Matiye 28

Jeju kə̂ oy le ndol

1Go ndɔ-kuwa-rɔ tə̂ lə Jiipije kə̂ to dɔngɔr ndɔ a ta kunn-kute a, kə əndɔɔ baa, Mari kə̂ Magədala kə Mari kə̂ kâra dawje ta koo buwa-yo le. 2A ta koo a, nangə yəkə kə singa. Marə anjə lə Əbbə-dəwje in darâ ddee ndubbu ər le kə ddang ngaâ isi dɔɛ̂ tə̂. 3N̂-ndɔnrɛn tokə ndi kə̂ təəl ngaâ kubbu laa nda tokə lə nɛyn. 4Njê-ngəmje buwa-yo le bbəəlje nya ngaâ isaje. Disije tokə lə dəwje kə̂ oyje. 5A anjə le pa arə dɛnɛ̂nje le nan: «Sese, ə-bbəəlje ang, mba m-gərə to aw sangəje Jeju kə̂ n̂-tɔlɛ̂ kakə-dəsə tə̂ le. 6Nee nəənn ang, n̂-ndol tokə n̂-pa le. Ə-ddee ooje lo kə̂ dilɛ̂ tə̂ le. 7Awje njangə aw paje arə njê-njaje goe tə̂, ə-paje nan: ‹N̂-ndol ngaâ naw ta nginanse kete Galile. A kooeje nunn.› Tarɛ̂ njaa m-pa marəse mban nəənn.»

8Dɛnɛ̂nje lə ɔtuje buwa-yo tə̂ le kə ngɔru. Bbəəl uta dɔde ddəm rɔde nəəlde nya ddəm ngaâ daw paje tar le darə njê-njaje go Jeju tə̂. 9A ta koo a, Jeju tee nɔnde tə̂ aw tila kəmde ngaâ pa arəde nan: «Lapiya ləse!» Dɛnɛ̂nje le ddeeje ngɔsi saa ngaâ dɔsuje məkəjə-gɔlde nɔɛ̂n tə̂, duwaje gɔlɛ̂ n̂-walɛ̂je nɛ̂n. 10Yeenn ngaâ Jeju pa arəde nan: «Ə-bbəəlje ang, aw paje arəje ngakɔnʼmje arəje dawje Galile. Lo kə̂ nunn â dâ koomje tə̂#28:10 12:49.»

Tar lə njê-ngəmje ta buwa-yo kə̂ paje

11Dɛnɛ̂nje le naynje ddəw-boô bbay a, marə dəwje kə̂ ngəmje ta buwa-yo le təlje awje tɔkə bbe tə̂ aw ɔruje gəl nɛ̂nje tɔyn kə̂ toje le arəje mbayje lə njê-poloje Lubba. 12Tɔkə njê-poloje Lubba le mbɔnje naan kə tɔkəje lə Jiipije ngaâ dooje ta naan. Goe tə̂ a, darəje njê kə̂ ngəmje ta buwa-yo le narɛ kə̂ bo, 13n̂-paje darəde nan: «Ta ə-paje nan: ‹Kar kə̂ n-nayn jaw tibbi bbay â njê-njaje go Jeju tə̂ le ddeeje til tə̂ ddee bbokoje niinnɛ̂.› 14Bbo Pilatə oo tarɛ̂ a, ja gərə gusu kə̂ ta pa nɛ̂n karə n̂-ndiki tə̂. A sese â kingaje tar ang.» 15Njê-ngəmje ta buwa-yo le taaje narɛ le ngaâ ddaje nɛ̂n le kə turu ndu kə̂ darəde le. Tar nəənn le nja horo Jiipije tə̂ ndərəng bbokənɛn.

Jeju ula njê-njaje goe tə̂

16 Njê-njaje go Jeju tə̂ kə̂ naynje dɔku gire kâra le awje Galile dɔ ddingiri tə̂ kə̂ n̂-tɔjude le. 17Dooeje a, dɔsuje məkəjə-gɔlde nangə̂. A marɛ̂je aw maynje tar bbay. 18Jeju ddee ngɔsi kə de, pa arəde nan: «Lubba arəm singa tɔyn darâ ddəm nangə̂ ddəm. 19Yeenn a, awje rɔ gəl-dəwje tə̂ tɔyn kə̂ dɔ nangə tə̂. Ə-ddajede to njê-njaje gom tə̂ ta ə-ddajede batɛm kə ri Bɔ, ri Ngonn kə ri Ndil-mə-nda. 20Ə-tɔjujede arəje n̂-ddaje nɛ̂n kə turu nduje tɔyn kə̂ munn marəse. Ooje, mâ nayn kə se kə ndɔ tɔyn ndərəng ddutu ndɔ tə̂.»

اکنون انتخاب شده:

Matiye 28: KabbaDkS

های‌لایت

به اشتراک گذاشتن

کپی