प्रेरितगोळ 24

पौलुस उन खिलाप कारवाई

1अईद दिन इन बाद्दा हनन्याह महायाजक कई स्याणागोळ अदिक तिरतुल्लुस हेसुर इन वकील उक सांगुळ हुळकु बंदुन. आंदुर शासक फेलिक्स उन मुंद पौलुस मा आरोप हचदुर. 2याग पौलुस उक कारूकु आत रा तिरतुल्लुस आऊन मा दोष हचकु अनली कुरतुन:

“हे महामहिम फेलिक्स, नीन अगुवाई दा नाव हापाळ समय टु धोळ्द शांती इन सांगुळ ईरेतेव, अदिक नीन दुर दृष्टी देल द्याश दा हापाळ वळ्लेव सुधार आग्याव. 3फेलिक्स शासक उक नाव हर जागा अदिक हर प्रकार देल इदुर्द स्वागत माळतेव अदिक नाव नीम प्रती हापाळ आभारी आयेव. 4ना नीम्द हापाळ यक्कुल समय ताकोमोद चाहासालीन, रा ना नीन से विनती माळतीन कि कृपया नीव थ्वाळासा दा नाम्द केळकोम. 5यतिकी नाव ई मंळसा अक उपद्रवी अदिक दुनिया दा सप्पा यहूदीगोळ दा फूट हाकावाळा, अदिक नासरीगोळी समुह दा स्याणा मान्सतेव. 6आव मंदिरगोळी अपवित्र माळोद चाहासदुन, लेकीन नाव आऊक हुडुकोंडेव. 7लेकीन पलटन इन सरदार लूसियास आऊक जबरदस्ती नाम कय दा टु कसु कोंडुन, 8ई सप्पा मातगोळी यदुर्द बारा दा नाव आऊन दोष हचतेव, नी खुद अच आऊक जाँच माळकु जान्स कोंड्या.” 9यहूदीगोळ भी इदुर दा शामिल आगकु हिम्मत देल सांगुळ कोटकु अंदुर, कि ई मातगोळ सप्पा सही आव.

फेलिक्स उन मुंद पौलुस उन बचाव

10याग शासक पौलुस उक माताळोद इशारा माळदुन, रा आव उत्‍तर कोट्टुन:

“ना ईद जान्सकु कि नी हापाळ साल टु ई जाती इन न्याय माळेत्या, ईद जान्सकु ना खुशी देल तान बचाव साटी थ्वाळासा मातगोळी माताळोद चाहासतीन. 11नी खुद जान्स सकत्या कि यागी टु ना यरूशलेम दा आराधना माळली बंदीन, नानी हन्नेळ दिन से यक्कुल आगीदील. 12यहूदीगोळ नानी ना रा यहूदी सभागृह दा अदिक ना रा नगर दा लॉकुर भीळ दा दंगा माळ्त नोळदुर. 13अदिक ना रा आंदुर आ मातगोळी, यार्द बारा दा नान मा दोष हचतार, नीन मुंद सच प्रमाणित माळ सकतार. 14लेकीन ना नीन मुंद ईद मान्स कोमतीन कि याता हादी इक आंदुर ख्वाटा अनतार, अदुर्दा रीति मा ना तान आप्प दादागोळ परमेश्वर उन आराधना माळतीन. लेकीन ना ईद भी विश्वास माळतीन जो मातगोळ मूसा अन व्यवस्था अदिक भविष्यवक्ता अन किताब दा लिख्सकु आद. 15अदिक परमेश्वर उन मा हांगा आशा ईटतीन ह्यांग आंदुर खुद भी ईटतार, कि वळ्लेर अदिक बेकार येढ्ढु लॉकुर्द भी पुनरूत्थान आदीत. 16इदुर से ना खुद भी कोशिश माळतीन कि परमेश्वर उन, अदिक मंळसागोळ दी नान विवेक हमेशा निर्दोष ईरूल.

17 # प्रेरितगोळ २१:१७-२८ “हापाळ वर्ष इन बाद्दा ना तान गरीब लॉकुरी पैस्या कोळली, अदिक बलिदान येर्सली बंदिदीन. 18याग आंदुर नानी हासिल माळदुर आग ना शुद्धीकरण इन रीति इक पुरा माळीन अदिक ना नान हात्‍ती यातोदारा भीळ ईरोद अदिक ना यातोदारा अव्यवस्था फैलुसिदीन. 19लेकीन अल आसिया क्षेत्र अन थ्वाळासा यहूदी भी ईरोर. आंदरी जरूरी ईरोद, कि अगर नान विरोध दा आंदुर हात्‍ती येनारा मात आद रा ईल नीन मुंद बंदकु नान मा दोष हचायदुर. 20या ईद खुद अच हेळुल कि याग ना महासभा अन मुंद निदुरकु ईरीन, रा आंदुर नान दा यातोद अपराध नोळदुर? 21#प्रेरितगोळ २३:६सिवाय ईदुर्द कि याग आंदुर न्याड्या दा ईरीन आग ना धोळ दण दा अंदिदीन ‘सोत्‍तुर दा टु जित्‍ता आगोद बारा दा नान विश्वास इन कारण नान न्याय माळकु आगेत्याद.’”

22फेलिक्स, जो ई हादी इन बारा दा ठीक ठीक जानसोन, आंदरी ईद अनकु टाल्स बुटुन, “याग पलटन इन सरदार लूसियास बंदान, रा नीम मात इन निर्णय माळाईन.” 23अदिक सूबेदार उक आग्या कोट्टुन कि पौलुस उक येनारा छुट कोटकु रखवाली माळेत, अदिक आऊन संगीगोळ दा टु यारीकु भी आऊन स्यावा माळोर से रोक्सबाळेत.

फेलिक्स अदिक द्रुसिल्ला अन मुंद पौलुस

24थ्वाळासा दिनगोळ बाद्दा फेलिक्स तान हिंग्स द्रुसिल्ला अक, जो यहूदीनी ईरोर, सांगुळ हुळकु बंदुन अदिक पौलुस उक कार्सुस्कु आ विश्वास इन बारा दा जो मसीह यीशु मा आद, आऊन से केळदुन. 25याग आव वळ्लेव मातगोळ, अदिक संयम, अदिक बरावाळा न्याय इन दिन इन चर्चा माळोन, रा फेलिक्स अंजकु उत्‍तर कोट्टुन, “ईग नी होग; मवका नोळकु ना नीनी मात्‍त काराईन.” 26आऊक पौलुस टु येनारा पैस्या सीकोव भी आशा ईरोद, इदुरसाटी घळी घळी कारूकु आऊन से मातगोळ हेळतोगोन.

27लेकीन याग येढ्ढ वर्ष बीतसेदव रा पुरकियुस फेस्तुस, फेलिक्स इन जागा मा व्हासा शासक बन्सकु बंदुन; अदिक फेलिक्स यहूदीगोळी खुश माळोद इच्छा देल पौलुस उक बंदी इच बिटकु होदुन.

اکنون انتخاب شده:

प्रेरितगोळ 24: Haa25

های‌لایت

کپی

مقایسه

به اشتراک گذاشتن