1 Korintus 16
16
“Allah eiyagai en enarilak onorokhwi enebaget uang logon onobogulom o,”
oluk mo’gulentesi wene
1 #
Rom. 15:25,26 Yogodak e, his en uang odoksogo henarilak honorokhwi Allah eiyagai logon onobouwogoluk egep ai re, wene is Allah eiyagai o Galatia a’ge mo’gulentegis ai ’gela’geat tip o. 2An nebe wagoam e, odoktogup no yo. We, ya pamat hari Minggu pam nin hwedik nan hwedik ogulat, henebe lo’bok hene’gikmu agoam, odoksogo onoboluk e, tenak wolomup o. 3Onoboluk e, ap woluk louwa a’ge his en,
“Is elit o,” oluk epagup a’ge holuk yo’go onobomup o. Asogo yo’go onoboluk oruakma, an nebe weiktik e, his en enebegep a’ge ai woluk louwagoluk, suesi’ga ’balogo o Yerusalem peragenebaik o. 4A’ge re, an nebe lo ’gela’ge ago holuk e, an neminat lul o.
Paulus en, “Disogo tik o,” oluk wene ’gagalogo pesi wene
5 #
Per. 19:21
An o Makedonia laiyogoluk nede epegirikmu re, eba laiktik da ’gwil ya ’gwil arat laiktik en, his hene’bek pobuk weik o. 6Hene’bek weiktik e, an his henemin agauwa weiyat weleiktik en de a? O wiak oruakhwe agauwa mesik eminsogo weleiktik en de a, his en o an laik epegimu eba peraknebagup en oluk mo’gulhentegis o. 7An asogo o momu laigoluk lasulat e, agauwa mesik erlige nemin wolom e, nebit o. We, nonue ’gain Onuk Logo a’ge en obat ua holuk e, an agauwa weiyat logon eminsogo henemin wolomul o, oluk nede epasu legi o. 8-9#Ima. 23:15-21; Ula. 16:9-11#Per. 19:8-10Weik en e, o Efesus yema aphwami,
“Wene nenebit o,” oluk wene ’balogwi a’ge enebe a’bigat oruak a’geat de, an en is logon mo’gulentasuam wene wo a’ge a’bigat oruak ai en e, yema weleiktik en Hari Pentakosta arat takpoluk en weik o. 10#1Kor. 4:17At Timotius ano, an en nonue ’gain Onuk Logo a’ge paget taga legi ’gela’ge tago a’ge his hene’bek wema ai, ebe wago holuk e, his henemin ogorlok erlaksogo welemagoluk, ebe opsogoat womup o. 11At wagoam e, is aphwami pema en,
“At ebe mia o,” oluk onogola mi-miarak po modok erlak o. At togolik ne’bek wagalat e, nenarilak nonorokhwi ado pema ebano eminat niaumagoluk yerentarok welegi ai en e, at opsogo lethogu lomup o. 12Nenarilak Apolos ano en e, is nenarilak nonorokhwi pema ebano wogonoboluk hene’bek wemagoluk, pobuk naduk ede ’gagalise legi a’geat de, at yogodak ya wom oluk epasu erlak o. A’ge re, pobuk wom epasu holuk e, wemayat o.
At Paulus en enede ’gagaliselat, hau warenebiselat, tegei wene
13Henebabut heberlogo welat e, henede Allah pam he’berik poluk, ningsogoat edik wolomup o. Henebabut ap enede ha’buktak a’ge enebabut ’gela’ge welat e, henannisogoat welemis o. 14His di a’ge yu a’ge tuogoluk e, aphwami enebe henedesogoat togu lomup o.
15 #
1Kor. 1:16
Narilak norokhwi. Wene mesik yu henede ’gagalik. At Stefanus eiyagai enemin ebano re, enebe henaluk o. O propinsi Akhaya eba re, is naduk Allah eiyagai egesarik e, is Allah eiyagai logon lerontogu lomogoluk enedemu enat epegesarik en lerontogwi ai o. 16Is enebabut ’gela’ge holuk, is logon is enemin ningsogoat togwi holuk e, ’berlegat eneragam ’goluk eniak hologo wolomup o.
17Stefanus o, Fortunatus o, Akhaikus o, ne’bek wegesarik, his en an nebaget togulom ’gela’ge, is en op togwi ai en, nogola nagai hasu legi o. 18Is wegesema re, an nogola op aga ’gela’ge, his honogola op ema o. Holuk e, is aphwami pema enebabut is ’gela’ge holuk e, hau do’goksogo waronobogu lomup o.
19 #
Per. 18:2
Allah eiyagai o propinsi Asia da ya odoktogwi a’ge yema en his hau wathenebigisa o. Ap Akwila ugwe Priskila e’biregat, ye, Allah eiyagai is onowi pam odoktogwi a’ge enemin en, nonue ’gain Onuk Logo a’ge emin hwedik welat hau a’bigat wathenebigisa o. 20Ye, nenarilak norokhwi o yema a’ge ’berlek enat hau wathenebigisayat o.
“Nis nenebe ’berlek Allah eiyagaiat o,” oluk e, his-hisat hau worugulat henemde motok-motok ’bogu lemis o. 21An Paulus nu’gwarek ne’gik en pelal wokho hau wathenebegis ai o. 22At mesik en, nonue ’gain Onuk Logo a’ge ede hwedik erlak holuk e, Allah en at ai ebe hweim pouwak o. A’ge re, nonue ’gain Onuk Logo a’ge perlene suk o, u ’gela’ge, Maranatha, oluk egi ai o. 23Nonue ’gain Onuk Logo a’ge Yesus ebabut op ano en ’gwelakhentarok modok welemak o. 24Kristus Yesus emin hwedik welat e, henebe ’berlegat nede oluk hau wathenebegis ai o.
اکنون انتخاب شده:
1 Korintus 16: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید