NUMELO 2
2
Fakatuutuu o famili i te nofoaga
1Nee palalau leva te Eteleno kia Moisese mo Alone, o ui: 2E tahi nonofo anai te u fanau a Iselaele ia tafa o te fuka o tona kau solia. E fakatuu anai te nofoaga i te takafoli o te falela tapu, o fakamamao mai ai.
3I te potu esite, e tuu ai anai te nofoaga o Suta, mo tana fuka, mo tana fua tau. I hena e nofo ai anai te pule o te u foha o Suta ko Nasoni, foha o Aminatape, 4mo tana fua tau ko te toko fitugofulu ma fa afe onogeau tagata (74 600). 5E nofo anai i ona tafa te faahiga o Isakale, mo te pule o te faahiga o Isakale ko Netaneele, foha o Sua, 6pea mo tana fua tau ko te toko nimagofulu ma fa afe fageau tagata (54 400). 7Pea hoko atu ki ai te faahiga o Sapulone mo te pule o te u foha o Sapulone ko Eliape, foha o Elone, 8mo tana fua tau, ko te toko nimagofulu ma fitu afe fageau tagata (57 400). 9Ko te kaugamalie o te hahai tagata o te fua tau a Suta ko te toko teau valugofulu ma ono afe fageau tagata (186 400). E natou olo anai i mua.
10I te potu saute, e tuu ai anai te nofoaga o Lupeni mo tana fuka, pea mo tana fua tau. E nofo anai i ai te pule o te u foha o Lupeni ko Elisule, foha o Seteule, 11mo tana fua tau ko te toko fagofulu ma ono afe nimageau tagata (46 500). 12E nofo leva i ona tafa te faahiga o Simeone, mo te pule o te u foha o Simeone ko Selumiele, foha o Sulisatai, 13mo tana fua tau ko te toko nimagofulu ma hiva afe tolugeau tagata (59 300). 14Pea hoko atu ki ai te faahiga o Kate, mo te pule o te u foha o Kate ko Eliasafe, foha o Leuele, 15mo tana fua tau ko te toko fagofulu ma nima afe onogeau nimagofulu tagata (45 650). 16Ko te kaugamalie o te fua tau a Lupeni ko tagata e teau nimagofulu ma tahi afe fageau nimagofulu tagata (151 450). E natou muli anai ia Suta.
17Pea osi ia, pea e alu leva te falela tapu, o fakatahi mo te nofoaga o te kau Levi. E natou haele anai i te lotomalie o te u fua tau e lua ki mua pea mo te u fua tau e lua ki muli. E natou olo anai o mulimuli ki te nofo i te nofoaga, o tahi muli te tagata i te fuka o tona faahiga.
18I te potu uesite, e tuu ai anai te fuka o te nofoaga o Efalaimi mo ana fua tau. Ko te pule o te u foha o Efalaimi ko Elisama, foha o Amiute. 19Ko tana fua tau ko te toko fagofulu afe nimageau tagata (40 500). 20E nofo anai i ona tafa te faahiga o Manase. Ko te pule o te u foha o Manase ko Kameliele, foha o Petasuli. 21Ko tana fua tau ko te toko tolugofulu ma lua afe luageau tagata (32 200). 22Pea e hoko atu ki ai te faahiga o Pesamino. Ko te pule o te u foha o Pesamino, ko Apitane, foha o Kiteoni. 23Ko tana fua tau e toko tolugofulu ma nima afe fageau tagata (35 400). 24Ko te fakatahi o te u tagata o te fua tau o te nofoaga o Efalaimi ko tagata e toko teau ma valu afe teau tagata (108 100). E natou muli anai i te kau Levi.
25I te potu noleto, e tuu ai anai te fuka o te nofoaga o Tane, pea mo ana fua tau. Ko te pule o te u foha o Tane ko Aiesele, foha o Amisatai. 26Ko tana fua tau ko te toko onogofulu ma lua afe fitugeau tagata (62 700). 27E nofo anai i ona tafa te faahiga o Asele. Ko te pule o te u foha o Asele ko Pakiele, foha o Okalane. 28Ko tana fua tau ko te toko fagofulu ma tahi afe nimageau tagata (41 500). 29Pea hoko atu leva ki ai te faahiga o Nefetali. Ko te pule o te u foha o Nefetali ko Aila, foha o Enani. 30Ko tana fua tau ko te toko nimagofulu ma tolu afe fageau tagata (53 400). 31Ko te katoa o te u tagata o te nofoaga o Tane ko te toko teau nimagofulu ma fitu afe onogeau tagata (157 600). E natou muli anai i tonatou fuka.
32Ko te kaugamalie o te kau Iselaele ae nee tohi mai te faahiga, mo te fua tau, ko te toko onogeau ma tolu afe nimageau nimagofulu tagata (603 550). 33Nee mole tohi te u foha o Levi o fakatahi mo te u fanau ake ae o Iselaele, o mulimuli ki te fakatotonu ae nee tuku e te Eteleno kia Moisese. 34Nee fai katoa e te u fanau a Iselaele o mulimuli ki te mea ae nee fakatotonu e te Eteleno kia Moisese: nee natou nonofo ia tafa o anatou fuka, pea nee natou olo o mulimuli ki te fakatuutuu ae nee tuku e te Eteleno ki te u faahiga mo te u famili.
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland