MATIUS 28
28
Yesus uruk agaid wene
28:1-10
(Mk 16:1-10; Lk 24:1-12; Yo 20:1-10)
1We woragwi tarem nene luk, Hari Minggu tarem o nda yosoloma, o Magaralena kwe Maria min Maria misik iri min-e yapma pidnak sa na kil mbiriga-o. 2Kil mbiriganggal-e, aid arem-nen Nagawan Indo-nen idnak aid nap na mbuwasola-ge, mimo ereya-t o lele kwarat yij-o. Aid nap na lobok yarig-e, kerep na lembera waburuk, iri bem-et koreyak woragaij-o. 3At erare-ge obinel nggal, at usum-e loro lombok ndugu ndugu nggal woragaij-o. 4Nde, san ombo ereba na-ge kwiye kwarat luk, kot kot luk, wat yidnak nggal yiga-o.
5Alat nde, aid nap iri-nen kwami na yak ondosolar-e: ”Kir-e kwiye kali-ge meyog-o. Kir-e e lang pang tak pem panggarak ibiga nap Yesus irit ogore yili iri-ge an-e naru-o. 6At iri-ge yu me-ge lag-o. At-nen-e: ’Nuruk yimin-o’ luk yoso nggal-et uruk agaij-o. At mbinggirik woragaid sa na kil lobok yer-o. 7Karug-e, ndaget nak at owosirak yak indil mborogolar-e: ’At iri-ge wat yidnak nap ennggendumu-nen uruk lug-e, kit kentaremok nggwe Nggalilea mburusu-o. Iri me-nen kagub-o’ luk yak ender-o. Wene iri-ge ndemeret yak kindigi-o” luk yak indij-o. 8Iri rak puruk, kwami na kwiye min-et nde, enalen kwarat luk at owosirak wene na yak unduwokluk ndaget nak puburak mbiriga-o.
9Mburukmu, mimo ereya-t Yesus na it inmin lid pid luk-nen yak ondosolar-e: ”Wiwa-o” luk yak ondosoloma-ge, kwami na-ge at ijok tenaguruk at erembel waniga-o. 10Alama-ge, Yesus-nen it yak ondosolar-e: ”Kwiye kali-ge meyog-o. Mburugupndig-e, an naggamirak na-ge Nggalilea mberer-o luk yak indil mberer-o. Iri me-nen an niyujwa-o” luk yak indij-o.
San ombo-nen pariga wene
28:11-15
11Kwami ereba mborogola ereya na-net kerep ndo yik karok woraiga san ombo erep na o silmu mbirigarig-e, iri nggal kwat yosola kaiga wene na kenggera tepan omborak nagawan nagawan yak indiga-o. 12Yak ondogolikma-ge, it tepan omborak nagawan nagawan-nen ogore yidnak nap inmin ndok wirigarik, it-nen kwarurak wene mbatluk, it-nen-e san ombo na onggo kwarat wok ondogolat-nen 13yak ondogolar-e: ”Kir-e wene-ge yu nggal yurag-o: ’Nit kubu nggwe nene yogola-ge, at owosirak ereba na lobok yigarik, at orogwak iri yariya wanikma-o’ luk yurag-o. 14Nde, gubernor-nen wene yu kuluwarik, kit kenpem angin worak mende mbuwa naru, nit-nen at indi yanggunul-o” luk yak indiga-o. 15Yak ondogolikma-ge, san ombo na-ge tol na wanurug-e, it yak indidnak iri na nggal-et kwariga-o. Iri ala-ge, it Yawuri nap ennggendumu wene na wigak yid na-ge yawo na wigak yusu-o.
Yesus-e at owosirak inmbiri bem nam yid wene
28:16-20
(Mk 16:14-18; Lk 24:36-49; Yo 20:19-23; YidW 1:6-8)
16Nde, at owosirak sebelas na-ge o Nggalilea mborogolar-e, Yesus-nen mirik inpid ndobo iri na me-t mbiriga-o. 17Mbirigarik, at karug-e, at erembel waniga-t nde, it ereb-e inndi-ge mberen nggal woraiga-o. 18Nde, Yesus na it endam panggo yosolat-nen it yak ondosolar-e: ”Aid arem amawi min nggweyak ma amawi min oboksa-ge an ninggem pidnak-nen yusu-o. 19Iri bem-e, kit mburugupndig-e, ap enlem oboksa-ge an nowosirak tak unpuruk, yi mat onpogolar-e, Eid unu bem, Ambara unu bem, Konak Indi unu bem yi mat unpuruk, 20an-nen ’Iri nggal mer-o’ luk yak kindigi wene oboksa-ge it mul ender-o. Yebet yebet tak wolmer-o. An-e pempa-t kit kinmin irit worasoma, woroksiyem wok ma-o” luk yak indij-o.
اکنون انتخاب شده:
MATIUS 28: inondx
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@LAI 1992, 1994
