Ibrani 2
2
“Nenebe delnenebegei wene ai re, modok
logo yo,” oluk mo’gulentigisa wene
1Ai enat, aphwami ik so pam lagaimu ik en wogonoboluk lasu ai ’gela’ge, nis dem wene ai ukpoma momu woknonoboluk louwano oluk, wene nenesa’go hwelige a’ge ai ningsogo tenak wolomok o. 2Wene ai, nis nena’bu nene’balak mo’gulontouwagoluk, Allah en is malaikat yo’go onoboluk peragonobou wagama mo’gulentigisa a’ge demat aga o. Ye, is logon wene ai hwelakpoluk hegitsogo tu erlak a’ge, enebe lo’bok wene hegitsogoat enebam poluk wiagabenebise laga ai o. 3Ai ’gela’ge, nis yogodak delnonobu a’ge wene lok a’ge ai nenebakhenne ukpul holuk, wiagapnonobuayat o. Naduk naduk wene at nonue ’gain Onuk Logo a’ge ebe enat aphwami logon mo’gulentesimu enesa’go hweligisa a’ge en se’geksogo mo’gulnentigisa a’ge ano demat aga. 4Wene ai mo’gulentil denagaimu re, is aphwami logon en,
“Wene ai demat o,” oluk pobi tuagoluk, Allah en eniak lekho di a’ge yu a’ge tu puk a’ge elalinat annisogo tagalat, at ogola agai a’ge hegitsogo enebabut lo’bok Arogun so’busogo wogentasulat, tegei a’ge ai, nis en nenebakhenne ukpul holuk e, uknonobouwa epegep a? Wiagapnonobuayat o.
At Yesus en nenagap delogo woknonoboluk laigoluk, ebela yeregei wene
5Nis en e,
“Pobuk ’gwiang ’get a’ge pam wolomul,” oluk ogu lege a’ge ai welat, Allah en is malaikat a’ge eniak hologo welemagoluk ’gain edigenebesi puk. Erlak o. 6#Mzm. 8:4-6Wene aphwami enebaget Allah iak pam ap mesik en pelal disogo wesimu oruak,
“Eige! Naik Allah o. Nis nenebe aphwami a’ge dagege a’geat de,
hat en nenebam eberak welat, holukhwema nenebasulat, taga legen ai no’gosogo oluk.
7-8Agauwa wei nak lodu paget is malaikat a’ge ononuk oruak a’ge logo oruakhwe,
nis nononuk erlakma en mia ’gela’ge takpoluk nenebegen a’geat de,
di a’ge yu a’ge ’berlegat nis neniak hologo welat,
erliknonobogulat, hau do’goksogo watnonobogulat, togu lemagoluk ediknonobouwa ai o,”
oluk pelal wokho pegesa. Di a’ge yu a’ge logon ’belabu erlakma en ’berlegat nis neniak hologo welemagoluk egei a’geat de, yogodak di a’ge yu a’ge ’berlegat neniak hologwi erlak owan oruak hogu lege o. 9A’geat de, at Yesus nak e, arat ’gain edikpesimu oruak hogu lege o. Allah ebabut op en, Yesus aphwami ’berlek enebaget waremagoluk malaikat ononuk oruak a’ge logo ’gela’ge oruakhwe, at onuk erlak mia ’gela’ge takpesimu, ebe di obotut yu obotut hil-hil waraga ai pam, Allah en at onuk oruak a’ge ’gain edikpesimu oruak ai o.
10At Allah ai re, di a’ge yu a’ge at u’gwarek paget, u’gwarek enat walhesi a’ge en, aphwami at eiyagai esanat erligonobogulomma wogonoboluk louwagoluk, ebela yeriso a’ge Yesus at o. At enat aphwami elit delenebiselat wogonoboluk lasu lemagoluk di obotut yu obotut hil-hil waremagoluk epesi ai re, elit opo a’ge hegitsogoat epesi o. 11Yesus ebe, nis aphwami wiak togwi a’ge honenebiso a’ge ai emin, nis aphwami nenebe honenebiso a’ge emin, nenemin la’bulogo re, nenaik mesigat. Ai en e, at Yesus e’gerli erlagat,
“Is aphwami ai an narilak norokhwi,” oluk oso ai o. 12#Mzm. 22:22At en Allah mo’guleselat e,
“An en hat hebe narilak norokhwi mo’gulentasulat,
heiyagai odoktogwi a’ge ebano ene’gerlakma welat, erlikhebiselat, taga leik o,”
oluk mo’gulesirik, 13#Yes. 8:17-18mesik eminat ap mesik mo’guleselat e,
“An nede Allah pam he’berik poluk weleik o,”
oluk mo’gulesirik e,
“Allah en neiyagai woknesi a’ge ebano enemin welege yu hemen,”
oluk mo’gulesi. 14At en e,
“Aphwami ai an neiyagai,” oluk egei ai re, nis aphwami waraga lege a’ge paget egei ai en e, at ebe waragalat, nis aphwami waraga lege a’ge edip at Iblis e’gik pam welago a’ge ai, at Yesus en at Iblis ebe mabenap pasulat, 15nis aphwami nenebe dagotluk nenelaluk welat, warom nonogorlok en nene’gik herle werak ’gela’ge welege a’ge hebilogo nenebasulat, tigoluk, nis waraga lege a’ge nenebabut wokho waraga ai o. 16#Yes. 41:8-9Asogo tegei ai re, demat malaikat a’ge olukhwema onoboluk edeabenebegei puk. Erlak o. Allah iak pam pelal wogo oruak hegitsogoat, nis ap Abraham en dogo’gwe a’ge yu olukhwema nonoboluk, nenebe edeapnenebegei ai o. 17Asogo tegei ai re, disogo oluk. Nis aphwami wiak togu lege a’ge, at en erlagap paigoluk, at ebe Allah eiye a’ge ’gain welat, ebabut Allah paget he’bisogo tagalat, nis aphwami edeapnenebiselat, elirat taga leigoluk, at ebe nis aphwami arilak orokhwi ’gela’geat agarik, nis togu lege a’ge ’berlegat nenebabut wo a’geat wesi ai o. 18Asogo wesimu re, at wiak tuagoluk ede ’gagalisoam, di obotut yu obotut arat hesirikmu no oluk e, nis aphwami wiak tuagoluk nenede ’gagaliogoluk wagoam, at en elirat letnonto a’ge oruak o.
اکنون انتخاب شده:
Ibrani 2: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید