobuk sapi emep emin, kambing emep emin, ik emin udelak poluk e, domba asu orogole mep ebelerak a’ge esu’gat ologun pam dongsogo poluk, musan pam mep worogwi ai ’gela’ge, mep udalogo Allah en wene nenesa’go weregei wene pelal wogo ai pam werak pasulat, aphwami Israel a’ge enebetne ’gwete entasulat, weragenebasulat, tegei. 20Asogo weragenebasulat, disogo mo’gulentesi,
“Wene Allah en nenesa’go weregei a’ge hegitsogo togu lemagoluk, at en e,
His wene arat wusogo wokhenebegis o, oluk, mep wathenebegis yu i o,”
oluk mo’gulentesi. 21#Ima. 8:15Asogo mo’gulentesirik e, Allah owi sum a’ge werik ai emin, di a’ge yu a’ge Allah owi ogola eba at ebaget togu legesa a’ge ’berlek emin, ebetne mep wetil laga. 22#Ima. 17:11Allah en wene nenesa’go weregei wene ai hegitsogo togulat, di a’ge yu a’ge ’berlegat ’gela’ge mep pam nak hotogumu no oluk e, mep libago erlak holuk e, aphwami wiak togwi a’ge erlagapsogo ukpo mia ai en e, mep weregei ai o.
“At Kristus waraga ai pam nak e, nis aphwami wiak togu lege a’ge erlagap pesi,”
oluk egesa wene
23’Gwiangma di a’ge yu a’ge ’berlegat horu a’ge horogu legesa ai, ebe ’bogorl pam oruak a’ge ebam elitsogo togu legesa. A’geat de, ebe demat ’bogorl pam a’ge ai, wam ai a’ge wusogo emep pam horu mia ai en e, 24at Kristus o Allah u’gwarek owi oluk aphwami en ebam elitsogo werigisema ai ’gwegei puk. Erlak o. We, ’bogorl ebe pam ’gwi lagarik Allah oruakma eba nis nenebaget oruak o. 25Is ap Yahudi a’ge Allah eiye onue ’gain Allah owi pam ano ’gogulat e, u’gwarek emep woluk ’gwise laga puk. Erlak o. We, wam sapi emin, domba emin, emep woluk o mo ligom, ’bugom, osokhwe tahun ebe lo’bok agauwa mesik erlige nak ’gwise laga. Asogo a’geat de, at Kristus nak e, u’gwarek emep woluk agauwa pobuk naduk e, erlak o. We, agauwa mesik erlige ’gwegei ai o. 26At en e, is naduk togu legesa ai ’gela’ge telipmu re, ’gwiang walhesi hwerli en ’bekhit yogodak hwerli, agauwa pobuk naduk di obotut yu obotut hasulat waragallep. Asogo a’geat de, o ologun pam nis wiak togu lege a’ge erlagapsogo paigoluk agauwa mesik erligeat wam Allah paget warom ’gela’ge, u’gwarek ebe watlau waga ai. 27Nis aphwami mesik erlige lebeksogo waragaiam en, pobuk wene nenebam pogulat, no’gorlogulat, tua oluk, at Allah enat egei ai ’gela’ge, 28#Yes. 53:12at Kristus ogo re, nis aphwami wiak togu lege a’ge erlagap paigoluk agauwa mesik erligeat wam Allah warogu legesa ai ’gela’ge, at ebe waragarik, pobuk wema ai, nis wiak togu lege a’ge erlagap paigoluk wema puk. Erlak o. We, nis aphwami, at wagoma no oluk orogolema yetharok welege a’ge, delnenebigoluk wema o.
اکنون انتخاب شده:
Ibrani 9: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید