NUMELO 3
3
Fakatuutuu ki te u famili i te nofoaga
1Koeni te famili o Alone mo Moisese, i te temi ae nee palalau ai te Eteleno kia Moisese i te mouga o Sinai.
2Koeni te u higoa o te u foha o Alone: ko te uluaki ko Natape, mo Apiu, mo Eleasale, pea mo Itamale. 3Ko te u higoa aia o te u foha o Alone ae nee fakanofo ke faisakilifisio, pea nee ulu leva ki te gaue a te tagata faisakilifisio. 4Nee mamate leva Natape mo Apiu ia mua o te Eteleno, o tupu nee na ave he afi kehe kia mua o te Eteleno i te toafa o Sinai; nee na hala foha. Pea nee fai leva e Eleasale mo Itamale te gaue a te tagata faisakilifisio ia mua o tana tamai ko Alone.
5Nee palalau leva te Eteleno kia Moisese, o ui: 6Ke ke fakaoviovi mai te faahiga o Levi, pea e ke tuku leva natou ke fakalogo ki te tagata faisakilifisio ko Alone, pea ke natou faifekau kia ia. 7E natou fai anai tanatou gaue ia mua o te falela tapu o faifekau kia Alone mo te hahai katoa o Iselaele, pea e natou fai leva te u gaue fuli ki te falela tapu. 8E natou tokaga anai ki te u mea gaue o te falela tapu pea e natou fai leva ki te hahai o Iselaele te u gaue fuli ae e aoga ki te falela tapu. 9E ke fakaha anai ke fakalogo te kau Levi kia Alone mo ona foha, ki te tauhi o te sagatualio, pea ke natou fakafofoga leva te u fanau a Iselaele. 10E ke fakanofo anai Alone mo ona foha ke natou fai te gaue a te tagata faisakilifisio lahi. Pea kapau e fakaoviovi he tagata kehe ki ai, pea e tautea anai ia ki te mate.
11Pea nee toe palalau leva te Eteleno kia Moisese: 12Ko au totonu ae kua au filifili te kau Levi i te u fanau ake fuli ae o Iselaele. E natou tauhi anai kia au o fetogi te u uluaki fuli o te u fanau a Iselaele. 13Koteuhi i te aho ae nee au matehi ai te u uluaki o te kau Esipito, nee au fakatapui kia au te u foha uluaki fuli o te u fanau a Iselaele mo te u uluaki fuli o anatou faga manu: a aku leva natou, ko au ko te Eteleno.
14Nee palalau leva te Eteleno kia Moisese i te toafa o Sinai, o ui: 15Ke ke tohi te u foha o Levi o mulimuli ki onatou famili, pea mo onatou faahiga; ke ke tohi te u tagata fuli mai te mahina tahi o fai ki oluga. 16Nee tohi leva natou e Moisese i te fakatotonu a te Eteleno, o mulimuli ki te fakatotonu ae nee tuku age kia ia.
17Ko te u higoa o te u foha o Levi: ko Kelesoni, mo Keati, mo Melali. 18Koeni te u higoa o te u foha o Kelesoni, o mulimuli ki onatou famili: ko Lipeni mo Simei. 19Koeni te u foha o Keati, o mulimuli ki onatou famili: ko Amilame, mo Isea, mo Hepelone, mo Usiele; 20pea mo te u foha o Melali, o mulimuli ki onatou famili: ko Mali mo Musi. Ko te u famili aia o Levi, o mulimuli ki te u fale o anatou tamai.
21Nee hau maia Kelesoni te famili o Lipeni mo te famili o Simei, ko te u famili aia o te kau Kelesoni. 22Ko natou ae nee tohi, o lau mai te mahina tahi o fai ki oluga ko te toko fitu afe nimageau tagata (7 500). 23Nee nofo leva te faahiga o Kelesoni i muli o te falela tapu, i te potu uesite. 24Ko te pule o te kau Kelesoni ko Eliasafe, foha o Laele. 25Nee tokaga leva te kau Kelesoni ki te u koga aeni o te falela tapu: ki te falela taputapu, mo te falela tapu, mo te la fakamalumalu o te falela tapu i te u tafaaki, mo te lito tapunu o te uluaga o te falela tapu, 26mo te u puipui o te lotoa ae e ina takatakai te falela tapu mo te aletale, pea mo te u maea o te falela tapu. E natou tokaga leva ki te tauhi o te u mea fuli aia.
27Nee hau maia Keati te famili o te kau Amilame, mo te famili o te kau Isea, mo te famili o te kau Hepelone, mo te famili o te kau Usiele, ae ko te u famili o te kau Keati. 28Ko tonatou kaugamalie ko te toko valu afe onogeau tagata (8 600), mai te mahina tahi o fai ki oluga. Nee tuku kia natou te tauhi o te u mea tapu. 29Nee nofo leva te u famili o te u foha o Keati i te potu saute o te falela tapu. 30Ko tonatou pule ko Elisafani, foha o Usiele. 31Nee tokaga leva te kau Keati ki te aleka tapu, mo te laupapa tapu, mo te tuuaga malama, mo te u aletale, mo te u mea gaue o te sagatualio, pea mo te lito tapunu o te potu taputapu. Nee natou tokaga leva ki te tauhi o te u mea fuli aia. 32Ko te pule lahi o te kau Levi ko Eleasale, foha o te tagata faisakilifisio ko Alone; ko ia ae nee leoleo ki te u tagata ae nee gaue ki te sagatualio.
33Nee hau maia Melali te famili o te kau Mali mo te famili o te kau Musi. 34Ko tonatou kaugamalie i te tohi ko te toko ono afe luageau tagata (6 200), mai te mahina tahi o fai ki oluga. 35Ko tonatou pule ko Tuliele, foha o Apihaile. Nee natou nofo i te potu noleto o te falela tapu. 36Nee tokaga leva te kau Melali ki te u papa o te falela tapu, mo ona akau fakamaumau, mo ona pou, mo ona tuuaga pou, mo ona ipu fuli, pea mo ona mea gaue fuli. 37Pea nee natou toe tokaga foki ki te u pou o te lotoa, mo te u tuuaga pou, mo te u pike, mo te u maea.
38Nee nofo leva Moisese, mo Alone pea mo ona foha ia mua o te uluaga o te falela tapu, i te potu esite. Nee natou tokaga ki te taupau mo te tauhi o te sagatualio, i te higoa o te u fanau a Iselaele; pea e tautea anai ki te mate te tagata kehe fuli ae e fakaoviovi anai ki ai.
39Ko te kaugamalie o te kau Levi ko te toko uafulu ma lua afe tagata (22 000), mai te mahina tahi o fai ki oluga. Nee fai leva te tohi aia e Moisese mo Alone, o mulimuli ki te fakatotonu a te Eteleno, ke tohi te u tagata fuli o mulimuli ki te famili.
Totogi o te u tama uluaki tupu
40Nee palalau leva te Eteleno kia Moisese: Ke ke tohi te u higoa taki tahi o te u tagata uluaki fuli o te u fanau a Iselaele, mai te mahina tahi o fai ki oluga. 41Pea ke vaehi kehe mai leva te kau Levi kia au, ko te Eteleno, o fetogi ai te u tagata uluaki fuli o te u fanau a Iselaele, pea ko te faga manu a te kau Levi ke fetogi ai te u manu uluaki fuli o te u fanau a Iselaele. 42Nee tohi leva e Moisese te u tagata uluaki fuli o te u fanau a Iselaele o mulimuli ki te fakatotonu ae nee tuku e te Eteleno kia ia. 43Ko te u tagata fuli ae nee tohi, o lau mai te mahina tahi o fai ki oluga ko te toko uafulu ma lua afe luageau fitugofulu ma tolu tagata (22 273).
44Nee palalau leva te Eteleno kia Moisese, o ui: 45Ke ke vahei kehe mai kia au te kau Levi ke natou fetogi te u tagata uluaki fuli o te u fanau a Iselaele, pea mo te faga manu a te kau Levi ke fetogi ai anatou manu uluaki. Pea e fakalogo mai leva te kau Levi kia au. Ko au ko te Eteleno. 46Pea nee toe leva ke toe totogi te toko luageau fitugofulu ma tolu tagata uluaki (273) o te u fanau a Iselaele, ae nee fakalaka ake i te kau Levi. 47E ke tuku anai te totogi o te tagata ko te u foi piesi paaga e nima, i te paaga o te sagatualio, ae e kalame nima te mamafa o te foi piesi e tahi. 48Pea e tuku anai te paaga aia kia Alone mo ona foha; koena te mea ae e fai anai ki te toe totogi o te u tagata uluaki ae nee fakalaka ake i te kau Levi. 49Nee tanaki leva e Moisese te paaga ki te toe totogi o natou ae nee mole fetogi e te kau Levi. 50Pea nee ina mau leva mai te u foha uluaki o te u fanau o Iselaele te afe tolugeau onogofulu ma nima foi piesi paaga (1 365). 51Pea nee ina tuku leva te paaga aia kia Alone mo ona foha, o mulimuli ki te fakatotonu ae kua tuku e te Eteleno.
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland