ESITELE 4
4
Mamahi o te kau Sutea
1I te iloi e Maletokeo te mea katoa ae kua hoko, nee ina hae leva ona kofu, kae nee ina tui leva he taga, pea nee ina laku leva he lefulefu ki tona ulu mo tona sino katoa. Pea nee alu leva ia ia i lotomalie o te kolo, o tagi mo kalaga i te lahi o tona mamahi, 2pea nee alu leva ia ia ki te matapa ulu ki te malae o te hau, ae nee tapui kia natou fuli ae e kofu ki he taga. 3I te fenua taki tahi, mo te u kogamea fuli ae kua kaku ki ai te fakatotonu a te hau mo tana lao, nee i ai he mamahi lahi i te hahai o Sutea; nee natou sesunio, mo fetagihi, mo tagi laulau, pea nee momoe he toko lahi ki te taga mo te lefulefu.
4Nee olo leva te u fafine faifekau a Esitele mo tana kau enuke, o fakamatala kia ia te mea aia, pea nee mamahi leva te fafine hau i ai. Nee ina fekau leva ke ave ni kofu o fakatui kia Maletokeo pea mo hui tana taga, kae nee mole ina tali natou. 5Pea nee fekau leva e Esitele ia Atake, ko he tahi o te kau enuke ae nee tuku age e te hau kia ia, pea nee ina tuku leva kia ia ke alu o fehui kia Maletokeo pe kotea te mea ae kua hoko, pea kotea te mea ae e ina fai feiai. 6Nee alu leva ia Atake kia Maletokeo i te malae lahi o te kolo, i te mua matapa o te hau. 7Pea nee fakamatala leva e Maletokeo kia ia te u mea fuli ae kua hoko kia ia, pea mo te paaga ae nee fakapapau e Amane ke foaki ki te koloa o te hau, kae totogi aki te maumaui o te hahai Sutea. 8Nee ina foaki leva he hiki o te tohi o te lao ae kua tufa i Suse ke pulihi natou, o tupu ke ina haga o fakaha kia Esitele, pea ke ina iloi te u mea fuli; pea nee ina fakatotonu ke alu ia Esitele ki te hau, o fai he hu kia ia pea mo he tagi i ona mua o uhiga mo tana hahai. 9Pea nee hau leva ia Atake o fakamatala kia Esitele te u palalau fuli a Maletokeo.
10Pea nee fekau leva e Esitele ia Atake ke alu o ui kia Maletokeo: 11E iloi e te u tagata faifekau fuli a te hau pea mo te hahai o te u fenua fuli o te hau, e i ai he lao ae e fakatua ki te mate he tahi pe, fafine pee tagata, e ulu ki te malae loto o te fale o te hau kae nee mole paui ia ia. E gata pe kia ia ae e fakatoo anai ki ai e te hau tona tokotoko aulo e haofaki anai tona mauli. Pea ko au, nee mole paui au kia tafa o te hau, talu maia aho e uafulu.
12I te fakaha o te u palalau a Esitele kia Maletokeo, 13nee fekau leva e Maletokeo ke tali kia Esitele, o ui: Aua naa ke mahalo e ke hao anai toko tahi i te kau Sutea fuli, koteuhi e ke nofo i te fale o te hau; 14koteuhi, kapau e ke fakalogologo i te temi nei, e hau anai te tokoni mo te fakamauli ki te kau Sutea mai he tahi age kogamea, kae ko koe mo te fale o tau tamai, e kotou pupuli anai. Pea ko ai e ina iloi naa mea age kua ke kaku ki te tuulaga fakahau o tupu ko te temi aeni?
15Pea nee fekau leva e Esitele ke ui kia Maletokeo: 16Alu, o fakatahii te kau Sutea fuli ae e nonofo i Suse, pea kotou sesunio kia au, aua pe naa kotou kakai pe e kotou iinu i ni aho e tolu i te pouli mo te aho. Ko au foki, e au sesunio anai mo aku fafine faifekau, pea osi ia, e au alu anai ki te hau, logo ai te lao; pea kapau e tonu ke au mate, e au mate anai.
17Nee alu leva ia Maletokeo pea nee ina fai leva te u mea fuli ae nee fakatotonu age e Esitele.
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland