Kolose 2
2
1An en e, his emin, is aphwami o Laodikia a’ge emin, is logon esanat emin, an nebe heneperlak a’ge paget nannisogo taga legi a’ge ai, his henaluksogo welemak, oluk mo’gulhentegis ai o. 2His henede ago werak welat, his-his henemin hwedik nede-hedesogo welemagoluk asogo taga legi o. His asogo welat e,
“Wene ai demat o,” oluk, pobirak poluk, wenemennei modok ’garoksogo welat, wene Allah ogola hisogo welaga wene ano dokhumsogo henaluk ema o. Wene ai re, Kristus ebeat o. 3Allah ede ’gagalak welat, di wene yu wene modok aluk ai en, at ogola hisogo welaga a’geat de, Kristus ematek en ’baksogo mo’gulnentasu o. 4Is logon eniak esei a’geat de, eniak demat ’gela’ge lalhonobuano oluk mo’gulhentegis ai o. 5An nebe walekma welegi a’geat de, nede his hene’bek wagama re, henemin eba welege ’gela’ge o. Welat, henede Kristus ebam he’berik poluk, henede mesigat ningsogo hegit-hegit togukhwe nil hentasu legi ’gela’ge re, nogola nagai hasu legi o.
At Kristus emin hwedik welat, nenede daksogo hurle agalat wolom wene
6His en e,
“Kristus Yesus nonue ’gain Onuk Logo a’geat o,” oluk ebe hwerlegep ai en, emin hwedik modok wolomup o. Asogo welat, henebabut wene mo’gulhentigisa hegitsogoat, 7heneme’en Yesus ebam ningsogo yogo poluk e, henede at ebam daksogo he’berik poluk, emin hwedik welat e, henede hurle ago modok welat, Allah hau worogwi modok wolomup o.
8Asogo togwi oruakma, aphwami logon enede ’gagalak a’ge ’gela’ge, wene we a’ge eniak eseiyat mo’gulhontogulat, lalhonobuano oluk e, henebabut heberlogo wolomup o. Wene ai re, Kristus en egei a’ge hegitsogo ogwi puk. We, aphwami dagetil wagaihwe, ene’balak en e,
“O yema di a’ge yu a’ge he’berik e, mu’gat enebabut wiak a’ge aiat o,” oluk ogu legesa a’ge hegitsogo lalhonobogwi ai. 9A’ge re, Allah ebe modok ebesigat Kristus ogola oruakma, aphwami at daklau wagarik welaga ai o. 10Malaikat ’bogorl pam a’ge emin, mu’gat enebabut wiak a’ge emin, eneragam tenentarok oruakma eniak hologwi a’ge, Kristus iak holu ebelerak ai en, his ogo re, at emin hwedik welat, henede ’garoksogo hurle egeptik welegep ai o. 11His e, at emin asogo hwedik welegep ai en, aphwami ene’gik en enagap ene’gerlimu a’ge ’balonobogwi ’gela’ge ’balhenebigisema ’belak welegep puk. Erlak o. We, at Kristus enat henebabut honotogat welat wiak togu legep a’ge ano daksogo ukpesimu, henagap hene’gerlimu a’ge ’belak wolom ’gela’ge welegep ai o. 12#Rom. 6:4At Kristus waragama ebe werak a’ge saligisa ’gela’ge, his ogo ik olomu ’belaphonobogulat, at emin hwedigat salhenebigisa o. Ye, at emin hwedik werak oruakma, Allah anni pam elalugap pesi, oluk, henede at anni pam he’berik pegep ai en, ik olomu en peiyalogo lagabak hono’borlu agaiam e, at emin hwedigat henelalugaphenebegei o.
13 #
Efe. 2:1-5
His naduk e, henagap o’borl o’gwe a’ge paget hene’gerlimu a’ge ano ’belak erlakma en, wiak togwi modok welat e, henebe werak a’ge ’gela’ge oruakma, at Allah en nis wiak togu lege a’ge erlagapsogo ukpoluk e, Kristus emin hwedigat oruakma henelalugaphenebegei ai o. 14#Efe. 2:15Wene at Allah en nenesa’go weregei wene ano, nis en ukpoluk wiak togwi modok welege a’ge ai, pelal ’gela’ge ’belak wene lok a’ge nenebam oruakma, Yesus ebe e pam edikpoluk worogulat, nis wene nenebam welaga a’ge ano emin paku wusogo pegesa ai pam, Allah en wene ai ologun wusogo arat erlagaptegei ai o. 15At Kristus ebe e pam waragalat e, Iblis osi ’gain a’ge enanni oruak a’ge emin mabenabonoboluk e, aphwami en enselei a’ge emin weim obogulat enanni emarik e, enebe enelaluk herle wusogo aphwami enil pam wogonoboluk wagai ’gela’ge, at Kristus en selakma ene’gerli weregei ai. 16#Rom. 14:1-6Ai enat, is aphwami logon en e,
“So’boru emin, ik emin, no a’ge o. Ye, yu no puk a’ge,” ogulat,
“Mo eria pam ’biso holuk, eria pam ligago holuk, disogo tu a’ge o,” ogulat,
“Dugwi namiso holuk, disogo tu a ’ge o,” ogulat,
“Agauwa sabit a’ge pam Allah paget weat welat, disogo tu a’ge o,” ogulat, ogukhwe, his yogunat togumu, wene ai a’ge paget, wene henebam pouwa erlak o. 17Aphwami enebe owan wagaihwe enarogun naduk onorogolema wago ’gela’ge, Kristus ebe owan wom erlak oruakhwe, wema oluk wene ’berlek ai a’ge naduk togu legesa. A’geat de, ebe re, Kristus at o. 18Ye, is logon en e, enebabut onotogat welat ’burlat erlikhorlogulat e, disogo ogwi ai o,
“Nis aphwami nenebe re, uo. We, ’gain a’ge re, malaikat Allah en yo’go peragonobou wago a’ge aiat. Holuk e, eneragam welat erligonobogulom, oluk an nabi ’gela’ge pam hasu legi a’ge en mo’gulhentasu legi ai o,” oluk enepenen enat Kristus emin hwedik a’ge lebikhonobouwogoluk mo’gulhontogwi ai,
“Demat,” oluk henede epagup o. 19#Efe. 4:16Nenebe yu nena’gul emin hwedik oruakma, nene’gik nonoyuk e’gerlim neneme’en pam hwedik taknenebesimu, nonso’boru no’gwiam a’bosu nonuak ele’gwe lasuam, nenebe lok aga lege ’gela’ge, nis Allah eiyagai Kristus emin hwedik oruakma, at Allah enat logapnenebasu ai o. A’geat de, is ai asogo nonue ’gain Kristus emin hwedik welegesarik en e, pobuk ’goboksogo ukpegesa ai en, eniak hologup o.
At Kristus eminat waregerik e, eminat nenelaluk egerik welat, togulom wene
20-21His Kristus emin hwedik welat waregep ai en, mu’gat ebabut wiak a’ge ’gwiangma yema e’gik tenak welago a’ge ano en henebe herle wusogo tenhentarok oruakma, Allah en herle hebilhenebegei ai o. A’geat de, his henebabut is logon ’gwiangma a’ge enebabut onotogat welat togwi ’gela’geat togu legep ai nopaget. Is ai en e,
“Di a’ge yu a’ge logon hene’gik ningsogo tenak pogulat, waltak nak pogulat, logon oduk nekhogulat, togup o,” oluk enesa’go werisoam nopaget hologo togu legep. 22Wene ai, aphwami enat, di a’ge yu a’ge no’gwiam erlak ago a’ge pagerat,
“Disogo togu lomok o,” oluk wene ’belak hegitsogoat enesa’go worogulat, mo’gulontogulat, togwi ai o. 23Is ai enepenen enat aphwami mo’gulontogulat e,
“Malaikat eneragam welat erligonobugulat, honogola en e,
Nebe uo, oluk ogulat, enede op emagoluk, ene’gik, enesa’go, ene’berli, yaga morogwi ’gela’ge, enagap pam wik-wiaksogo togulat, togulom o,” oluk wene enede ’gagalak pam op a’ge ’gela’ge mo’gulontogwi ai o. A’ge re, enebam aganhan agoam, wene ai pam en enede sebelu mia o.
اکنون انتخاب شده:
Kolose 2: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید